عالم البنات النسائي كل ما يخص المرأة العربية من ازياء وجمال والحياة الزوجية والمطبخ
انتشرت في الاونه الاخيره ظاهرة يسوونها الحريم اذا ولدوا وهي اطقم الاستقبال تروح الوحده تفصل طقم من 3000 ريال الى حدود 12000 ريال كل وحده حسب الي تقدر تدبره
بصراحه هذا الشي اشوف ماله داعي بالله وش تستفيد الوالده اذا سوت الي مايتسوى وجاكرت حريم خلق الله وجاها عين هي وطفلها وضلت طول عمرها تتعالج ولا تبي تقول شووفوني وش مسويه وعندي فلوس ياشيخه معاك هالالوف كلها تصدقي منها ربي يحفظ لك طفلك وعافيتك ولا خذي بها مقاضي للطفل 5 سنوات قدام ولا خبيها لزمنك الاسود ماحد يسلم من الفقر واللي قاعدين نشوفه اكبر دليل صارت بعض العوائل ماتلاقي قوت يومها يعني كفايه الوحده تجيب مفرش مرتب وخلاص بحيث ماتتعدى قيمته 500 ريال ومافيه داعي تطقمين انتي والبيبي وربي احسها قمة السفاهه ليش جزمتك هو تطقمينه مع لبسك
انا ولدت مرتين ماسويت الزحمه الي اكثركم مسوينها والحمد لله والله لو عندي مال قارون ماافكر اسويها ابد قال اشتري طقم بالمبلغ الفلاني انام فوقه شهر واحطه في الدولاب ولا بعضهم الله يهديهم تجي تستعرض به في المنتديات فعلا والله ناس سطحيه اتمنى تتلاشى ظاهرة المجاكره في كل شي في النفاس ولالاعراس والتجمعات والعزايم وغيره صارت الدعوه استعراض مو تواصل الله يكفينا من آخر الزمان ولا يؤاخذنا بما فعل السفهاء منا
