نصيحة مجربة يا بنات الشرقية للي تبي تولد

والله يا بنات الوحدة اول ما تحمل تفكر وين تبي تولد وهاذا همها الاكبر وقبل سنة من الان,ولدت الحمدلله وجبت اولادي التوأم
وناوية افيدكم بتجربتي وانشاء الله ما اكون ظلمت احد

كنت احوس وادور على النت عن افضل مستشفى توليد بالخبر وافضل اخصائية توليد والاقدار رمتني عند الدكتورة اميمة بمستشفى المانع بالخبر,وكتير نصحوني فيها وبالمستشفى من النت من الارشيفات
,الحاصل وعلشان لااطول عليكم بالقصة نصيبي كان معاها

راجعت بالشهر التاسع لاني على حساب شركة ومشيت المواعيد كله تمام والضحك والفرفشة واستقبالها الحلو وكل هدي الخرابيط اللي الحامل تتبشر فيها خير وتقول الحمد لله هذي الدكتورة مررررة صبورة وبشوشة ماراح تخاصمني وانا اصارخ وقت الطلق

الزبدة خلصت شهري التاسع وانا حامل بتوأم وكل يوم اقول اليوم الفرج لكن تجاوزت التاسع ب4 ايام وراجعتها قبلها بيوم وشيكت على وضع الاجنه كله 100 بالمية وحتى قالت ولادة طبيعية وراس الاجنة للاسفل.للعلم اني وضعي تمام من الشهر التامن والراس للاسفل للاتنين
وقالت بعد يومين لو ماجاكي طلق تعاليلي
الحاصل اليوم اللي سبق مراجعتي لها رحت اشيك على عنق الرحم عند دكتورتي اللي انا من زمان اراجع معاها لاني حسيت بالام خفيفة قالت موسع سانتي
استنيت للصبح.ورحت اراجع موعدي مع الست اميمة وهي تشوف قياس عنق الرحم قعدت قال ايه توسع عشان تسرع الولادة وانا اصلا مادخلت بمرحلة طلق الولادة بس كله طلق بارد خفيف
الحاصل رحت البيت واشوف الله يكرمكم دم نزل عليا طبعا من عمليات التوسة اللي سوتها فيني لعنق الرحم

قعدت هداك اليوم والالم يززيد بس برضو مو طلق ولادة لسةوالدم ينزل بين فترة وفترة وانا خفت واول ما شد الالم بس شوية من طلع الصبح اتصلت بزوجي وقلت تعال سريع

رحت وفحصت الدكتورة المناوبة قالت لسة الرحم مو مفتوح بس لازم تقعدي لين دكتورتك تيجي وقعدت انتظر وياليتني ما انتظرتها
تصوروا ايش سوت؟اول ما دخلت قالت انتي ما ولدتي؟وقلت لا بس حسيت بشوية الم وجيت اشوف الرحم اتوسع واللا لا.جات تكشف وقالت طيب اشوف كدة
والله يا بنات وعزة ربي وجلاله ما اكدب عليكم بس قلبي عليكم لا تسوي فيكم اللي سوته فيني
لما كشفت اتالمت وحسيت كشفها مو مجرد قياس للرحم ولا غيره كانت تفتح الموية حقت الاجنة………
اي والله وما اكدب
يعني انا جايتك فيني طلق بارد ما دخلت ولادة بس جيت اقيس عنق الرحم عشان اطمن لانه بيتي بعيد عن المستشفى واخاف يتوسع وانا مو حاسة فيه من كتر مو حملي كان تقيل وتوام يعني وتصير لي مضاعفات وانتي يادكنورة اميمة تسوي كدة

طبعا لما فقعت الموية كل بدني كششش ودخلت في حالة هستيرية قلتلها يا دكتورة انتي ايش سويتي؟ليه فتحتي الموية انا مافيني ولادة؟

وعزة ربي ورافع سبع سموات انه كل ديك البشاشة والابتسامات والحدلقة اللي طمنت الوحدة من اول راحت
وكشرت فيا وشخطت وقالتلي انتي عاوزة تولدي واللا لا؟ شوفو السؤال
يعني ايش رايك يا دكتورة اميمة تفتحيلي الموية وانا حامل بتوام وشهري الاخير ومافيني طلق وتحطيني امام الامر الواقع وتقوليلي تبغي اولدك واالا لا؟

مع العلم اني حسيت من كشفها انها مرة توغلت لدرجة لما قلتلها خلاص قالت بخصام خلتني اهجد واخاف قالت عاوزاني اشوف شغلي ولا لا؟
وبعدين حتى الممرضة اللي معاها مسكت رجولي من طرف وهي من طرف تاني وهاتك فتح في الموية

ولما صرت ابكي قالت انتي بتبكي دلوقتي ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

زوجي من صراخي وبكاية جا من برة مفجوع ووجهة صفر لما عرف ماعرف ايش يسوي كان بتخاصم معاها لكن المهم وضعي هو اللي كان حرج

