ولااادتي في المركز الطبي الدولي

اترددت كتييير قبل ما اكتب الموضوع بس افتركت نفسي لما كنت حامل كنت احب اقرا قصص الولاده وهذا الي خلاني اتشجع واكتب 😆

يالله نبدا بسم الله الرحمن الرحيم 😉

انا ياحلوين من نهاية الشهر السابع كان عندي احتمال ولاده مبكره واخذت ابرة الرئه على جرعتين بينهم ١٢ ساعه
واتمنعت من الحركه والخروج وجلست في البيت من اخر اسبوع في السابع الى التاسع من اول يوم في التاسع بدات اخرج مااااصدقت اطلع من البيت كنت فرحاااااااااانه 😉 وفي نفس الوقت كان عندي خوووف تجيني ولاده وانا في السياره او في المطعم او السوق ماكنت اروح اماكن بعيده مع السواق ومع زوجي عادي اتطمن لما اروح معاه
بدات امشي من اول يوم في التاسع وكنت متوقعه اني ما اكمل اول اسبوع في التاسع وحتى الدكتوره قالتلي ولادتك قريبه هذا لما كنت في التامن قالتلي يارب بس تاخذي عشره ايام من التاسع 😆 🙂
وكل مايسئلنا احد من اهلي او من اهل زوجي نقلهم الولاده ان شاءالله قرييييبه

المهم يابنات انا مو بكريه يعني المفروض اكون عارفه كيف طلق الولاده للاسف انه في ولاداتي الي قبل ماكان يجيني طلق كانو يحددولي موعد للولاده بعد ما ادخل العاشر ويعطوني طلق صناعي واخر ولاده كانت قيصريه وهذا الي كان مخوفني ومخوف الدكتوره انه احتمال اولد قيصري
المهم ياحلوينا الراس نازل من السابع والطلق معايه من التامن بس طلق خفيف وانا ما اعرف على بالي طلق ولاده لاني عمري ماجربت الطلق الطبيعي
دخلت قسم الولاده كان عندي طلق في اخر اسبوع في التامن
ودخلته في التاسع ٣ مراااااات غير يوم الولاده قسم الولاده حفظووووووني وكلهم يحسبوني اول بيبي عشان كدا مني عارفه طلق الولاده انا بس احس بالم ويستمر معايه لساعه او ساعه ونص اقول خلاااااااص ولاده واخذ الشنطه واخذ شور والبس واتزبط واخذ ملابس البيبي ونجري انا وزوجي 😐 مع انه الالم يكون مو هاذاك الالم الي يخليني اروح بس اقووول لاااااا انا عمري ماجربت الطلق الطبيعي ودايما اسمع انه اهووون من الصناعي بس كانت عندي مخاوف تانيه غير الطلق الي كان يجي ويستمر لساعه او اكتر كان ينزلي دم مع افرازات وسدادة الرحم نزلتلي من اول اسبوع في التاسع والرحم كان فاتح ٢ سانتي من اول اسبوع عشان كذا كنت اروح للطوارئ على بالي ولاده وفي الاسبوع ال ٣٨ كان عندي مراجعه كشفتلي الدكتوره من تحت قالتلي ليه مستعجله لسا فاضلك في التاسع اسبوعين وعنق الرحم قاسي مو حق ولاده دحين مع انه كان فاتح الرحم ٣ سانتي قالتلي اصبري شويه وكل تاخيره فيها خيره وانا مني حابه اولدك قيصري لانه عندك احتمال كبير تولدي طبيعي حرام افتحلك بطنك قالتلي امشي ونامي مع زوجك واشربي كف مريم مع اليانسون والعسل لانه كف مريم يساعد على توسيع عنق الرحم (بناااات مايجيب الطلق زي محنا فاهمين لااااا يساعد على التوسيع فقط ) المهم يابنات رجعت البيت وانا متحطمه تعبت من المشي ومن كتر ما اشرب كف مريم ويانسون وعسل
وكنت حاسه انه ماحايجيني طلق عشان كدا طلبت من الدكتوره تولدني قيصري بس مارضيت

