عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مساء الخيرات جميعا
بدون مقدمات ولامصالات اجيكم بسالفه من اخرها
دخلت على امي بالمطبخ وهي مدهره طبخ ونفخ جيتها على غفله وهي طربانه وتغني
(اذا قلته ياسيدي مايردش وان قلته ياعمي مايردش اعملوه ايييييييييييييه )
انواع التحريف بالاغنيه بس عاد هي ان مسكت خط بالطرب مايعوقها شي اهم شي تزبط اللحن والكلمات
حدث ولاحرج تاليف عيني عينك <<تراني بغثكم بهالايقونه على الفاضي والمليان عاجبتي وش حارق
رزقكم<<ياشين اللي تدور محارشه انكتمي
يمه اخلصي طبخ ونفخ فيه اجتماع عائلي عقب نص صاعه يالله ابي اشوف اخرتها معاكم وين بتدحدرون
هالسنه بس تكفين يمه ان قال اخوي بنروح بريطانيا ترى منيب رايحه معاكم وان قال لوس انجلوس
امكن ايه امكن نو قالت امي اجل تتطنزين علينا هاه يالبطرانه حق من دفنك بالتراب ياناكرة الجميل
على قد مانعديبك ونمشيك جايه تمقعسين علينا (اي تتعالين على النعمه ) بدل ماتقولين ماقصروا
اخواني مشوني وابسطوني يالهيسه يالتعبانه طسي لابارك الله فيك من بنتن جاحده ليتني باركتن عليك
يوم جبتك افا يمه الحين وراك قالبه علي كأنك عمة سندريلا الشريره وانا صادقه يمه اجل احد يسمي
السفر للجيزان رحلة وناسه والا رايحين بيت خوالي شهر مخمجين عندهم تسمينها طلعه يمه العالم تتطورة
اوصلت القمر وانتم للحين ماتدلون غير درب البر والكشتات فيه مايصير يمه عمركم شفتوا احد يخيم بالبر
حزة الصيف والله من القهر ودي انتف شوشتي المهم واطقها بكوه مير ماطقت لي حساب امي
وحاولت مرارن اتهنوص عندها بمعنى اكسر خاطرها بس مافي فايده ومن القهر قمت اصقع في البيبان
وارجد بباب الثلاجه واخبط بالادراج واصرخ بوجه الشغاله مسكينه مالها ذنب بس ماعندي الا هي وانواع
الاضطرابات سويتها بس مانفع ومابقى قدامي الا التليفون وجايته طايره ناويه اهشمه من قلبي بس تذكرة
هو الوحيد اللي يسلي خلوتي ماعندي غير مكحله والجامحه ابرد كبدي فيهم وقلت اتصل على مكحله
وفي روايه قديمه مضاوي وماخس من زيد الا عبيد المهم
الو: مضاوي
مضاوي:هاه وش عندها هالعجيز اكيد متطاقه مع ولد اخوك الصغير خابرتك تحطين عقلك بعقل هالبزارين
انا :اقل انطمي لاتخليني احطك في بالي وما ارحمك المهم مضاوي وين ناوين تتطسون هالسنه
مضاوي:والله مدري بس لايكون ناويه تخاويني تراك فشله وبرستيجي مايسمح اخذك معي هاالاماكن
انا :اقول عدلي كلامك معي لا اوريك شغلك من حطوك في مملكة المراءه وانتي مسويه راعيت مفاهيم
واتكيت وانتي من جنبها الله يرحم ايام الحنى والرشوش اللي مسنعينك والحين متكبره علينا تعلمتي
كم كلمه انقلش وقمتي تفلسفين علي اقول لاتمصخينها يام الروج السحري المهم تعالي وش رايك نصيف هالسنه
مع بعض اقنعي اهلك وانا الله يعيني على هالكواسر اتحايلهم ونكشت مع بعض صدقيني وناسه
مضاوي:بعدين اكلمك جاني خط طووووووووووووووووووووووووووط عادي انقطع الخط طبيعي
ابوها من تصريفه طايب يالشايبه اوريك
وجاء حزة الاجتماع الملكي وكان يترأس الجلسه اخوي عبدالله الكبير والشهير بعبادي بالله رجال طول
النخله وعياله يتسابقون معه بالطول ينادونه عبادي وخاصه امي طايحه فيه دلع وانا اللي اخر العنقود
ماينادوني غير وجه العنزه قهر<<قالولك اكتبي موضوع موب داخله الاشراف الاجتماعي
المهم وتستفتح الجلسه ويبدون في المناوره والمحاوره والاستشاره من اكثر تصويت للمنطقه
نروح لها بس لايغركم كثرة نباحهم على شي غير صاحي اللي يشوف اجتماعتنا يقولون بس هذول مخربينها
وطالعين برى المملكه والحمدالله والشكر هواشهم كله على مكانين اما الجنوب والا الطايف
اه من القهر العالم تسافر لبلجيكا وجنوب افريقيا واحنا ياحسره ذالينا بها الاماكن المهم
وانتظر مصالتهم تنتهي وجيت ليم امي وقلت مـــــــــامي <<لاحظوا بدى الدلع واحاول اتتدلع عليها
واتمسح عليها امكن تفوق عندها عاطفة الامومه وتعدني من ضمن ضناها لانها جاحدتني تقول انتي
والكرسي واحد <<الاعتراف بالحق فضيله المهم يمه وش رايك نخاوي اهل مكحله بفحمه يمه وناسه
وخاصه عبادي الثور ولدك يعرف عباديهم اخوهم الثور الثاني فزت امي قالت هاه منو مع مين
قلت اهل مكحله ماتوحين استغربت من امي ارتباكها وجها ااحمر وبدى يصفق من ها الالوان
تقل بصالة دسكو قلت يمه وش فيك انا قايله اهل مكحله موب توم كروز قالت مامتي امممممممممممممممم
ابوهم معاهم اها فهمت المغزى الحين من ورى هالخبصه والتلعثم بالكلام ايه يمه ابوهم
الفحل معاهم بالله هالعجيز وش عاجبك فيه الحمدالله ع النعمه عمي ضاري ارحم منه وانتي رافضه تعرسين عليه
المهم تم الاتفاق مع عايلتهم الكريمه وتم تحديد الموعد كعادة البدو مايمشون الا عقب صلاة الفجر
ومن الليل بدى كل واحد فينا يلم عوايزه اي اغراضه لذو العقول القاصره اكيد الوالده تخصص مطبخ ..من…..