لا وكمان جات قالت تبغيني اولدك قيصري واللا طبيعي؟
انا زدت بكا قلتلها ليه تقولي كدة؟انا اولادي وضع راسهم تحت
قالت لا واحد فوق التاني غير وضعه
بكيت اكتر والموية تخر مني والوقت مو بصالحي والنفسية محطمة

قلتلها كيف انا امس الليل جيتكم في المانع ورحت لدكتورة السونار اخدت الاشعة وماعلقت وكله كان طبيعي ولزيادة في الاطمئنان يا بنات وحياة اولادي ال 3 اللي ماعندي غيرهم عشان دكتورة السونار كانت دلخة ولاعلقت لما مشيت من عندهم رحت لدكنورتي الله يسعدها اللي كنت من اول اراجع عندها بس ماتولد وقالتلي بهديك الليلة الحمد لله كله طبيعي وراس الاجنة اسفل وانشا الله طبيعي مو قيصري

الزبدة قالتلي الست اميمة انتي لما جيتي امس ما قالولك بالسونار انه واحد عكس اتجاهه؟

قلت لا ولاعلقو ولا كلمة
قالت اوو معليش انا اسفة احسبهم قالولك من امس انه وضع واحد فيهم راسه فوق

وقالت لو عاوزة اولدك طبيعي ماعنديش مانع بس التاني احاول اعدل وضعه في الرحم بيدي بس ما اظمنش؟

قلتلها هاتو السونار عشان اتاكد جابو السونار بس تتوقعو بهديك الحالة اللا وعي اقدر احكم صح؟

شفت راس فوق وراس تحت بس الله اعلم كيف كان وضع الجسم بالنسبة لهم وهادا اللي يحدد انه الجنين عكس وضعه واللا لا

وطبعا الموية تخر لازم اقرر سريع يعني ويمكن صدقو ويمكن كدبو عشان فلوس العملية اكتر ودكتورتي طمنتني وبنفس الوقت دكتورة السونار عندهم ماعلقت انه شي اختلف؟

ايش الحقيقة الله اعلم يعني معقولة دكتورة سونار تشوف وضع الجنين عاكس ماتقولها بنفس اللحظة لدري الدرجة الاهمال؟
او الموضوع نصب عشان فلوس اكتر وسجل عمليات اكتر وعشان لاتقرف نفسها بالولادة الطبيعية وتوام كمان

الله ياخد حقي وبس وهو اللي يعرف حقيقتها

وكل هادا كوم وبعد العملية كوم

طبعا بعد العملية الوحدة محتاجة رعاية وفتح بطن يعني معرضة للمخاطر اكتر
قضيت يوم بغرفة الملاحظة

بعدين رحت لغرفة لحالي الممرضات السعوديات صراحة الله يجزاهم خير
والهنديات لازم تطلبيهم كل ما بغيتيهم كانك تشحتي بس ما اظلمهم في كم وحدة كويسات
وحتى الفلبينيات لانه رواتبهم رخيصة بالتالي مافيهم يشتغلو وهادا كلام وحدة فلبينيةمنهم قالت ابغى افسخ العقد ومو قادرة اشتغل هنا الراتب ما يحمس
يعني مافي مقارنة ابدا مع ممرضات سعد
تخيلو الدكتورة المصونة والله والله والله انها ماكشفت على جرحي ولا كلفت نفسها تطمن على حلقي كان حلقي ملتهب بسبب خرطوم العمليات اللي يدخلوه في القصبة الهوائية
وشافتني اكح وتلوى من الالم وهي شاحطة نفسها بالبنطلون والمناكير الاحمر وعزة ربي انه الدكتورة المناوبة فتحت الجرح واتطمنت على الخياطة انها كويسة وقاست حرارتي وعرفت انه عندي سخونة ووصفتلي مضاد
وهذيك بنت ال……. ماكلفت نفسها ياناس حتى لما اقولها في سخونه تقول للمرضة اعطيها مسكنات
طيب تعالي اكشفى شوفي السخونة من ايه؟طيب شوفي الخياطة تمام واللا لا؟
مو انتي دكتورتي وفزعتي وفتحتيلي الموية وماصبرتي عليا عشان اخرت العجلة حقتك اروح غرفة العمليات اللي راح تلطشي بعدها من ورايا 14 الف؟؟

وطلع عندي التهاب شديد بالحنجرة هادا طبعا بعد ماطلعت من المستشفى رحت لدكتورتي واعطتني دوا واهتمت فيا والحمد لله الكحة راحت والسخونة راحت.ولعلمكم طلعوني بقوة قعدت 5 ايام وانا على هادا الحال ومسكوني قالو لا استني برضو تيجي دكتورتك وتكتبلك خروج>قال يعني دكتورتي مرة تهمها حالتي هي بتكشف اصلن
واشيل اغراضي وتيجي رئيسة الممرضات وتحاول تقنعني قلتلها بعد مافاض صبري انتو بتسولي ايه
لو المسكنات اروح اخدها بالبيت احسن
والله وطلعت غصبن عنهم

