معلمة وماقدرت اشرح درسي !!!

العمر : 28 سنة ..

متزوجة ولي ثلاثة اطفال ..

الحالة الدينية : متوسطة الالتزام ..

المهنة : معلمة صفوف اولية من تسع سنوات تقريبا ..

وقت الحلم : الصباح بعد الساعة تسعة .. اليوم الجمعة ..

نمت والحمد لله مافيه اي شيء لا متعكرة ولا متضايقة بس شوي بيني وبين زوجي شوية مشاكل انتهت

بالنسبة له ورغم اني سامحته بس لسا احس اني متضايقة وكارهة نفسي .. وما انام الا وافكر بالسالفة ..

الحلم :

حلمت اني بروح اعطي دروسي لكن الفصل هذا اول مرة ادخله ورغم ان مادتي معرووفة الا اني كنت بشرح شوي

الا ودخلوا علي ثلاث موجهات يبون يحضرون لي الدرس .. انا جلست اناظرهم .. وهم كل وحدة فيهم اخذت مكانها

وفتحت دفترها وقاعدة تطالعني هم ما تكلمووا بس انا حاسة كانهم يقولون لي بسرعة ابدي درسك

رحت للسبورة لقيت العنوان والتاريخ مكتوبين .. وطبعي اناي اكتب العنوان وكل شيء ع السبورة بالاستنتاج

من الطالبات ..استغربت وفجأة نسيت الدرس اللي ابي ادرسهم اياهـ .. ورحت اطالع كتاب وحدة من البنات

وكانوا حتى الطالبات غريبين علي ما اعرفهم … اخذت الكتاب من طاولة البنت الا وهو كتاب علوم ومادتي انا

كتاب رياضيات وللعلم انا لي اكثر من تسع سنوات ادرس رياضيات اول وثاني وثالث ..

جلست اطالع وافكر شلون بشرح علوم وانا مادتي رياضيات ..؟؟

الا وزميلتي مدرسة العلوم جالسة وكنها مع الطالبات ونزلت لها راسي شوي وقلت شلون اشرح علوم ؟

قالت بسرعة تراهم قاعدين ينتظرونك .. وقفت محتارة شلون بشرح .. وقولي يمكن طار نص الحصة

الا شوي وقامت موجهتين واخذوا اغراضهم وقالوا بيمشون ومن نظراتهم حسيت انهم كانوا حاقدين علي ليه

اني ما شرحت .. وانا بيني وبين نفسي رافضة فكرة شرح العلوم ..

وبقت موجهه وحدة جالسة تنتظر شرح الدرس .. وشوي طلعت من الفصل وانا مرتبكة وقلت اني بروح دورة المياه

وطلعت وغسلت وجهي وحسيت اني تعبت ومو قادرة اشرح او حتى اسوي شي ..

وبعد كذا بدت خربطة ومدري احلام بدت ورى بعض يعني اشياء لا تذكر كلها اضغاث احلام ..

انا بديت اشك في نفسي .. صدق مريت الاسبوع اللي فات واللي قبله بظروف قوية جدا وكانت مديرتي متحملتني

ماقصرت .. بس انا بيني وبين نفسي وقلت هالكلام لزميلاتي اني مقصرة مع البنات من ناحيت شرحي وتفاعلي

مو مثل اول ..

وللعلم من فضل ربي انا معلمة قديرة ولو عطوني انقليش والله لاشرحه شرح احسن مايكون لاني والله مو مدح

معلمة شاطرة .. واذا كُلفت بأي عمل اقوم فيه . ورُشحت للأشراف لكني رفضته ..

بس من قمت خفت من هالحلم حسيت انه مدري شي يقلق ..

رجاءا فسري لي هالحلم ولك مني دعوة ان يوفقك الله ويرزقك من حيث لا يحتسب ..