نصائح بسيطة قبل وبعد الحمل

ازيكم يا احلى فراشات , فى نصائح حبيت اقولهالكم هى صحيح بسيطة بس باحس انها ممكن تفرق
اولا قبل الحمل:
ريحى دماغك وماتفضليش تحسبى ايام تبويض ولا انا دورتى منتظمة ولا لا بس خلى فيه انتظام فى العلاقة و ابعدى عن اى ضغوطات نفسية وادعى ربنا دايما واتوكلى عليه.
هيئى جسمك للحمل سواء كان اول او تانى حمل يعنى روحى لدكتورة نساء واعرفى منها ايه الحاجات اللى فيها نقص وجسمك محتاجها زى الحديد او الكالسيوم والحاجات دى طبعا بتتعرف عن طريق التحليل.
ثانيا بعد الحمل:
خليكى هادية خالص وحاولى ماتتعصبيش لان البيبى بيتاثر .
حاولى ما تشديش انت و زوجك فى الفترة دى عشان البيبى بيحس باللى بيجرى حواليه.
اسمعى دايما قران وساعات موسيقى هائة وكلمى البيبى دايما لانه بيميز الاصوات حتى وهو جنين.
اسمعى دايما كلام الدكتور وملكيش دعوة بماما قالت ولا حماتى قالت بالذات فى موضوع الولادة طبيعى ولا قيصرية وفى المستشفى ولا البيت.
العلاقة الزوجية مفيش قلق منها مدام الدكتور مش محذر منها لان ناس كتير ممكن ماما او حماتك بيفضلوا يقولوا اول 3 شهور ما تعمليش علاقة مع زوجك اللى مفيش منها مشكلة مدام مفيش حمل ضعيف او اجهاضات سابقة متكررة.
ماتضايقيش من شكلك اثناء الحمل وحاولى تستمتعى بحملك .
ماتقفيش كتير وانت حامل عشان ماتتعبيش يعنى كل 15دقيقة وقوف ريحى بعديها 5 دقائق.
احذرى من انك تاخدى ادوية اثناء فترة الحمل الا باستشارة طبيبك وسيبك من فلانة اللى تقولك وانا حامل كنت باخد دواء والبيبى اتولد زى الفل .
حتى المراهم بتاثر لانها بتمتص عن طريق الجلد وبتوصل للجسم من جوة يعنى لازم استشارة طبيب .
ربنا يرزق كل واحدة نفسها فى حمل ويقوم كل حامل بالسلامة ويارب اكون قدرت افيد.