المهم عدا اسبووووووووووع وكل اسبوع يمر عليا كنت احسه شهر 😀

رحتلها مراجعه في الاسبوع ٣٩ وكشفتلي قالتلي الرحم فاتح ٤ سانتي وعنق الرحم لين احسن من الاسبوع الي فات وقتها انا جلست اضحك افتكرت اليوم الي قبل ايش عمل فيا زوجي وقلتلها يادكتوره هذا كله منه خلاني امشي مشييي تعبني الين سرت ادق السياره اقله وقف مو راضي يوقفلي اقله تعبت يقولي لا لسا امشي 😆 hy:

قالتله الدكتوره برافو عليك المشي جاب نتيجه قلها يعني اخليها تمشي كمان قالتله ايوه طبعا هو انبسط وقالتله الدكتوره لاتجيبها الا لما تحسها خلاااص تبغى تبكي من الالم وقالتلي حاطيكي كمان فرصه اسبوع من العاشر 😆 انا ملييت ابغى اولد 😡

رجعت البيت وكان بادئ معايه الم قلت لاااااا لسا مو هو الالم ويروح ويرجع وانا مطنشه وجلست اعمل عشا ومطنشه واتعشينا وجلست سهرانه وصليت الفجر والالم لسا موجود وانا مطنشته اخذت حبتين بنادول الساعه ٦ الصباح عشان انام وما احس بشيئ ونمت

صحيت ٨ الصباح من الالم واحاول انام مني قادره وجلست احاول انام الين الظهر والالم يروح ويجي كل ١٠ دقايق واقول لسا قادره استحمل ماحاروح الين ابكي من الالم وصحيت زوجي بعد الظهر قلتله شكلي حاولد المهم صحي وقلي كيف قادره تستحملي قلتله ايوه اتغدينا وكنت ميييته تعب ابغى انام قلتله حاحاول انام مره تعبانه نمت الساعه ٣ وصحيت ٥ من الالم عندي طلق وكل ١٠ دقايق ومني راضيه اروح خايفه يسير زي كل مره يحطوني على الجهاز ساعه ويرجعوني ومااافيا تعباانه المهم صحيت العصر وكلمت دكتورتي سماناظر يناااس مره حبيتها المهم
قلتلها الي سار معايا قالتلي شوفي لو منتي قادره تستحملي الالم تعالي بس لاتروحي على الطوارئ تعالي على العياده اكشفلك ولو قادره تستحملي روحي امشي من ساعه لساعتين وتعالي
قلت في نفسي لاااا اروح امشي بعدين اروح المستشفى ورحت مشيت ساعه وانا قادره استحمل صحيح الالم مايخليني انام بس عشان كان يروح ويجي كل ١٠ دقايق كنت ارتاح في هادي الفتره الي يروح فيها

رجعت البيت اخذت شور ولبست ورحت المستشفى وما اخذت لا شنطه ولا ملابس البيبي كنت متوقعه حارجع البيت كالعاده

دخلت المستشفى وحطوني على جهاز قياس الطلق لمده ساعه الين الساعه ١٠ وحاجه المهم الجهاز كان شكله خربان مايعطي قياس الطلق تمام كان يعطي انه الطلق بااارد واقل من المرات الي كنت اجي فيها وانا في بداية التاسع قلنا للممرضات انه انا معايا طلق والجهاز يعطي انه انا ماعندي طلق 😆 معاااااناه

دخلت عند الدكتوره وكشفتلي قالتلي الرحم فاتح ٥ قالتلي ايش رائيك تروحي البيت وتجينا الصباح لانه شكلك حاتولدي الصباح قلتلها طيب بس اعطيني اي مسكن عشان اقدر انام قامت طالعت في الورق حق تخطيط الطلق وقالتلي استني انا حاقيس الطلق بيدي وهادي الطريقه اضمن من الجهاز ويستخدموها البريطانين لقياس الطلق حطت يدها على بطني وسارت تقيس الطلق بيدها قالتلي لااااااا متسحيل اخليكي تخرجي انتي ولاااده انا وقتها كنت فرحاااانه وخااااااااااااااااايفه 😡
خلتني اوقع على ورقه وقالتلي حانعطيكي الحقنه الشرجيه تحت في قسم الولاده

