عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمة الله وبركاته
الصراحة لي فترة وأنا أفكر أكتب موضوعي بس مترددة , واللي جزمني حيرة كثير من أخواتي وتصديقهم لكل ما يقال !!!
الكل يعرف إن الرخصة الدولية خلاص بح في السعودية _ طبعاً بالنسبة لوظائف الخدمة المدنية فقط حسب الإعلان _ وأنه أصدر قرار بمنع الاعلان عنها وتدريسها وحتى استصدار شهادتها !!
والقرار معلن بالصحف وموقع المؤسسة العامة للتدريب الفني والمهني …
طيب … المشكلة موب هنا وإن كانت صدمة ما بعدها صدمة لكن هذا الموضوع اشبعناه نقاش , المشكلة بالمراكز ومعاهد تعليم الكمبيوتر اللي ما زالت تدرس الرخصة وتستنزف جيوب الدارسات بدون إحساس ولا ضمير يردعهم من أكل أموال الناس بالباطل …
تبون تقولون لي: لا خلاص تصافوا بينهم وأنحلت المشكلة وألغي القرار..
هذا الكلام طبعاً البنات يتناقلونه بينهم على ما قيل لهم بالمعاهد اللي يدرسون فيها ..
حبيباتي الواقع غير كذا تماااااااااااماً القرار مازال ساري المفعول والمعاهد تسوي كذا وتروج هالكلام بين الدارسات عشان الكسب المادي البحت , لأنهم وبكل بساطه ما يهمهم أنت راح تستفيدين من الشهادة _ إن أخذتيها _ وإلا لا !!
هم خلاص حطوا القروش بمخابيهم وأنتي بلطي بحر , محد ضربك على إيدك وقال لك تعالي ادرسي عندنا ..
وإذا أفحمتيهم قالوا لك حنا ما لنا دخل مشكلتك مع مؤسسة الرخصة الدولية حنا مجرد مركز مضيف ما لنا أي علاقة بالرخصة !!
_ وهذا الكلام ترى موب جايبته من راسي هذا الكلام حصل لي أنا شخصياً عشان كذا كتبته _
طيب هم بالبداية _ حسب كلام الأخوات _ قالوا ما جانا شي بخصوص قرار المنع وهم مثلهم مثل كافة الشعب السعودي المغلوب على أمره سمعوا بالقرار بس ما جاهم شي رسمي , كيف سبحان الله يجيهم وبسرعة البرق وحتى قبل ما ينزل شي رسمي قرار إلغاء القرار؟!
>>> حدث العاقل بما لا يعُقل فإن صدّق فلا عقل له !!
أيها الشعب السعودي الكريم إلى متى الاستغفال ؟ إلى متى هضم الحقوق ؟ إلى متى موت الضمير ؟ إلى متى وحقوقنا ضايعة ؟ إلى متى وإلى متى وإلى متى ……..
وحنا متى نصحى ؟ متى نفوق ؟ متى نرد اعتبارنا أمام اللي يستغفلونا ؟
والله والله ما بنا نقص ذكاء ولا حنا بغافلين عن اللي يدور حولنا بس ……………
وبالأخير اللي تبي تتأكد من كلامي أو تبي تطلعني غلطانه _ وياليت أكون كذلك _ تجيب لي أي ورقة من أي معهد تثبت كلامهم إن القرار ألغي وأن مؤسسة الرخصة الدولية الآن مسموح لها بإجراء الامتحانات …
يعني وحدة منكم تروح للمعهد اللي تدرس فيه وقالوا لهم فيه إن القرار ألغي وتقولهم: الله يعافيكم أعطوني ما يثبت , أبي أي خطاب رسمي يثبت كلامكم , وعلى قول المثل : الميّه تكذب الغطاس !!!
وشغله ثانية تأكدي أختي الحبيبة من أن المركز اللي تدرسين به معتمد , وذلك بزيارة موقع المؤسسة وتختارين مدينتك وتشوفين المراكز المعتمده بها , لأن معهد العالمية غيرررررر معتمد حسبي الله عليهم وأنا درست فيه , و إلى الآن ما أخذت شهادتي كل يوم يتحججون لي بشي وبالأخير قالوا لي مالك شي عندنا روحي تفاهمي مع المؤسسة مشكلتك معاهم خليهم يصدرون لك شهادة !!!
وأخيراً أتمنى إني ما أكون ثقلت عليكم بكلامي , وثقي تماماً أختي الحبيبة إني ما كتبت هالكلام زيادة مشاركات وإلا أزبع بعمري ..
أنا إنسانه مقهورة من الاستغفال الحاصل للشعب السعودي لأني بكل بساطة إحدى ضحاياه , وما خفي كان أعظم ………
تقبلوا تحياتي 😥