وشي تاني بالنسبة للاطفال,ورب الكعبة يا امهات اللي قلوبكم علة اولادكم انه بنتي التوام الصغيرة تحزن كل ما كنت ارضعها وانا بالمستشفى كل نص ساعة تتبرز
اشوف البنت كل ماجات من الحضانة حفاظتها وسخة ومحمر مقعدها لدرجة تسلخات وعزة ربي ما اكدب لدرجة فيها دم من زود التسلخ
طيب اتصلنا بالدكتور حق الاطفال اكتر من خمس مرات نساله ترى البنت كدة كدة يقول اللي ماعنده ذمة الاطفال الجدد لازم يتبرزو اربع مرات اقول يادكتور كل نص ساعة البنت تتبرز البنت فيها اسهاااااااااااال كل ما رضعت خرجت
يقول لا لا طبيعي
طيب انا ام من قبل يعني انا حمارة وانت الدكتور؟
لدرجة تسلخات بدم يا دكتور الرحمة والشرف والامانة؟
لا وطبيعي ومو مشكلة
والمصيبة قلت استني الدكتور المناوب اللي بعده حق الاطفال
يمكن يشفي غليلي
وربي كلهم يقولو طيب بعد ما اخلص عيادة امر عليكم
والله العظيم الجبار انه ماشفنا رقعة ولا واحد فيهم وانه بنتي وانا تعالجنا بالمستوصف اللي جنبنا لما طلعت من قبر المانع وسفاحين المانع حتى ولدي التوام التاني كانو يبغو يطهروه جو قالولنا لا العضو التناسلي حقة صغير ما يسمح؟وبرضو لما طلعت رحت كشفت على الولد طلع ياحرام عنده فقر دم لكن ذمتهم هي اللي صغيره ولا يبغو يشتغلو بس يبغو فلوس بدون ذمة وشكلهم اصلن ما حللو له

ورب الكعبة ورافع سبع سموات يا بنات اني مريت بحالة لدرجة السخونة والتعب نسيت اولادي واترميت على فراشهم انتظر الممرضة تدخل عليا ومن درجة السخونة واني خلاص مغمى عليا مو قادرة اضغط الزر وانادي الممرضة وهو بيدي
وكل اللي سوته الممرضة التخينة المغربية البيضة قالت طبعا فيكي سخونة لان الجو حار والغرفة مكيفها على الواطي::::::::نظرية وتعريف جديد للسخونة الله يجزاها خير وكما تدين تدان
وجات رافعه البرد عليا وتركته يخبط فيني وانا مسخنة وميته من البرد واتنفض وانا مخيطة عمليه لا اقدر اقوم ولا اتكلم كتير عشان الكحة ما تزيد وتزيد سكاكين محل الخياطة معاها ورب الكعبة مسلسل تعذيب مو مستشفى ماكنت بيوم من الايام اتوقع انه راح يسير فيني كدة او في ناس ماعندها ذمه كدة
واقسم بالله العظيم وربي بيحاسبني على كل كلمة كتبتها ولا احب اشهر بالناس بس يا بنات انتبهو مو اي احد يضحك بوجهكم تصدقوه
وشوفو اولادي دحين عمرهم سنة ومر على هادا الموضوع سنة وطبعا دوبي اشم نفسي وافوق وربي اني قبل اكتب حطيت راسي على المخدة وترجع لي الذكريات اليوم وامس واللي قبله وماقدرت انام قلت لازم اكتب بالمنتدى وانبهكم واللي تبغى تتعض وربي شاهد عليا يوم الحشر اني ما تبليت عليهم لانه برضو فيهم ممرضات لهم خبرة وطيبات بس هادا الوضع وهادا الحاصل معايا ويمكن كتير فيكم
جربو ها وارتاحولها بس الولادة نصيب وهاذا هو نصيبي وهذي قصتي

ونيصيحة اللي بتولد تروح سعد ولادتي الاولى وانا بكرية كنت على كفوف الراحة كانها المستشفى ليا وبس مع ممرضينها ودكاترتها
كل نص ساعة لازم تيجي من نفسها الممرضة تشيك مو لازم تناديها وخياطتهم تمام وعناية وذوق وتمارين وحتى البيبي يجيبوه لكي ويعلموكي كيف ترضعيه وحتى يمسكوه الحلمة عشان يساعدوكي انه طفلك يبدا يرضع لو ماتعرفي ترضعي وحتى لو السعر صحيح رفعوه لاتجازفو بمستشفى معفن زي المانع وهادا رايي والله حتى لو تستلفو مبلغ الولادة لانه مو هين الوحدة تترمي بيد ناس ما يحترمو اصول ولا ادب المهنة