من بعد خمس سنين حب فجأه تغير علي و يبي يتزوج :( مدري شأسوي !!!!!!!!!!!!!!!!!!!!!!!!!!

السلام عليكم و رحمة الله و بركاته
شلونكم فراشاتي؟
انا من زمان معاكم بالمنتدى لكن كتاباتي قليله بالفتره اللي طافت … بأقولكم قصتي من الاول للي ما تعرفني
تزوجت من خمس سنين ….. زوجي ما يقرب لي … امه و امي كانوا معرفه
كان يمووووووووووت علي …
طبعا تأخر الحمل …. مني و منه … انا فينيهرمون حليب مرتفع و ضعف في التويض … لكني اخذ حبوب للحليب و المنشطات مرات اخذها و مرات اريح
هو فيه قلت عدد حيوانات و تشوهات فيها
المهم انه الاول كان يقول لي حتى لو الله ما رزقنا عيال ما يهمني … المهم انتي معاي
و كان ما يخليني و اذا نزلت الدوره يقول لا تزعلين …. بعدين نعالج و الله يرزقنا
و لما ابكي يبكي معاي
و اذكر مره قلت الله مو كاتب لنا عيال و يمكن معناه انه نصيبنا مو مع بعض ولازم نفترق
قام يبجي و يطق راسه بالطوفه و يترجاني ما عاد اقول هالكلام …
الكل كان ملاحظ حبه لي …. حتى اهلي و جيراننا
و كانوا يقولون شلون تخلينه يحبج حيل جذي ّ!!
كانت اي فلوس معاه زياده يقول لي روحي اشتري ذهب !! تخيلوا !!
المهم …
بالفتره الاخيره كان يحب يحرق دمي و يبيني اغير عليه … يقول لي : ليش الحرمه ما تحب زوجها يتزوج عليها؟ و من هالكلام
كان يقولها بضحك …
لكن مره … قالها و ضحكت و لفيت للتلفزيون …
قال: ترضين تكونين زوجه اولى؟
قلت انت من صجك؟
قال ايه … و بين انه من صج مو ضحك نفس كل مره
كنت جايه تعبانه من الدوام …
قلت مالي خلق لضحكك الحين …
قال انا ما اضحك .. اذا ترضين اتزوج عليج … أبي اتزوج
قلت: و ان ما رضيت؟
قال ما راح اتزوج
قلت يعني ودك تتزوج؟ ليشظ انا قصرت معاك؟
قال لا .. انا احبج و انتي مو مقصره بس ودي اتزوج
قلت ليش؟
قال بس جذي !!!
يعني شنو بس جذي؟
قال بس ودي اتزوج
والله كلامه صدمني … عمري ما كنت اتوقع يطلع منه هالكلام
احترق دمي و انهرت لكن الحمدلله ما بكيت ولا بينت له ….
قلت ايه موافقه انك تتزوج … بس بشرط واحد
قال: شنو؟
قلت : تطلقني الاول
قال : لا ,, ابيج عندي
قلت مستحيل اقعد معاك …
قال خلاص سكري الموضوع
المهم … راح و خلاني و قمت ابكي بروحي
و افكر شلون هان عليه يطلع هالكلام منه
يعني انا ناقصني هموم عشان هو يزيدني؟
و بعدها سويت له العشا و ما بينت له ضيقتي
ثاني يوم طلعت من الدوام على بيت اهلي … دزيت له مسج انا في بيت اهلي .. جدامك يومين .. فكر فيهم و اعرف انت تبيني ولا لا
اتصل علي .. ما رديت بالاول
بس بعدين رديت
قال شلون تقولين جذي؟ انتي تدرين اني احبج
قلت بعد الكلام اللي امس ما صرت اعرف اي شي … فكر و رد علي
قال من غير ما افكر .. انا ابيج انا احبج
و تأسف عن الكلام اللي قاله
و قال ارجعي البيت
قلت راح ارجع باجر …
قعدت في بيتنا … ما علمت احد بالسالفه الا اختي و بنت خالتي .. انصدموا من كلامه
تخيلوا !! قاعده زعلانه في بيت اهلي و امي ما تدري !!
لاني لو قلت لامي الموضوع راح يكبر … و قلت دام انه اعتذر خلاص يا بنت لا تكبرين السالفه و انسي
لكني والله العظيم ليومكم هذا مو قادره انسى
تخيلوا انه قبلها كان طالب مني اشتري له سياره من معاشي … بس لما قال هالسالفه و تزاعلنا ما فتح الموضوع مره ثانيه
أحس اني كرهته …
مو هو الانسان اللي تزوجته و حبيته
راح تقولون ليش قاعده معاه !!
أقولكم بأعطي حياتي معاه فرصه صغيره ….
ان ما الله رزقنا …. راح انفصل عنه
و الفرصه هذي ما راح تطول
لكنه هو ما يعرف بالكلام هذا
من يومين شفته في شات مع بنت .. و هي تتكلم بصوت ناعم و دلع … قلت ليش تكلمها؟
قال انا راعي الروم
قلت اطلع منه
قال لا ما اقدر
قلت ترضى اني اتكلم بالشات؟ او بالتلفون مع ولد؟
قال لا
قلت خلاص اطلع
تضايق و اخذ اللاب توب للغرفه الثانيه …
صرنا على طول انا بغرفه و هو بغرفه .. ما اشوفه الا وقت النوم …. و الاكل …
ياما كلمته و قلت انت متغير علي … عدل نفسك على شاني .. و كتبت له اشعار كثيره افهمه
لكنه مو راضي يفهمني
انا زهقت من حياتي
طول اليوم قاعده بروحي عند التلفزيون و الكمبيوتر ..
و ان طلعت اسمع الكلام الجارح و الاسئله السخيفه عن الحمل
بعض المرات اقول حتى لو تطلقت … راح اعيش بروحي 🙁 الاحسن اكون زوجه اوله
لكن ارجع اقول ما راح اتحمل … انا اعرف نفسي
الله يستر
الله يهديه … و الله يرزقنا
والله مدري شأسوي …
نسيت اقولكم انه اهله ما يحبوني و ما يطيقوني … رغم اني ما سويت لهم شي .. بس من الغيره …
رغم انه هم اللي مزوجينا لبعض