عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بحكم علاقاتي الاجتماعية وتنقلاتي المستمرة ❗ …حبيت انقل لكم بعض الحالات الي شفتها من جاراتي و معارفي!
واكثر مايعجبني باي قصة يرويها شخص امامي انه يكون هو من عايش القصة بنفسه حتى لايكون هناك مجال لجعلها من ضروب الخيال او اللاتصديق
::::::
تحكي عن ……….. الزوجة …….والخادمة………….. 😆 بحكم ان الخادمة ومصايبها هي حديث الساحة الان !
:::::::::::::
معلمة…زوجها فصل من عمله وجلس بالبيت..عندها خدامة اندونيسية عمرها 25 سنة جميلة بيضاء البشرة جدا..مخطوبة جاية تجمع مهرها عشان تتزوج خطيبها!
المعلمة عندها 3 اطفال تحت سن المدرسة…تروح لمدرستها وتترك الاطفال عند الخادمة والزوج بالبيت طبعا!..
بصراحة جارتي طيوبة واكبر من سنها..واتقول تعبت في زوجي مايبي يدور لنفسه وظيفة وعاجبه اني اصرف عليه
زوجها فتوة ماشاء الله وداخل كمال اجسام بالعصرية ! غير ملتزم مايصلي جماعة بالمسجد
كانت اتقولي ان اهلها طهروها وهي صغيرة 
وماتتفاعل مع زوجها وزعلان منها بهالشي جدا!!
وعايشين حياتهم بهدوء….
واحكموا بانفسكم!
::::::::::::
زوجة اخرى جاتها وظيفة في قرية تبعد 200 كيلو عن سكنها .. قررت اتروح تسكن 5 ايام بالقرية وتجي خميس وجمعه فقط…رفضت تاخذ اطفالها …لان اثنين منهم مدرسة خاصة..واثنين اطفال ماتبي تبلش فيهم بالقرية!
..!!
الزوج غير ملتزم ومدخن … والام تحب تحط سماعات في السيارة وتسمع اغاني بالذات لفيروز ومحمد عبده :(طول الطريق للقرية … ويالله صباح خير
عادي مشت حياتهم…ونقلت الزوجة لمنطقتها بعد سنتين او 3 !!!
واحكموا بانفسكم……..!!
::::::::::::
زوجة اخرى عكس ماسبق!
معلمة انجليزي …جابت لزوجها كل شي بغرفة نومه..تلفزيون كمبيوتر بلي ستيشن حتى الاكل بغرفة النوم!!
كله عشان يترك للشغالة الفلبينية البيت …!!…تهتم باطفالها وتنتبه لهم وماتكون تحت نظر الزوج!
الخدامة الفلبينية …جايبتها بمواصفات خاصة..جامعية 👿 ومعها دورات تربية اطفال…ممنوع تتكلم بالبيت غير الانجليش…
اضطرت المعلمة تاخذ دورة كمبيوتر العصر…وجات للمركز الي كنت ادرب فيه
وكانت كل شوي تنظر من نافذة المركز على سيارة زوجها!
اتقول ينتظرني لين اخلص مايروح البيت ابدا! يقول البيت ماهو زين بدونك!!>>>تبغاني اصدقها
!
الغيرة واصله حدها ومانعته يتحرك من قدام المركز الى ان تخلص الساعتين تدريب وتطلع ..وهو مطيع ماشاء الله!>>>طيب ياخي روح لاصحابك او لكوفي ادخل مركز زيها!
اتقول مرة دخلت عليه بغرفة النوم لقيته يتفرج على حليمة بولند ولما شافني جاية غيّر على القناة الرياضية بس انا كشفته!!..وهزأته …واعتذر!! 😳
الزوج عسكري يعني المفروض مايكون بهالشخصية الضعيفة!!..والزوجة اقل من عادية بشكلها وهيئتها…!
ويامثبت العقول ….
::::::::::
واحده …. كانت وقت نوم شغالتها تخليها اتروح لدورة المياه وتمنعها تشرب موية كثيرة…لانها راح تصك عليها من الليل الى الفجر بالغرفة…
والسبب على قولتها…الانسان وهو نايم ضعيف وانا اخاف تسوي لي شي انا و اولادي و زوجي!!!
وماشية حياتها …. وخدامة ورى خدامه ماشاء الله مافيهم واحده اعترضت..ولاحتى الزوج زعل من تصرفها او قال انتي مخونتني او من هالقبيل!!
::::::::::::::::
واحده تكره الشغالات بقوة وعندها 5ابناء …وبيتها دورين وزوجها يترجاها يجيب شغالة تريحها وترفض رفض قاطع ونهائي…وحملت بالسادس ولما قربت ولادتها فاجأها بشغاله داخله عليها…قدم لها من المكتب …هدية لولادتها!!
اعلنت الاضراب وزعلت عليه وارسلها لامه…ومارتاحت الزوجة لين سفرها قبل انتهاء مدتها رغم انها عند امه ماهي عندها لكن سوت المستحيل عشان يسفرها..و زوجها ملتزم…وملتحي…وطول رمضان معتكف بمكة!
على فكرة الان معها 7 اطفال!
واترك لكم الحكم!
:::::::::::::
تعليق بسيط :
انا بصراحه اتامل…الاحوال …والشخصيات…واقول سبحان الله…كيف البعض عايش وسط المصيبة وراضي!!…والبعض ماعنده مصيبة ولايحزنون …. وقلقان…..ومتخوف!
ولاتفهموني غلط لما اقول غير ملتزم ومدخن…معناه اقرب للحرام!!..واولى اتغار الزوجة وتحذر…لا.. استغفر الله…بعضهم حتى لو ما كان ملتحي ولا يدوام عالمسجد لكن عنده عفة ونزاهه ويكره الكبائر.. حبيت فقط اشرح لكم حالة الزوج والزوجة لتعيشوا معي الوضع بالضبط!
::::::::
المايك لكم
