عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
كيفكم كروشات >> ان شاءالله انكم بصحة وعافيه
قبل يمكن شهرين ونص نزلت موضوع اللي بالرابط هذا تكلمت فيه عن حال جنيني وانو احتمال مايعيش … والبنات اللي ماقصروا ودخلوا الموضوع وواسوني ودعولي والله يجعلها ان شاءالله بموازين حسناتهم
والحين جايه اقولكم باللي صااار ,,,,,,, ولو مافتح الرابط شوفو موضوعي من بين العناوين اللي تحت
(كل من تنتظر مولودها تدخل وتاخذ عبرة)
http://satfrequencies.com/girls/alfrasha13/thread1120915/
السالفه اني خذيت من الشهر العاشر 8 ايام علشان كنت انتظر راس النونو يقلب على تحت وأولد طبيعي بس شاءالله سبحانه انه مايقلب وقررت خلاص وولدت قيصري
النونو طلع التنفس عنده تعبان ودخلوه للعنايه المركزة وحطوا له جهاز التنفس الصناعي
واليوم الثاني دخلت اشوفه وسلمت عليه وهو جوة الحضانه ولمسته بيدي وقريت عليه سبحان الله رغم اني عارفة انو راح يتوفى الا اني فرحانه فيه لأنه مولودي الأول وأحاسيس ماتوصف اول مرة احس فيها
بس بعدها صرت ادخل عليه وانا مشتاقه له وبعدها اطلع ودموعي اربع اربع من حزني عليه كان يسكت واذا قربت منه يبكي مرة>> مادري ليه تقول الممرضة بما انها خبرة بأطفال العنايه انه يحس بوجود امه وابوه سبحان الله>>> واللي مموتني حزن اني ماقدرت لا احضنه ولا ارضعه طول ما أنا بالمستشفى
وباليوم الخامس كان وقت خروجي من المستشفى طبعا دخلت عالنونو علشان اودعه يمكن يموت ولا عاد اشوفه وحطيت يدي على راسة وانا ابكي وهو يبكي وكلي حزن وألم لأن ربي ماكتب لي حتى احضنه او ارضعه المهم اني قريت عليه ودعيت له بالرحمة وقفيت عنه وانا وربي كلي الام وحزن ومايحتاج اوصفها انتم امهات واكيد عارفين
بعدين جاء زوجي ورجعني له وقال لاتودعينه وانتي تبكين ودعيه وانتي تضحكين
بس وربي العبرة خانقتني ولا قدرت ابتسم الا يوم تذكرت انه راح يكون من طيور الجنه لو توفي والحمدلله ابتسمت له ووتركته على امل العودة في موعدي الجاي علشان تنظيف الجرح
بعدها رحت لأهلي وبعد 14 يوم راح زوجي يزوره طبعا هو يوميا يزوره والمسكين تعلق فيه بالمرة
ويوم شافه دق علي يقوللي انه صحته احسن من كل الأيام اللي فاتت وبشرته صافيه ويرفع يده ويتلفت على خفيف لدرجة انا توقعنا انهم راح يطلعونه وناخذه ومن فرحة زوجي فيه صوره صور كثير وهو بالحضانه وتركه ورجع البيت واول ماوصل البيت دقوا عليه من المستشفى يخبرونه انه اول ماطلع من عنده توفى الساعه 2 الظهر
وسبحان الله يقول زوجي قبل لا ادخل عليه اخر مرة دعيت الله اني ماشوفه وهو يومت والحمدلله ان ربي رحمه وأجاب دعوته
والحمدلله على كل حال وربي اني اكتب وانا دموعي تصب بس الحمدلله على كل حال ان شاءالله انها خيرة يارب
وكل اللي ابيه دعواتكم لنا
وان شاءالله ربي يعوضني خير واجي المرة الجاية اكتب لكم اخبار حللللوة يارب
والله يقر عيونكم بأطفالكم يارب