نزلت وقلت لزوجي لاتقول لاحد اخاف يبرد الطلق لانه كل مره كنا نروح واحسب ولاده واقول للكل ويروح الطلق وخليته يجيب ملابس البيبي وملابسي هذا الكلام الساعه ١١ الليل

اعطوني الحقنه ومافي ٥ دقايق ورحت الحمام

جا زوجي وجاتني الدكتوره الساعه ١٢ وكشفتلي قالتلي ٦ سانتي خلاص حافتحلك مويه الراس واعطوني الكمامه عشان ما احس وفتحتها وانا دختتتتتتت ورجعت فقت بعدها قالتلي ان شاءالله باذن الله حاتولدي على الساعه ٢ وانا موجوده ما حاروح وجلست بره غرفة الولاده مسكينه مع الممرضات وانا جوه في الغرفه يجيني الطلق ويروح وكل ماجا يحطولي الكمامه عشان ما احس سار كل ٥ دقايق وقوي الساعه ٢ سار كل دقيقه او دقيقتين ماسرت قادره استحمل خلااااااااااص وحسيت نفسي سرت ادفع شافني زوجي خااف وراح نادى الدكتوره وجاتني وقالت خلاص يالله ولاده وسارو يعطوني ابر في العضل وفي الملحلول وانا ميته من الالم يحطولي الكمامه ويقولولي ادفعي ادفعي يااله حاتولدي وترتاحي هيا وانا شفطت بقوووه من الكمامه ونمت 😛 قالتلهم الدكتوره شيلو الكمامه ناااامت شيلوها وشالوها وصحيت شويه وسرت اسمعهم ويقولولي ادفعي بقوه عشان ترتاحي وانا ماسكه بحدايد السرير بكل قوتي والله الين اليوم احس يديني واصابيعي تعورني المهم
ويقولولي خلاص احنا شايفين الراس دفي بقوووه دفي وانا ادف والممرضات يصفقولي ويشجعوني ❗ وتروح الدفعه ويقولولي ارتاحي شويه وترجع تجي الطلقه وتقولي الدكتوره هيا بكل قوتك انا شايفه شعرها ياناس تقدري تحطيلها بكله تقولي كدا عشان تحمسني الله يسعدها 😆 hy:

المهم وجات الطلقه الي خلتني ادفع بقوووه وخرجتها وفرحو وصفقولي وحطوها على طول على بطني احسااااس سبحان الله غرييييب وتحسي برااااااحه وقتها شفتها وقلتلهم بسه وليه زرقه ونمت …… هيا ماكانت زرقه بس انا شفت لونها غريب المهم اعطوني ابره خلتني انام انام وخيطتني الدكتوره وبسسسسسسس انتهى الفلم والحمدالله وخلوني ساعه بعد الولاده في غرفة الولاده وجابوا البنوته بعد مانظفوها ولبسوها وقالولي رضعيها ورضعتها وبعدين طلعت غرفتي

اول شي حاقلكم رايئ في الدكتوره تجننن وحنوونه وقت الطلق جلست تقرا عليا وعلى بطني والحمدالله والولاده كانت ميسره

ثاني شي المستشفى (المركز الطبي الدولي ) مستشفى رااائع ونظيف وعنايه واهتمام والممرضات يجننو معاملتهم تجنن للمريض يعاملوكي كانك اميره او ملكه

ثالث شي نصيحتي لحوامل التاسع اشربو كف مريم وامشو كتير وادعو ربي ييسرلكم امركم ويسهلكم

واخيييرا خلصت بربره 💡