موت الغوالي يهدّ الحيل , لكن صبرنا أقوى .. !! بكاءها جرح قلبي .. !!

..

السلام عليكم و رحمة الله و بركاته

صحيح إننا في بعض الأحيان نحس إن الكون ضيِّق في صدورنا ..
ما نحس بـ قيمة الحياة , و لا نشعر أبداً بـ ببهجتها و زينتها ..
تجينا أيام نسمع خبر مفجع في غوالينا , ناس ماتوا في حوادث و ناس ماتوا فجأة ..
و ناس و ناس و ناس , تعدَّدت الأسباب و الموت واحد ..
..
دام قلوبنا حيَّة , و فيها إحساس و مشاعر , أكـيد راح يستعمرها الحزن و الألم ..
على فقد ناس عزيزين , بعد ما عشنا معهم أيام حلوة , ضمَّتهم قبور الأرض ..
ما من لوم أبداً على حزن أي شخص و بكاءه في فقد غالي ..
ولا راح نحس بـ مدى عمق ألمه إلاَّ إن تعايشنا في الحقيقة ما قد عاشه ..

الحمد لله على كل حال , كنت أقول أول إني صبورة و لله الحمد ..
و لو مات لي أي شخص ما راح أجزع , لأني كنت مؤمنة بـ الله ..
و حاطة في بالي , إن هذه مو نهايته , هو راح للي أرحم من أمه و أرحم من الكون كله ..
راح للرحمن الرحيم سبحانه ..

كنت و لله الحمد , ما أبكي بـ سهولة , صعب جداً جداً أبكي قدام أحـد ..
و لأني أكره هذا الشيء من صغري , صرت أحبس دموعي كثير و لا أخرجها ..
إلاَّ بعد ما كبرت , و حسيت صح بالدنيا , و بمسؤولياتها و همومها ..
و بعد ما فقدت غالين كثير , صارت دمعتي تنزل .. صار قلبي ليِّن كثير ..
الحمد لله هو ليِّن من فضل ربي , بس صار ليِّن و هيِّن أكثر و أكثر ..

كنت إذا جلست قدام التلفزيون مع أهلي و شفنا مشهد مؤثر ..
في أخبار أو شي ..
ما أبكي أبداً , صدق أحزن , بس مو لـ درجة تنزل دموعـي ..
إلاَّ بعد ما كبرت , و فقدت غالين كثير ..
أحس بعضهم فتحوا في قلبي جروح كثيرة ..
كان غيابهم جداً جداً كبيـر في قلبي ..
خاصَّةً كل ما أذكر الماضي لأني أحبه حيل ..
صارت دموعـي تنزل بـ سهولة ..
و لو سمحت لها و ما حبستها , كان ما وقَّفت أبد ..
..
مو عيب إننا نبكي , ولا عيب تنزل دموعنا قدَّام أحد ..
بس لأني تعوَّدت من صغري أكتم و لا أبكي بـ سهولة , أحس قلبي قسى ..
بس و الله إن فقد الغالين ( مفجع جداً )..

تخيلي يوم تصحي من النوم , و الحمد لله مروِّقة و في أمن و أمان من فضل ربي ..
تشوفي أمك تبكي .. و البيت حزين .. و تسمعي إن ( فلان مات ).. !!
فجأة كذا يجيك هـ الخبر , أمس ما كان فيه شي ..
إلاَّ أمس كان عندكم في البيت , و سافر .. جاكم زيارة من ديرتكم ..
و يوم رجع ( يومين و مات ).. !!

