مسقعة دايت و فراخ محشية بالملوخية من مطبخي :)

من زمان و انا بفكر اني اعمل مسقعة دايت و قلت في بالي اجربها ..و أشوف طعمها عامل ازاي ..۔ و اجرب في طاجن صغير عشان لو طلعت وحشة مخسرشي كتير …

عملتها و طلعت جميييلة ما شاء الله .۔ مفيش فرق كبير بينها و بين المسقعة العادية ..بينما البتنجان مشوي في الفرن مش مقلي .۔ و صورتها هي و الفراخ المحشة و الملوخية التمام و دول عملتهم في مرة تانية و صورتهم خطوة بخطوة ..۔ يا رب تعجبكم يا رب ➡

الأول المسقعة الدايت ….خدت البتنجان بعد مما قطعته و قشرته فردته على صينية مدهونة زيت و دهنت وشة زيت حاجة بسيطة أوي و رشيت عليه ملح.

بعد كده حطيته في الفرن و كنت مسخنه الفرن قبل كده عشان مياخدشي فيه وقت طويل ..و فضلت جنبه ..شوية و طلعته و قلبته الناحية التانية .. و و خمس دقايق و طلعته ..

دول كانوا آخر شوية معلشي عشان كان عقلي مع الصينية أول ما تطلع اشيل اللي فيها و احط تاني مصورتش ألا آخر فوج

على حسب مساحة الصينية و الطاجن بتاعي .. أنا كررت الموضوع ده مرتين تلاته تقريبا لاني عاملة طاجن .
بعد كده بأه .. رتبته في الطاجن .. لحمة مفرومة و بعدين بتنجان و بعدين لحمة مفرومة و هكذا لحد مما الكمية تخلص عااااادي جدا زي اي مسقعة مصرية اصيلة و من فوق الصلصة و التوابل ..

و باااس كده و على الفرن عدل ..

و فعلا كانت حلوووة اوي الحمد لله كان نفسي اصورها و هي طالعة من الفرن إنما معرفتش و بجد ما شاء الله اتنسفت بمعنى الكلمة 😆 idea:

بس خفيفااااا … و صحية كمان بعيدا عن الدايت يعني ..

************************************

الفراخ بأه كانت عندي في التلاجة قبلها بيوم .. و بديت احضر الحشو الأول و حشيتها رز .

دبلت بصل كتيير في شوية زيت حاجة بسيطة اوي .. و بعدين توم مفروم و كوووول التوابل اللي عندي .. ملح و فلفل و بهارات و كاري و قرفة و كله ..

قلبت تقليبتين بس و نزلت عليه بشوية رز كمية بسيييطة و قلبت تقلبتين كده .. يعني خمس دقايق بالكتير

الفرخة طبعا بعد ما غسلتها كويس بالخل و الدقيق ابتدي احشيها من جوه ..

زمان كنت بحشي ما بين الجلد و الفرخة .. عشان الفراخ كانت بتكون طازة و جاية من الفرارجي و مكنشي الجلد بيتقطع و لا حاجة وقت السوا .. في الفراخ اللي من السوبر ماركت بعد كذا تجربة فاشلة قررت إني أحشي من جوة الفرخة بس ..و اقفلها بالخلة بتاعت السنان و مكنشي عندي فقفلتها بخيط ..

و بعدين بسلقها كويس اوي ..و اطلعها و احضر لها صوص كده احطه عليها قبل ما ادخلها الفرن تاخد وش
زيت زيتون مع ليمون و صلصة و نعناع ناشف و زعتر و توابل و ملح و فلفل و يا سلام لو صويا صوص ..بس انا مبحطوش عشان ممنوع لكن بيبقى حلو اوي في تتبيلات الفراخ بالذات المشوية …

و اغطي الفرخة كلها و في الفرن تاخد وش حلو .

و ادي الفرخة بعد ما طلعت و اتقطعت من النص عشان الحشو يبان …الرز بيبقى مفلفل و جميل ..

بالنسبة للملوخية فهي سهلة متهيألي .. تريد مارك مصري يعني … الطشة المصرية الشهييييييييرة

آه بالنسبة للي مش بيلاقو بسمة في السوبر ماركتس بالذات بره مصر …. انا قعدت فترة معذبه و بقيت اشتري طازة و اخرط و اشيل و بعدين لقيت نوع حلو للمستعجلين اسمه كولد اليكس ..يعتبر حلو زي بسمة فعلا .. أحسن من الأنواع التانية ..

و على الملوخية عدل اللي اتعملت على شوربة سلق الفراخ

و بااااس كده يا رب تكون الأكلتين دول عجبوكم ..