عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
اخواتي الاعزاء ارجو انكم تعتبروا الموضوع ده فضفضة شخصية مع اخواتي
موضوع لعل وعسى ان نستفيد جميعا ونتذكر ونذكر
والله المستعان والله يهديني ويهديكم جميعاً
سميت الموضوع (نهاية القصة) لاني عايزة من كل واحدة فيكم تقرأ القصة تحاول تحط للقصة نهاية
والله أعلم بنهاية القصة هو اللي هايحط لها نهاية من عنده الرحمن الرحيم
القصة تبدأ بقصة بنت بتتمني زي اي بنت وبتحلم بقصة وبزواج غير تقليدي …
بنت لم ترتبط في الجامعة بقصة حب لكن كان ليها زملائها عادي ولم ترتبط بأي شاب
لكن للاسف بعد التخرج سافرت لانها كانت في كلية تربية
وانا بأقول للاسف لانها للاسف طمعت فيها اقرب اقرب الناس ليها
وابتدت الابتلاءات من هنا ….
للاسف طمع فيها والدتها اللي المفروض مش محتاجة اي فلوس لانهم ماديا مستريحين وغير محتاجين
والبنت بمنتهى الطيبة تشتري وتجيب والذهب للام
ويااااااااه على الصعوبات اللي واجتها لا تتخيلها ولا يتخيلها عقل …..نهائي
كان من اهون الصعوبات المرض لانها كانت كل شوية تصاب بمرض او بحمى
ومن بعده واصعبها على الاطلاق
هو للاسف ان ربنا فرض عليها انها تكون في السكن مع انسانة اخلاقيا غير سوية لابعد مدى
والبنت بفضل الله سوية والحمد لله رب العالمين ترى الله وتخشى الله
ومافيش حد بيقدر
ومافيش حد يشعر ولا اي حد يتعاطف
والام كل همها الفلوس والمال اللي هاتاخده من ورا البنت دي
تاخد كام الام دي
وخصوصا ان الام دي بتشوف نفسها انها للاسف كانت صغيرة وخرجت من التعليم الاعدادي وما كملتش تعليمها واتجوزت وهي صغيرة وضد رغبتها ولم ياخد ابوها رأيها
فابتعتبر انها اتظلمت وانها جميلة وانها اخدت رجل كبير في السن للاسف (مع انه طيب القلب ويتمنى يرضيها باي وسيلة )
وهي بتشوف نفسها انها مش بتشتغل يعني ايه الضمان لحياتها غير المال للاسف
مع ان والد البنت موفر لهم بفضل الله حياة كريمة ومريحة
جات البنت ولم تبخل بأي شئ
ولما رجعت مصر
لم تسمع من الام المتسلطة سوى كل كلمة تأنيب وكل كلمة تعذيب
ولم تكتفي الام بهذا بل تجاوزت الحد الى انها حرضت كل البيت عليها
الاب
والاخوة
ويالله … من غير المعين انت المستعان
وكل كلام الام (من فين هاتصرفي ؟؟؟)
و(احنا مش هانصرف عليكي ؟؟؟)
مع ان المستوى المادي مرتفع لاقصى مدى
والاب يقدر يصرف
والله المستعان على ما يصفون
والبنت للاسف ما حدش سامع وماحدش حاسس
تيجي تحكي هاتحكي لمين
وتيجي تتكلم مع مين
وحيدة تماما
وتيجي لغة العصر الانترنت
وتقع فريسة الوحدة وشيطان نفسها
وتتعرف على ناس والشيطان يوسوس ويحلل لها الطريق
ويقول (طالما انتي مش بتكلمي الناس دي بالتليفون ولا بتخرجي معاهم ولا بتوريهم صورتك ايه المشكلة ) انتي كده محترمة
ويخدعها شيطانها
وتتعرف على الناس وكل يوم تكلم ناس بنات واولاد
وللاسف في عز الذنب مش بنفتكر ربنا ولا بنفتكر ولا بنستحضر عظمة االله عز وجل
ويمر الوقت وتعجب بولد من النت وحصل ما لم يكن في الحسبان
ويتوالى الخطأ ويكبر
وللاسف
والسكينة سرقاها زي ما بيقولوا
والولد يعرفها بأخته
واخته فعلا تتكلم معاها بالتليفون
لكن