الى …مابقت ولاخلت شي اش من ملاعق و وكفاترية مويه براريد ودافور وقدور ذبايح اي شي يخطر بالكم
اخذته حتى الضغاطه حقت المغاسل ماخلتها تقل بنسكن تحت الارض وبننقطع عن العالم
المهم عبت خمس كراتين كبار حق فاين المناديل
وكرتون الكبير تايد اقول لامي الناس اخترعت سلاات حقت التماشي علب متخصصه بالرحلات وانتم عقولكم
متحجره تحطون اغراضكم بكراتين تايد واريل متى الله يفكني منكم وكلن بدى يتجهز للرحله الجميله
وتعالت الفرحه على وجيه اهالي مكحله وذوينا وبدى الانطلاق من قبل بزوغ شمس جديده <<تحب ابلة التعبير
والكل اعصابه هاديه وكلنا ريلاكس الا شغالتنا كاسره خاطري مربطينها مع العفش مالها مكان نلحطها فيه
وبدة الرحله العظيمه ومسكنا الخط على قولتهم وهنا نبدا في وصف الزبده بدى الكل يعبر عن شعوره بطريقته
الخاصه وبدت جدتي تعبر لنا عن ايام زمان وكيفية التنقل من منطقه لمنطقه واعباء السفر والمغامرات
وعندما يطب عليهم قطاعين الطرق والا الوحوش وهالله هالله بالنصب اللي تفلته علينا جدتي
واحنا غصب نصدق ونمدحها ونرفعها فوق السما من زود التقدير والادب وكل واحد في قلبه يتمنى تطفطس
وتنام وتفكنى من دوخها احنا جاين نتمشى والا راحين رحله تاريخيه مالنا ومال ايامكم والله غثى المهم
ويبدى الملل يتسرب فينا واحد تلو الاخر اولهم البزارين اللي بالصندوق ورى يممممممممممه عطشنا
يمه جعنا يمه نبي الحمام يمه خويلد بيستفرغ يمه شوفي حمودي حاط رجله على خشتي
يمه مريم فكت كشتها ورمت البكلات يمه تكفين عطينا طرحه نهجد كشتها ومن كل شكوى قطره <<موضوعي
وكيفي احرف بالامثله بمزاجي لاحد يشره علي وانا كل الوقت ساكته ومتحمله ومليون جني وجني مخاويني
ولا فيهم الخير يهدون من روعي يقولون معليش اصبري بزارين لاتحطين عقلك بعقلهم المهم وناظر الا خويتي
مكحله بالسياره تأشر لي بالمنديل وانا اصارخ مضاوي انا هنا بلاها ماتشوفني من الانقاذ ا للي فوقي
وناظر والا البنت فطسانه ضحك وراه وتاشر على ورى يوم شفت الفضايح صحون الرز الكبيره
حاطينها بالواجه على قزاز السياره قال ايش قال توقينا من الشمس نعنبوا داركم
ماعلموكم ان فيه شي اسمه تظليل سيارات اه وتلوموني يوم دموعي اربع اربع طول الطريق
المهم طيخ طاخ واصوات البزارين واخوي ولا عليه رافع شماغه عن جبهته ورايحه تلق مع الحر والعرق وجدتي
مير تهمز في كريعاتها وتصفق وتعطيك من هالقصايد اللي تمرض شارون وانا اناظر مكحله بكل قهر سيارتهم
فاضيه ومرتاحين موب زينا مسوين طبقات وادوار كل واحد بحظنه بزر المهم ونوقف عند محطه وارسلت لي وخيتي
مكحله اخوها شريط موضي الشمراني خابرتني راعيت طيران وتقولي ادهري طول الطريق والله معاك
ويقفون عند المحطه وينزلون كل البعارين اللي بالصندوق وهجوم على البقاله وكل واحد رجع بهالبساكيت
والفش فاش احبه بس مقاطعته من زمان عشان يعرفون اني كبرت وصرت عروس زي القمر
المهم وانقطع الصمت بموضي الشمراني وهاتي طق وناسه واول اغنيه استفتحنا عليها
اسود ياسواد الليل ياريح المسك والعنبر
معليش بقولكم برب وراجعه اكمل لكم مأساتي انا ومكحله وما تضمنته الرحله من مواقف لاتنسى
بس وش اسوي الأيدقصيره والعين بصيره<<مدري وشله هالمثل داخل عرض بس تعرفون الامهات
اذا هاجوا علينا وخاصه اذا عندهم مشوار عرس وتبيك ترسمين لها عينها وتلطخينها بالمكياج
وذا حال امي الحين بس اخلص من تمكيجها واحاول ارجع لكم بـــــــــرب