بـ الله مو قـوية شـوي .. ؟! فجأة ( فلان مات ).. !! بـ حادث سيارة ..
لو كنتوا معـي في ذاك اليوم , ما بتصدقون قد ايش انصدمت ..
قلت في نفسي : لا , يمكن مو هو .. لالا يمكن أحمد ثاني .. مو أحمد ولد فلان ..
أحاول أكذب على نفسي .. ما أبي أصدِّق الخبر .. و الله ما فيني أصدِّقه ..
شـوي إلاَّ أتأكَّد إن أحمد هذا ولد فلان اللي حاولت أكذب على نفسي إنه مو هو ..
أنا تو صحيت .. و فجأة أسمع خبر مثل هذا ..
و الله لو مو عارفة ربي و صابرة .. كان انفجرت .. بس ربي قوَّانـي ..
و الله ما أعرفه أبداً , و لا عمري عرفته .. ما أذكر إلاَّ اسمه و أنا صغيرة ..
هو أصغر مني بـ سنة ..
بس ما أدري ليه هو بالذات صدمنـي خبر موته ..
مسكت نفسي و مسكت و مسكت .. بس خلاص .. ما أقدر ..
من يوم كلمني أخوي في التليفون خلاص ..
كرهت الجوالات و كرهت التليفونات ..
و لا عاد أبي أسمعهم أبداً ..
سكت و أنا كاتمة عبرتي , و لو تكلمت بـ انفجر ..
ضغطت على نفسي و كلمته كلمتين و قفلت
و طرت بعدها للحمام تسبَّحت على راسي و طلعت اللي بقلبي كله ..
أول مرة يبقـى معي حزن وفاة شخص إلى الآن ..
ما أدري ليه هذا الولد بالذات كل يوم أذكره ..
أحس موتهم ذبحنـي كثير .. خصوصاً إني أذكر أيامي الحلوة معهم زمان ..

بس ما بقيت للحزن يا الغاليات , صدق كل ما أذكرهم تدمع عيوني ..
و أتمنـى أطلِّع اللي بقلبي كله و أرتاح , بس ما استسلمت للحزن و يأست ..
عرفت إنهم الحين في حاجتي أكثر من أول ..
ما يبون دموع و بكا و ألم و ذكريات ..
يبون صدقة دعاء .. هذا اللي بيفيدهم .. ما راح تفيدهم دموعنا بـ شي ..
كل من مات لها غالي , خل تثبت له حبَّها بـ دعائها و صدقاتها ..
تصدَّقي عنه كثير , لو عندك مكافأة راتب مصروف , تبرَّعي بـ أي مبلغ تبين ..
عندك مكافأة : تبرَّعي بـ مبلغ بسيط عنهم في كل شهر تستلمين المكافأة فيه ..
عندك راتب : في كل شهر تبرَّعي بـ مبلغ بسيط عنهم ..
و الله ما بتخسرين شي .. و ربـي ما راح ينقص منِّك شي ..
..(( ما نقص مالٌ من صدقة )).. !!
..
لا تصير حياتك كلها حزن و تفكير فيما مضى ..
ترى كلنا راح نلحقهم .. محد بيبقـى في الدنيا .. كلنا بـ تضمِّنا قبور الأرض ..
ولا راح تفيدنا كل هـ الذكريات , ما راح يفيدنا سوى العمل الصالح ..
..
أدري إن الحزن عميـق في كل قلب ذاق مرارة رحيل الغالين ..
بس ليت هـ القلوب ما تنسى إنها ممكن تتلاقى فيه في الجنة .. !!
تعمل أعمال صالحة و طيبة , و تدعي للميت بالرحمة و المغفرة ..
و تتصدق عن نفسها و عنه .. و ما أظن راح تخسر شي أبداً ..
بالعكس .. !!
إن ضيَّعت عمرها في البكاء و النحيب راح تخسر صحتها
و تخسر الأجر اللي ممكن يوصل للميت عن طريقها ..
لا نقطع حبل الوصال بيننا بـ النسيان و البكاء بدون عمل صالح ينفعه في قبره
و الله كل ما أذكرهم و أذكر كل ميت , يعوِّرني قلبي ..
أتمنـى فعلاً لو كان عندي راتب , و أقدر أسوي اللي قلت لكم عنه ..
الحمد لله يوم ربِّي أكرمني و دخلت الجامعة و استلم مكافأة ..
لو أقولكم عن الخير اللي لقيته بعد ما تصدَّقت و لله الحمد و هذا من فضل ربي
ما راح تصدقون , بس أنا خليته بيني و بين ربي .. ما أحب أذكره لأحد ..