ايه ظروف اخته قلبها ابيض وطيبة ومتزوجة (ربنا يكرمها)
والبنت تسرقها السكينة اكتر
والشيطان يسول لها ويحسن لها الصنيع اكتر
وما بعد ذلك
يصر الولد على انه يشوف البنت ويقابلها
وهي مازال الله يحبها ومنتظرها تطرق من جديد على بابه
ومازال الله يحبها
وهداها الله الي انها تعمل استخارة
وانه لو عاوز يشوفها يجي هو وفي ظروف انها ما تقابلوش من ورا اهلها نهائي
وبعدين
تصلي الاستخارة
وربنا (الحمد لله ) لانها استعانت بالله لم يتخلى عنها ابداً
يالله يا كريم يارب لا تعامل عبادك بسوء ما فيهم ابداً
والحمد لله يهديها الله بأنها تقول للولد (اذا كنت تتحب تشوفني تيجي انت لمدينتنا (محافظتنا) وتتعرف على اخويا وانا هاكون موجودة على انك انت اخو صديقتي اللي هايصلح اجهزة الكمبيوتر )
وبفضل هداية الله لاخر لحظة والله لم يتخلى عنها ويمهلها
وتسمع بعدها ان الولد سيخطب
ويخطب مين
بنت لم تكلم ولد من قبل
بعدما سمعت منه كلام الحب وكلام غزل
وهو ما شافهاش
وهي تسمع وتتبادل الكلام
بوازع من شيطانها يصور لها الخطأ بشكل فاضل
يصور لها انها تحب وهو الحب حرام
والحرام بين والحلال بين
ويالله على الصدمة
وتتصدم البنت
وتقرر انها تنساه
لكن لازم تاخد بحقها انها بردو لازم تقوله (كان بمثابة اخ وصديق وانها كانت شايفه فيه اخوها فقط وكل كلمة قالتها ماهي الا مجرد كلام اخوي )
ولكن هيهات بتتضحك على مين ؟ على نفسها ؟ ام على الله – لاقدر الله – واستغفر الله العظيم
وتتعرف على ناس تانين
بتملى الفراغ مجرد ملئ للفراغ
والناس التانين بردو تتكلم معاهم عادي من مجرد منبع او مبدأ تعارف اخوي او صداقة بريئة
والشيطان النفسي شغال تمام
للاسف تتعرف على ناس ويكون النت كل حياتها
وانها لازم تكلمهم كل يوم
ومافيهاش حاجة طالما انتي مش بتكلميهم صوت او مش بيشوفوا صورتك
ومش بتقولوا كلام حب
زي المرة الاولى
يالله استغفرك واتوب اليك
وانت ارحم الراحمين
وهي امام الناس وخارج النت الفتاة المحترمة المؤدبة والوقورة
(يظن الناس بي خيراً وانا أسوء الناس يالهي ان لم تعفو عني وتغفر لي)
واللي في قلب البنت
نفسها تتجوز واحد محترم ومتدين وانسان يعوض صبرها خير
ويعوض اللي عملته والدتها واللي مازالت بتعمله معاها حتى هذه اللحظة
وتشاء الاقدار انها تاخد دورة كمبيوتر
وترى فارس الاحلام
شاب وقور ومحترم ولا يتحدث مع البنات
وهذا الشاب يبدي اعجابه بيها هي فقط ويحاول يتكلم معاها
لانه شافها انها محترمة
وهي ترجع تحكي عنه لاصدقائها على النت الاولاد والبنات عن الشاب عادي جدا
ماهي بنت محترمة جدا (يال السخرية)
والشاب يتقرب اكثر منها ولا يتكلم مع حد تاني من البنات غيرها
وتشوفه وتشوف فيه صفات كل الصفات اللي بتتمنها
وهي مازالت على كلامها مع الشباب
والشيطان يوسوس (ما انتي مش بتعملي حاجة غلط)
وينتهي كورس الكمبيوتر
والشاب يعرض عليها ويقولها (اذا احتاجتي اي حاجة انا تحت امرك وامؤريني )
وانتي عندك ايميلي اذا احتاجتي اي حاجة انا تحت امرك اطلبيها مني
بمنتهى الذوق والرقة من الشاب
يالله … رحمتك يا ارحم الراحمين
والبنت في اثناء ذلك تقترب من الله وقلبها متعلق بالله
وبالصلاة وقراءة القرآن
