مشاعر / ذهول / فرحه (ولادتي) ..

جيتكم اليوم اقولكم قصه ولادتي اللي ابداماهقيت ان احداثها بتكون كذا لاني مخططه على كيفي ههههههههه > مصدقه نفسي واماااالي مرتفعه 😐
انا ولدت بتاريخ 22/8/1430
رغم انهم حددوا موعد ولادتي بـ 25 او 28
لكن الحمدلله على كل حال
طبعا السالفه ومافيها اني حسيت بالم بسيط ودوخه وكان معا افرازات قبل موعد ولادتي بـ3 ايام
ولما دخلت الحمام الله يكرمكم لقيت افرزات مخلوطه بـ دم بس لونه فاتح
المهم وتجيني ذيك الرجه والخوف وانادي امي الله يحفظها لي يارب
وفسخت الحيا وقتها من الرعب قلت لها تعالي شوفي 😛 واوريها فوطتي
وهي تقول يله بسرعه البسي واطلعي اوديك المستشفى
وانا اقول طيب
واول ماطلت وجهزت اغراضي جتني ام الركب قلت لا يمه شوي بس مابي اروح الحين
انتظروا بعد صلاة المغرب هههههههه >> مطوله
المهم قالت امي وش تحترين لين يزرق علينا هههههههههه
وتوكلت على الله ورحت وانا قلبي يصفق صفاق من شي ماادري وش بيكون !!
يعني خوفي من هول المفاجئه بس
المهم رحت للطوارئ وجا وقت الكشف اللي ماقد جربته
ويوم سوته لي الدكتوره الله لايوريكم واصرخ ياعلى صوتي وتعالوا اسمعوا صوت صياحي وانا ابكي طبعا وربي صح فيه الم بس الخوف كان له النصيب الاكبر من الخوف
خصوصا اني كنت اشد والمفروض ارخي
وامي بس سمعتني ابكي تقول للدكتوره بشويش عليها 👿
والكتوره تقول المفروض توصيها هي علينا راح تشوف من هذا كثير
وانا يضيق صدري وقالت الرحم مو مفتوح ولافي طلق هذا بس بوادر ولاده
يعني سدادة رحم فقط
وارجع للبيت اجر ذيول الخيبه وانا كت ابي اخلص وافتك من هم التفكير بالولاده ووضعها
المهم بعدها بيوم ينزل شي لزج شفاف ..!!!!!!!
واليوم اللي عقب مويه !!
واللي بعده خربت الاخلاق وصاير ينزل مويه بقوووووه
يعني تخيلوا 3 ايام المويه تنزل وانا مدري وش سالفتها اصلا ولادري انها المويه حسبته افرازات وقلت فنفسي بوادر ولاده
لو مويه كان جت دفعه وحده >> والله ياعلي تفكير بعد مدري وش يبي
وانا اللي انقز للمستشفى
وكشفوا علي بس خلاص صرت حرمه مابكيت بس صارخت ههههههههههه 😎
وكتبوا لي تنويم واللي خاطري تكددددددددر على فرحتي اني بخلص من الوجع بس ماحب الحكره فالمستشفيات لكن قدر الله وماشاء فعل
اول يوم صار كله كشف بكشف وصراخ بصراخ طبعا مو ذاك الصراخ اللي تهاويل لالالا
صراخي كان ترجي واستعطاف والم يعني اكتم الصرخه واطلع شوي منها ثم اترجا الدكتوره وهكذا
المهم ثاني يوم الرحم مانفتح وطلق مافيه وذبحوني بهالتخطيط كل كم ساعه يسوونه
ذبحووووووني فيه 🙁
اخر شي حطولي طلق صناعي تحميله
الا ويجيني الطلق
ظهري وبطني وروحي احسها تناجي رب العالمين
ومع ذلك تخيلوووووا طلق ولاانفتح الرحم >> معصب هالرحم مدري ليه حالف على نفسه
وتجيك دكتوره وتسوي لي تحريض واااااااااااااااااااااااااااااااااااااااخ بكيت سنه بساعه ماتوقعته كذا
بكاي كان حرقه بقلبي لاني كنت اتحاشى اني اصارخ وزي ماقلت صراخي مكتوم بقلبي بس ونين وعذاب الله يكتب لي ولك الاجر ولامهاتنا يارب
وتخيلوا على هالتحريض سوته مرتين لي وانفتح 2 سانتي
وتركتني اتلوى بهالطلق مدة ماتذكرها بس طويله على بالهاالرحم بيفتح
لين جا موعد الزياره
وجوا هلي
وتدخل علي وهلي عندي وتكشف بعد
وتسوي تحريض مرتين تقريبا لين صار 4 سانتي وتخيلوا هذا كله مافيه دم !!! الا في اخر تحريض
ودم كا عالقفازات بس
يعني مانزل مني دم !!
المهم الدكتوره قالت لغرفه الولادهوجرتني من عند هلي .. وامي من بعيد تقول اذكري الله ولاتصارخين .. سمي بالله ومن هالوصايا وانا اطالعها وقلبي يتقطع احس كني اودعها وعيوني معلقه فيها بس مابي اصيح 🙁
وتخيلوا فغرفه الولاده ورب البيت رجعنا للكشف والكشيف والتخطيط ولاكثر من مره روحي تعبت وقتها خلااااااااص انتهيت والرحم مو راضي يفتح اكثر
التفتت الدكتوره عالتخطيط تقولي تحسين بطلق ؟؟
قلت ايه ..
قالت كل كم ؟؟
كل 10 دقايق
قالت تحسن بحركه الجنين؟
قلت لا
> هنا بدا قلبي يرجججججججججف
قلت وش فيه؟؟
قالت احتمال عمليه قيصريه نبض الجنين يضعف ومافي حركه ابدا ونخاف يتسمم بسبب التهابات المويه اللي نزلت .. عاد تحسبوني علقت ولا قلت شي ظليت ساكته ولادمعه ولا شي
كاتمه بقلبي وادعي وادعي واستغفر ومصدومه من كل اللي يصير
جتني حاله ذهول غريبه
شوي جا الدكتور وحولي دكتورتين و4 مدري 5 ممرضات والاستشاري جا يشوف حالتي
انا بس شفت الدعوه رجاجيل واختبصت ورب البيت حست اني انساااااان ضعف لاحول ولاقوة لي
واتجهت بيني وبين نفسي لرب العالمين مالقيت احد غيره فذاك الوقت .. طلبته وانا احبس بصدري هم مايعلمه غيره
وكنت خايفه على جنيني لاني ماحملت لي 4 سنوات ونص وكملت 5 سنوات وانا حامل فيه
يالله وش كان شعووووووووووري وقتها 😛
كنت افكر بامي وزوجي !!
وكل حبايبي بدون لاعددهم
كان حزني فقلبي كبييييييييييييييييييييييييير كبيييييييييييييير
مدري ليه حسيت بحزن اكثر من الالم !!
كان حزن وفرح لاني فمرحله نهايه 9 شهور من التعب وماباقلي الا القليل مقارنه باللي راح
طبعا قرروا اني ادخل العمليات وجاني دكتور التخدير سالني تبين بنج كامل ولانصفي
طلبت كامل حاول يقنعني بالنصفي رفضضضضضضضضضت رفضا باتا
وترجيته تكفىىىى يادكتور مابي اشوف شي انا اخاف من الدم يمكن اموت لو شفت شي وووالخ
المهم قال اوك
اول مادقني الابره وحسيت بحرارتها بعروقي الله لايوريكم قسم بالله عيوني شطحت فوووووووووق بدون شعور وطقت الشهاده لدرجه الدكتور خاف
وجا يهديني يقول هذي ابره عاديه مافيه شي يالله ردت لي الروح ورجعت عيوني
حتى يوم جا يحط الكمامه قبل يحطها يقول شوفي انا بحط لك هالكمامه لاتخافين لين حطها ورحت بعدها في سبات عميق
اول ماصحوني من البنج ماعلى لساني غير كلمة برررررررررررررررررد بردااااااااااااااااااانه برد بردانه
ومعلقه عليها هالكلمتين وبس
لين لحفوني ببطانيات زياده ومع ذلك ارتججججججججف برررررررررررررررررررررد
وطول الليل ابي مويه ورافضين
وانا اغط واصحى اغط واصحى
لين جا الصبح وسالت عن ولدي قالوا فالحضانه قلت ابيه قالوا لين يجي الدكتور
وانتظر هالدكتور لين جا وقال شخبارك قلت بخير بس ابي طلبين
قال شنو
قلت ابي مويه / ابي اشوف النونو
قال عطوها مويه دافيه

