موقف لااحسد عليه تعالو استفيدووو

السلام عليكم ورحمة الله وبركاته..
امس حصل معايا موقف طيح قلبي من مكانه وغيرني مع بنتي كثيررر اللهم لك الحمد يعني رب ضارة نافعه بس مو كل مره تسلم الجره.. عشان كدا حبيت اكتب الموقف وانصحكم كم نصيحه..
والله يابنات انا كنت مره ملهوفه على بنتي واهتم فيها كثير ومااغفل عنها لحظه دايما اخليها تلعب قدامي واكلها واغيرلها بنفسي وماعتمد على احد غيري في الاهتمام بيها ابدا.. لكن الحال كله اتغير بمجرد ماحملت وبدأ الوحم والتعب وقرف الحمل سرت دايما طايحه وتعبانه واترمى من مكان لمكان وبنتي سارت الضحيه ,انا من اول ماحملت لحد الان 3 شهور جالسه عند اهلي لظروف معينه وامي كانت تهتم ببنتي والخدامه تساعدها,لحد ماوصلت لمرحله اعتمدت على الخدامه بشكل كاااامل طول وقتها ورا بنتي وانا مريحه بالي…
امس كنا قاعدين نتكلم ونضحك وكل شي تمام وبنتي واولاد اختي في الحوش وانا متطمنه ان الشغاله معاهم طولنا في الجلسه وامي الله يطول في عمرها افتقدت الصغار وقامت تنادي عليهم لكن ماحد رد عليها انا هنا قلبي نغزني الحوش هدووووء ومافي احد والصغار اختفو قمت ادور بنتي في كل البيت ماهي موجوده وكان الوقت وقت صلاة الجمعه وكل الرجال في الصلاه وبنتي والصغار مفقودين انا اتجننت وكلنا قمنا ندورهم وننادي لكن لاحس ولاخبر .. لحد ماامي الله الهمها وفتحت باب الشارع واول شيء عيني تطيح عليه بنتي اللي عمرها سنه ونص واقفه في (((نص السكه))) والبيت تقريبا على شارع عاااااااااااام واضرب بعيني الا الاقي سياره جايا من اول الشارع حسيت الدنيا تلف وتدور بيا واجري زي المجنونه واطلع الشارع بشعري وملابسي واجري على بنتي وانتعها من وسط السكه والله لطف ولا كنا راح نروح فيها انا وبنتي مع بعض بس الحمدلله الف مره الحمدلله اللي لطف بينا ورحمنا في ذيك اللحظه كنت في لحظه راح افقد اغلى ماأملك افقد بنتي حبيبة قلبي والسبب ايش؟؟ اهمالي وإتكالي على الشغاله اللي دخلت البيت وتركتهم لوحدهم في الحوش .. والله اتعلمت درس مهما كان اي احد في الدنيا يحب اطفالي ويهتم بيهم ماراح يكون زيي ولا راح يخاف عليهم زي خوفي عليهم..
ياعالم والله دول امااااااااااااااااااانه في اعناقنا مالهم لاحول ولاقوة معتمدين علينا اعتماد كامل اي اهمال مننا يعرض حياتهم البريئه للخطر..الله يسعدكم لاتحرموهم الاهتمام والحب والرعايه حتى لو كنتو مشغولين باي حاجه تانيه هما اهم من اي شيء والله الشغالات يخوفو ومالهم امان ابدا ابدا..
وفي النهايه مااقول غير الله يطمن قلوبنا على ابنائنا وبناتنا ويحفظهم ويجعلهم قرة عين لنا وينبتهم النبات الحسن امييين يارب العالمين..

سامحوووووووووووني طولت عليكم..