بس اللي صار لي , خلاَّنـي جد أتصدَّق بدال المرة ألف ..
مع إنـي تمنَّيت أخسر فلوسي .. عشان أحس بـ قيمة الصدقة ..
بس رب العالمين عوَّضني بـدال اللي دفعته دبل ..
لأنه ..(( ما نقص مال من صدقة )).. و الله لقيت خير كثيـــــــــر من ربي ..
و ياليت تبادرون فعلاً بالصدقة لـ وجه الله فقط , و الله ثم و الله ما راح تخسرون شي ..
لو خليتوها لـ وجه الله ما راح تندمون أبداً , لا تتبرعون للتجربة فقط ..
لا , تبرَّعوا لـ وجه الله أولاً ثم لأجل أن يوصل الأجر للميت ..
..
هذا الشي اللي راح يفيدهم , فعلاً راح يفيدهم و دعائك راح يسعدهم ..
و بكاءك بـ يعذِّبهم ..
أدري الحزن كبيـر , و أنا حاسَّة بـ ذا الشي ..
بس صبرنا أقـوى من كل شي , كلنا أقوياء بـ الله ..
كل ما أذكر الجنة , أذكر إن هناك راح ألقاهم بإذن الله ..
من حسن ظنِّي بـ الله سبحانه و تعالى ..
اعملي اللي عليك , و بادري بإسعاد الموتـى – رحمهم الله – ..
لا تنسيهم و تتركيهم ..
و الله في أغلب أيامي , لا جلست ساكتة يروح فكري لهم ..
أشوفهم تحت الأرض .. يتمنون منَّا لو دعوة صادقة من قلب صادق ..
و الله يعوِّرني قلبي , و أدعيلهم .. ولا أنساهم ..
أتضايق يوم أشوف الناس لاهية و تضحك و تلعب
و ما همَّها هـ اللي تحت الأرض ..
و اللي مات لهم صديق أو أخو , يومين و ينسونه .. !!
و ربي ينذبح قلبي ..

ما أقول ابقوا في الحزن و التعب , لا .. بس ما ودي يضيع عمركم بدون فايدة ..
العبوا صحيح و استانسوا بس أعطوا الميتين ما يتمنون ..
بكرة راح نلحقهم , و نصير في مكانهم ..
و نتمنَّى لو أحد يدعي لنا و يتصدَّق عنَّا ..
و ما نلقـى شي .. !!

عرفتوا ليه أقولكم , اذكروهم .. ؟!

..
أمس , كنت في الجامعة ..
بعد ما صلَّيت الظهر .. اسمع وحدة تبـكي .. بس بكاءها غريب ..
قلت : اش هذا .. ( ما ميَّزت الصوت صح )..
شوي إلاَّ ترجع تبكي : قلت شكلها تستهبل , ( لأن بكاءها غريب )..
شوي إلاَّ زاد بكاءها مرة .. و صوتها عالي .. الكل سمعه ..
قلت : أكيد فيه شي ..
خويتي كانت جنبي .. قمنا نشوف كان المصلَّى بدون سقف , في الدور الثاني ..
جنبه سور يطلّ على اللوكرات و البوابة الخارجية .. أناظر إلاَّ البنت تبكي بقوة ..
و تصارخ : ما كان فيها شي , ما كان فيها شي ..
و الله اكسرت خاطري بـ قوة , مع إن اللي يسمع بكاءها يقول تستهبل ..
بس لأنه كان من حرقة قلب .. و حسيت فيها صح ..
هي كانت تكلِّم بالجوال , فجأة صارخت .. و بكت .. و ضمَّت صديقتها ..
و هي تبكي من قلب و تصارخ بـ قوة : ما كان فيها شي ..
عرفت إن الخبر اللي سمعته شكله كان قـوي , أثَّر عليها لـ درجة ما عاد تقدر تصيح ..
ماسكة فكَّها السفلي بيديها الثنتين ..
و جالسة على كرسي دوَّار سحبوها الأمن لـ برَّة ..
و الله موقفها جرح قلبي كثيــر كثيــر كثيــر .. بس كتمت ولا قلت شي ..
خويتي تقول : مالها داعي كل ذا البكا ..
قلت : لا و الله حرام , ما تدرين اش فيها ..
لأني فعلاً حسيت فيها .. و راح أحس و الله ..

