عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمه الله وبركاته..
اخواتي فالله..
فالبدايه ابغى رأيكم ومشورتكم لمشكلتي وهي..
انه عندي ولد خالتي اللي هو (اخوي من الرضاعه)..
وهذا ولد خالتي يعني انسان مره فله وانا واياه اصدقاء وانواع الميانه بيني وبينه وهو اكبر مني ..
وبدايه المشكله انه من فتره قريبه تقريبا قبل سنه
لاحظت عليه تصرفات غريبه ..
يعني لاحظت انه يتلصق فيني وما يمر يوم الا هو داق علي ومسولف معي تقريبا نص واحيانا ساعه كامله << احياناا يدق علي انصاف الليالي بعد,, يرسل مسجات شوق وعتاب ورسايل تكون يعني بمعنى انه مو اي احد يرسلها (تكون رسايل بين زوج زوجته؟؟؟؟
صار دايم مسنتر في بيتنا بين المغرب والعشا لا ويزعل علي لاكنت نايمه بهالوقت
خلو هذا كله كوم واللي حصل من فتره كوم ..
يقولي(( ريم ليتني مو اخوك تصدقين احياناا احقد على امك ليش رضعتني!!!!!!!!!؟؟؟؟؟))
ريم ماتصدقين شلون احبك قلتله اي حتا انا احبك يقولي لالا انا مو زي حبك ..اصلا ماراح تفهميني << انا هينا صراحه انصعقت يعني معقوله ………..
ويقولي من وانا صغير مفتون فيك؟؟؟؟ وان يوم انكم تنامون عندنا كنت اجلس قدامك واتمقل فيك وانتي نايمه؟؟؟؟؟؟
هذا غير الاشعار الغزليه اللي يرسلي اياها
واللي صار قبل اسبوع جنني وهبل فيني ..
يعني ماراح تصدقون لو اقولكم ..
((امي كانت طالعه برا البيت واخواني بعد برا ومافي الا انا والخدامه ..انا كنت نايمه بغرفتي
مادريت الا وهو يصحيني يقولي قومي بلا كسل في وحده تنام بهالوقت .. طبعا نايمه وبغرفتي يعني وش ابكون لابسه بذا الوقت ..؟؟؟؟
انا انجنيت وش جابه ذا وش دخله هينا تروعت من جد المهم قلتله وش عندك قال ابيك بموضوع قلتله اطلع وطلع ورحت لبست وجيت عنده قلتله وشو موضوعك قام يخربط وماعنده سالفه لاموضوع مهم ولايحزنون..بس كذا
يوم جلست شوي الا هو يهوجس ويناظرني قلتله شفيك؟؟؟ قال تصدقين منب متخيل انك بتعرسين ..
سكت وماقلتله شي يعني انا استحي من ذا الطاري قدام اخواني يجي هو يقولي كذا ؟؟؟
المهم يوم جا بيروح طلعت معه بالحوش وكان ماسك يدي ويوم جا بيروح مسكني مع ذقني وحبني مع خديني وراح << طارت عيوني وانهبلت وقعدت اصيح بالحوش ماتخيلت يوم من الايام انه يسوي كذا فيني انا اخته (اختــــــــه)..وطبعا سالت الخدامه قالت انه هو جا ويوم فتحتله قام يسالني وقال وين ريم قالت نايمه وقال وديني لمها ..
طبعا قررت اقاطعه وغيرت رقمي وبلكته من المسن بس انه صار يجي بيتنا يقول نادولي ريم ويوم اجي انا يسكت مايقول شي ولاصرنا الحالنا يقول ريم شفيك متغيره ..؟؟ ليكون زعلتي يوم ادخل عليك بالغرفه << انا مابيه يجيب ذا الطاري اصلا واسكت مااقوله شي بس هو مصر مصصصر اجاريه باللي يسوي ويعتبره شي عادي يعني ياربي نظراته تخوف وانا خايفه انه يجي يوم يتمادى اكثر واكثر
والمشكله عندي اخوي يكرهه يكرهه كره يعني لو بعلم عليه بيصير شي موب زين
وامي موب ذاك الزود علاقه معي عشان اقولها السالفه استحي اقولها وامه اللي هي خالتي احبها والا ودي يضيق صدرها باللي يسويه ولدها
……………………………………….
بس يعني هذي مشكلتي باختصار ابغى رايكم ومشورتكم يعني لو كنتوا مكاني وش بتسوون
ابغى رايكم بعد ياامهات يعني لو بناتكم يصير لهم هالشي وش بتكون رده فعلكم ..
نوروني الله ينور عليكم ………..
الله يجزاكم خير واسفه عالاطاله وشكرا لصاحبه المعرف…
تحياتي
………………………………………….. ……