قلت الولد
قال فالعنايه!!!!!!!!!!!!!!!!!!!!!!!!!!!!!!!!!!!!!!!!!! 1
انا هنا قلت وشووووووو عنايه ولاحضانه؟؟
قال عنايه مثل الحضانه لكن مشدده اكثر
هنا عرفت ان ولدي فالعنايه
بس من الصدمه مادري وش جاني مو مصدق اني صرت ام
فهالوقت ربي سخر لي ممرضه متدربه سعوديه جعل ربي يسخر لها اللي تتمناه
وقلت لها تكفيييييييين ابي صوره لولدي مو قادره امشي العنايه بعيده
بس صورته تكفييييييين
قالت لا قومي امشي انا بساعدك
وتخيلوا باقي اثار البنج فيني بس مظليت بفراشي مشيت بسرعه حاولت وحاولت عشانه
والمسافه ابد مو هينه لين اوصل لهناك
والالم مو طبيعي
والبنج براسي
وبس وصلت وشفته هنا نزلت دموعي غصب كانت دموع حاره بس دموع فرح حمدت ربي وشكرته
قالوا ارضعه بس ماقدرت مافي شعور وقتها الا اني قلت في نفسي
((( طلع من بطني ودي ارجع احطه في قلبي واقفل عليه)))
وتخيلوا رجعته وقلبي يعتصر المممممممممممممممم
لدرجه ماقدرت اكمل مشي وجابوا لي الكرسي المتحرك 😆 🙂
طبعا ماطلع ولدي من العنايه الا قبل اطلع من المستشفى بـ يوم بس كانت فرحة طلعته فرحه لاتوصففففففففف

والحمدلله الحين ولدي معاااااااي وفرحتي فرحه اي ام تشيل ضناها حتى لو تحمل مليون مره
ربي يرزق كل محرومه وتعوض كل وحده فقدت ضناها وتصلح ذريه الباقين يارب
ادعوا لولدي بالهدايه والصلاح والبر يارب اقبل دعواهم يارب

طبعا في مفارقات كثيره صارت هناك بالمستشفى
بس اعجز اذكرها لانها كثيره ولان هنا بس ابي اقول قصه ولادتي مو مذكرات دخولي المستشفى هههههههههههههه