يوم قلت لأمي الموقف بعد ما رجعت من الكلية ..
جلست بـ جنبها و قلت لها أحسها حزنت..
و قالت : يا عمري عليها .. أكيد أحد مات يا أمها يا صديقتها ..
( كلمة ما كان فيها شي و الله ذبحتني )..
و قعدت في بالي للحين , أحس صوتها لسَّى بإذني ..
ندمت إني قلت لأمي حسيتها تضايقت كثير ..
خصوصاً إننا فقدنا كثيــــر من قرايبنا ..
بس لأني حسيت نفسي متضايقة و أبي أشكي ..
يكفي دعاء أمي لها .. الله يصبِّرها و يعينها ..
موقفها جرحني لأني عشت اللي عاشته ..
يوم سمعت خبر وفاة قريبي اللي قلت لكم عنه ..
انصدمت لأنه ( ما كان فيه شي )..
بس الحوادث و السيارات أخذت منَّا ناس كثيييير ..
صدق ننجرح و ننصدم و نتألَّم , بس صبرنا أقـوى ..
لا نستسلم للحزن و البكاء و ما نستغل أوقاتنا بـ شي ينفعهم .. !!
هم اش يبون غير دعواتنا , و الله بكاءنا ما راح يفيدهم بـ شي ..
صدق آثار الحزن تبقـى في القلب , بس القـوي اللي يصبر و يستغل وقته بما ينفعهم ..
و ينفعه هو بعد ..
..
صبرنا أقـوى , لو آمنَّا بـ الله حق الإيمان ..
ليه تقولون خلاص راح و ما عاد بـ شوفه , وين روح الإيمان بـ الله فينا .. !!
وين حسن الظن , قولوا الله يجمعنا فيه بالجنة .. !!
هو راح للي أرحم من الناس أجمعين .. راح لأرحم الراحمين ..
راح لـ رب العالمين ..
و ربي إن البشر كلهم ما فيهم من الرحمة أكثر .. مما عند الله سبحانه و تعالى ..
فقدناهم هنا صحيح في الدنيا , بس في الآخرة لو عملنا العمل الصالح راح نلقاهم بإذن الله ..
ليه ما نحرص على العمل الصالح .. و نرضي ربنا , و نتصدَّق و ندعي لموتانا .. !!
ما تبون تشوفهم , مثل ما فقدتوهم بـ الله .. ؟!
<< هذا الشي اللي يهدِّي بالي , و يطمِّني , لأني مشتاقة لـ رب العالمين ..
و من حسن ظني فيه , و من رحمته , أرتجي شوفته .. – عزَّ و جل – ..

و الله إني مثلكم لا فقدت شخص غالي أبـكي عليه و أحزن ..
و هذه طبيعة البشر كلهم .. و قلب المؤمن هيِّن ليِّن ..
بس خلونا نستغل أوقاتنا بالدعاء لهم و الصدقة عنهم .. حرام ننساهم و نتركهم ..
أو ما نتبرَّع إلاَّ بـ كم فلس ثم ننساهم .. و نلهى بـ ذا الدنيا ..
مصيرنا راح نصير إلى ما صاروا إليه ..

خلونا نجمع لنا كم حسنة , قبل لا نندفن , و نندم على ما فات ..

الصبر و لا غير الصبر حتَّى لو طعمه مر .. بيعود عليك بالفرج من العزيز المقتدر ..

أختكم : خلود بنت محمد

..(( حسيت بـ راحة كبيرة بعد ما كتبت الموضوع و نسخته من المفكرة , عشان كذا ما زدت حكي ))..

أسأل الله أن يكتب له القبول
و أن يجمعنا و إياكم في جنَّات النعيم