مليت, تعذيب, وانا منك, مليت..

أوفيت في تجريـح قلبـي وكفيـت
………… قلبٍ يحبك وأصبح اليـوم مطعـون
حبيت غيري وعن هوانـا تخليـت
………… وأول حلفت وقلت والله مـا أخـون
الله أكبـر يـا حبيبـي تناسـيـت
………… حبٍ جمعنا وأغلب النـاس يـدرون
أول خفوقـي بالمحبـة لكـم بيـت
………… واليوم بأشباح الحزن صار مسكـون
كم مرةٍ فـي تالـي الليـل ونيـت
………… وكن الحشا في داخله جرح طاعـون
ومن حر مابي ياابن الأجواد هليـت
………….. دمعي وقبلك داخل العيـن مسجـون
ولا شفت عذالي تضاحكـت بلفيـت
…………… إني سعيد وداخلـي حـزن مكنـون
أول تبادلنـي الغـلا مـا تغلـيـت
…………….واليوم عندك يرخص الحب ويهـون
مدري زعل يا صاحبي يومك أبطيت
……………عن صاحبٍ يحفظ محبتك ويصـون
أبشر خفوقي قـد نساكـم ولا قيـت
………….. شخصٍ وفيٍ صادق الحب مزيـون
مليت تعذيبـك وأنـا منـك مليـت
…………..وشلون أسامح جارح القلب وشلـون
من عقب ماني قي غيابـك تهنيـت
………….. تبغاني أرجع للحزن أنـت مجنـون
وين أنت ؟؟يوم أني نخيتك وناديـت
………….. توَه طلع لك سمع وأحساس وعيـون
تدري به أمرٍ واحـدٍ منـك حبيـت
…………..ويمكن عشانه صرت لك حيل ممنون
إني ” بـالـشـقــاوي “عقبك تسميـت
…………. وأصبحت أكتب شعر والناس يقرون
ودي تسافر قبل مااقضي من البيـت
…………. ومن قبل أختم القاف بالواو والنـون