مسج ممكن يخرب حياتك ؟؟

اهلين بالفراشات وش اخباركم بعد رمضان والعيد ان شالله انكم بخير …
يقوولون الشكوى لغير لله مذله بس انا ابى احكى والا بطق سالفتى الله يسلمكم ..
قبل اسبوع تقريبا رجع زوجى للبيت متأخر عادى كان سهران وقيليل سهراته مع اصحابه .. المهم يوم رجع عطانى جواله احطه بالشاحن وجوالى زوجى نوكيا زي الاي ميت يعنى شاشته مره كبييييييره وكان على المسجات المرسله كان في مسج مرسل لابو فيصل وهوقبل لايطلع مكلمه ولد عمى “ابوفيصل” عشان يعزمه على العشاء اليوم الثانى وكانت اول مره يكلمه وخزنه اسمه بالعربى مو بالعاده استغربت وش هالكم الهائل من المسجات لابوفيصل طبعا تطلع المسجات زى الايميل نص المسج يكون واضح مايحتاج تفتحين المسج عشان تقرين انبسطت قلت حلو صار علاقات مع اهلى وعيال عمى كانت كلها بالانجليزى الا الاخير كان بالعربي مكتوب فيه وينك منتى راده ؟؟؟..
اه يابنات دارت فينى الدنيا انا اعرف رقم ولد عمى بالاول قلت احسن الظن قلت يمكن يستهبل عليه اخذت الرقم كان ودى اعرف من يرد عليه بس ما اقدر ادق من جوالي لانى رقمى مميز انا وزوجى تقريبا زى بعض رحت الاهلى وكلمت من جوالى اختى الصغيره ااه يابنات كنت اتمنى انى اكون غلطانه وظالمته اول شى رد علي خدمه صدى اغنيه “تبقى اغلى الحبايب” حقت نوال الزغبي على طولت قفلت لانه لو رجال مايحط كذا رجع الرقم اتصل وترد على وحده قلت لها سورى غلطانه ..
انا احب زوجي ولاابى اخسره او يصير في علاقتنا شرخ صرت اسأله انا مقصره معاك يقول انا لو الف الدنيا ما القاء زيك اقوله السوالف مو حلوه يقولي انا ما اصدق ارجع للبيت عشان اشوف هالوجه الحلو واسولف معاك .. اسكت وتخنقنى العبره يسألنى اقوله عادى مبسوطه من كلامك..
ما ادرى وش اسوى ما اقدر اروح لاهل ما باى الموضوع يكبر انا واثقه من حبى زوجى وانها نزوه بس ابى حل لى اسبوع كل مااشوف عيونه اتعب و اذا تكلمت معه اتعب ..
تدرون وش سويت تضحكون اغنية اغلى الحبايب حقت نوال حطيتها بجوالى بس لرقمه قلت يمكن يحس او يفهم بس والله استحى اخليها لكل الناس ..
مرات افكر اروح انا وياه كوفى شوب واحكى معه .. مرات اقوول ادق عليها من جوالي وهو جالس واعطيه الجوال واقوول خذ وحده ودها تكلمك اكيد بيتوقع امى او امه ..
مرات افكر اقول لاخته الكبيره هى مره طيبه وحبيبه معى انا ما عندى خوات كبار انا اكبر وحد ولا ودى اقول لاحد من اهلي او صاحباتى ابى صورت زوجى دايم حلوه لانى احبه ولابى يفهم انى سكوت كاني راضى او قلة حيله وان الموضوع عادى وانا ابكى وتنتهى السالفه انه يستغل انى احبه حيل .. ابى يعرف ان الموقف جرحنى وآلمنى كثيير ….
وش اسوى ابى رايكم ……..
مشكورين ..