يارب اديني وارزقني بالشاب ده
واذا كان خير وجواه مشاعر صادقة ارزقني بيه كزوج صالح باتمناه من الدنيا يارب
ويبدأ الشاب يبعث لها بايميلات
ومرة تانية تعود نفس الكرة من جديد
وتأخد مشورة من الاولاد والبنات اللي تعرفهم من النت
والشيطان مستمر تماماً في لعبه بهذه البنت
وتلاقي اللي ينصحها نصيحة اخوية صادقة
ويقول لها (لا تقتربي منه وخلي الشاب هو اللي يبدأ بالكلام معاكي ابعدي انتي
واذا كان صادق اكيد هو اللي هايتكلم وحتى ان ما كانش جاهز مادياً هايتكلم ) وخلي امورك على الله
وتنصحها بنت من الانترنت بنفس الكلام
ويجي ولد وينصحها نصيحة للاسف – استغفر الله والله المستعان-
لازم تكلميه ماسينجر وتشوفي يمكن خجول ويمكن نفسه انك تفتحي له الباب شوية
ويالله
يمهل ولا يهمل
استغفرك واتوب اليك
وتتعرف على الشاب من كلامه اول مرة
ويتقل عليها شوية
ومرة يتكلم معاها ويتعرف على تفكيرها
ومرة يهزر معاها
وهي منتظرة
ااه يمكن خجول ولا حاجة ولسه هايتكلم
ويجي رمضان
والخلاص والتطهير من الذنوب في رمضان
والمهم اخلاص النية لله
وتنوي البنت انها لن ترى تلفزيون
ولن تدخل النت
ومش هاتفتح ماسينجر (الا مع الشاب اللي اعجبت بيه )
وتنوي القرب الى الله بكل طريقة وبكل وسيلة
وبقيام الليل
وبالصدقة
بكل شئ
ستطرق كل الابواب لرضاك يارب عنها
وعلشان ترزقها بالشاب اللي شافت فيه كل الصفات الي بتتمناها
ولانها نفسها انها تتجوز انسان هي بتحبه
وفي هذه الاثناء تعيش حالة من التردد يا ترى تكلمه ما سينجر ولا لأ ؟
هو لو كان عايز يصارحها بمشاعره
هو اللي هايطلب منها انه يكلمها
هايبعت لها بايميل
ويطلب منها انه في كلام مهم عاوز يقوله
وفي نفس الوقت تسمع عن اول ولد كلمته على النت تسمع من اخته انه (فسخ خطوبته ) لان البنت اللي خطبها
قالت له في وشه (انا مش باحبك)
يالله
كما تدين تدان ولو بعد حين
ويبعث لها الولد بايميل مرة تانية ويقول لها (انتي فينك يا اعز صديقة)
هل ترجع تكلمه ؟؟؟؟
لأ المرة دي اختارت رضا الله التام
في رحلة التطهير في رمضان
والحمد لله تنتصر على الشيطان ولاول مرة
ويجي الشاب الوسيم الواقع اللي شافها واعجبت بيه اللي عطى لها الكورس
يتكلم وهي تدعو الله بحرقة في رمضان (يارب خليه يتكلم خليه يقول هو عاوز ايه مني )
(يارب عاوزة اعرف اخر الموضوع )
كانت كل تصرفاته معايا في الكورس انه بيحبني ومهتم بيا انا دوناً عن باقي البنات
وما كانش بيكلم اي بنت غيري
وحكي لي عن وظيفته وعن نفسه
يالله ارزقني بيه
ويتكلم الشاب ويقول لها في الماسينجر (يال السخرية في الماسينجر ) اس الشر واساس البلاء
ويقول لها (انا معجب بيكي ) و(عاوز نتعرف على بعض الاول ويمكن مشاعرنا تزيد او تقل )
وياااااااااااه هي بتتمنى اللحظة دي وكانت بتتطلبها من ربنا
ولكن ….؟؟؟؟؟
تبدأ بقى ربنا يفوقها
لان ربنا منتظرها يفتح لها باب التوبة ويخلصها
وتسأله ( ليه ؟ وماذا بعد الاعجاب ؟ )
ويقول لها الشاب المحترم ( يا اما المشاعر تزيد او تقل سواء من ناحيتي او من ناحيتك)
وتقوله وبفضل الله وحده (وانا ما اقدرش اعمل اي شئ من ورا اهلي وليا حدود لا استطيع ان اتخطاها …..)
