عالم البنات النسائي كل ما يخص المرأة العربية من ازياء وجمال والحياة الزوجية والمطبخ
انا عندي مشكله تخص اخويا ومرته والله كفايه عليا هم غربتي كمان طلعلي هو بمشكلته
اخويا متزوج من اربع سنين تقريبا وعنده ولد وبنت كان متعرف على زوجته والكل كان رافض انو يتزوجها وجلس بمشاكل مع اهلي سنتين وبالاخر ابويا زوجه عشان يفتك منه وهو ساكن مع اهلي بنفس العماره وفتره الملكه كانت تقريبا سنه ونص يعني خلاص عرف البنت وعرف طبعها وهيا نفس الشي اللي صار انهم بعد الزواج وبعد ماجابت البنت اتغيروا على بعض راح الحب وكل شي سقطت الاقنعه كل واحد يشتكي من الثاني اخويا يقول ماتسمع كلامه وكلامها كله تافه بس تبغى صحباتها واهلها وتبغى تخرج تتمشى كل يوم وماتطبخله ومن ده الكلام وهيا تقول انو مايحترمها ويصرف فلوسه بكل مكان ومايروح يداوم بعمله يعني الاثنين مو مقصرين على بعض شكاوي واخرتها يقول انها ماتخليه )ينام معاها( المهم هيا حملت وجابت ولد وولدت قريب ولما كانت حامل اكتشفت انو اخويا اللي هوا زوجها على علاقه ببنت والله اعلم ايش طبيعه العلاقه المهم وراحت جلست ببيت اهلها لين ولدت ودحين رجعت بيتها واخويا دحين طفش اهلي الا يبغى يطلق مرته ويعطيها العيال ويروح يتزوج دي البنت اللي متعرف عليها ويتصل عليا يقولي متي نازله السعوديه عشان تخطبيلي والله اني اعصب عليه ومافي فايده مع العلم انا اصغر اخواني والله انقهر منه هوا ومرته يعني حرام الاطفال ايش ذنبهم ونفسي انصح مرته عشان تتغير وتهتم فيه بس ماني عارفه كيف خاصه اني بعيد عنهم مع انو والله الاشياء اللي بيطالب فيها تعتبر تافهه اي وحده تسويها بس مدري ليه هيا معنده ماتطيعه كل اللي يبغاه منها انها تحترمه وتلبس وتتمكيج كل يوم وتنظف البيت وتطبخله لانها للاسف ماتسوي ولاشي من ده والله اننا لما نكون عند اهلي ماندخل بيتها من الوساخه والاهمال واللي قاهرني دي البنت اللي متعرف عليها يعني ماتخاف ربها كيف ترضى تبني سعادتها على سعاده غيرها ولا خلاص الوحدة تبغى تتزوج بأي طريقه الله لايوفقها والله لو عندي رقمها غير اتصل واخليها تكره نفسها وتكره اخويا وعيلته
الله يسعدكم يا بنات والله محتاجه نصايح كيف انصح اخويا انو يهتم ببيته وكيف انصح مرته عشان تهتم ببيتها ونفسها المشكله ماهي موظفه جالسه بالبيت ومهمله عالاخر