يقول لها (خلاص نتعرف بالحدود اللي انتي عايزاها ) (واللي انتي تشوفيه )
ويال الصدمة
وترد البنت ( لأ ) برحمة الله وبفضل الله يا كريم يا الله
يا ارحم الراحمين
الحمد لله لانها دعت من قلب صادق فاض اليك يالله في رمضان
دعت وقالت (اللهم اجعلني من عتقاء شهرك الكريم … يا ارحم الراحمين )
والحمد لله رب العالمين مجيب الدعوات
ردت البنت وقالت (لأ … انا مش هاعمل حاجة من ورا اهلي انا ما اقدرش اظهر لك مشاعري الا بارتباط رسمي قدام الناس وقدام بابا وماما وقدام الناس كلها … مش من وراهم )
وتساله (هو انت اتعرفت على بنات قبل كده من اللي كنت بتدي لهم الكورس قبلي ؟ )
يرد الشاب بمنتهى الصراحة (ايوة)
وتسأله (هو انت ارتبتطت بعلاقة عاطفية قبل كده ؟ )
يرد وبمنتهى الصراحة (ايوة)
وبعدها
بفضل الله تقعد البنت مع نفسها بعدها وتفوق من اللي كانت فيه
وتحمد الله بصلاة شكر
وتستغفر الله بصلاة استغفار (ركعتين ) وتتوب الى الله
وترى وتستوعب الموقف كله
ياااااااااااااااااااااه
يارب انت بتعلمني يا ارحم الرحمين
شوفت نفسي في المرايا
شفت ان الناس كانت بتشوفني محترمة وجادة
زي الشاب ده
والحقيقة اللي لا يعلمها الا انت يا ارحم الراحمين
في الخفاء انها بتكلم اولاد على النت
وتعرفهم وتتكلم معاهم
والشيطان يحلل لها عملها
وكانت بتطلب انها تتجوز انسان محترم
ازاي ؟ وهي للاسف بتغلط وبتكلم اولاد
يبقى ازاي ؟
عملي تجسد في شكل انسان
وهي حالياً اخدت القرار بالبعد عن الشاب ده
والتوبة الى الله
وعدم العودة الى نفس الذنب
وانه يكون ظاهرها مثل باطنها
زي ما الناس شايفين انها محترمة ومش بتعرف اولاد في الواقع
لازم يكون قالبها ان شاء الله مثل الظاهر
بينها وبين ربها ما تعرفش اولاد
دي تقوى الله الحقيقية فعلا
عرفت واتعلمت
والله يطهرها من ذنبها
والله يغفر لها
والله يغفر لنا جميع ذنوبنا
ومع انها للاسف حبت الشاب او نقول اعجبت بيه
لان يا جماعة اللي بيرسم حلم او صورة في خياله بيكون حاببها من زمان
مش من لحظات
لكن اختارت انها تسيبه
بعد ما قالت له رأيها الاخير
وبداخلها كل ما بتصلي لله ان ربنا هايكرمها ان شاء الله وهايعوض عليها
وكل يوم تدعي وتستغفر وتبكي وتقول (يارب اغفر لي وارحمني تبت اليك انا مش وحشة اوي ما تتخلاش عني ارجوك)
وتسترجع
وتحتسب لله
وتقول ( لله ما اعطى ولله ما اخذ ان لله وانا اليه راجعون اللهم اجرني في مصيبتي واخلفني خيراً منها )
طمعت في نصر الله
لكن الطريق والوسيلة كانوا خطئ
وادعو الله المغفرة والرحمة …
واتذكر الآية من سورة الحديد ( يا ايها الذين أمنوا اتقوا الله وأمنوا برسوله يؤتكم كفلين من رحمته ويجعل لكم نوراً تمشون به ويغفر لكم والله غفور رحيم )
واتذكر أيضا الآية في سورة يوسف (إنه من يتقي ويصبر فإن الله لا يضيع أجر المحسنين)
أدعو الله تعالى ان اكون من المتقين وان يتغمدني أرحم الراحمين برحمته
في انتظار ردودكم يا جماعة
واحب اسمع نهاية لقصتي تعتقدوا ايه نهاية القصة والنهاية اكيد لايعلمها الا الله
والتعليق على القصة
