محتاره بشيء .. وأبي حل لإدمان النت

.
.

بنات ..
قبل أي شي انا ادري ان التجائنا لله هو
الحجر الأساس في حل أي مشكله
بالحياة ..
لكن بنفس الوقت نحتاج دعم معنوي
وحلول لمشاكلنا ..
وعلى هالأساس كتبت مشكلتي
وإن شاء الله بلقى عندكم
الفايده ..

.
.

بالبدايه انا اختكم maze ميمي ..
توني جديده بالمنتدى بس من زوار المنتدى سابقا
عمري ماتعدى 16 سنه

بكتب لكم بإختصار ..

انا طالبه بثانيه ثانوي ..
يعني باقيلي سنه بس و ادور تخصص يناسبني عشان
ادخل الكليه إن شاء الله ..
وللحين مو لاقيه تخصص ..
كان حلمي هندسة الديكور بس للأسف ..
مو موجود هالتخصص عندنا ..

وبما إن القسم اللي انا فيه حاليا تخصصاته بالكليات
و مواده صعبه وانا ماني أُهل لها ..
لأن أساسي ما انبنى صح ..
قصدي الأبلات ماكانوا يخلونا نعتمد عالكتب ونحفظ الأشياء الصعبه
لأ .. كانوا يعطونا كم ورقه ونحفظهم وخلاص..!
عشان جذي ماعندي الشجاعه اني ادخل تخصصات علميه
وقبل أي شي انا متخوفه من الكليه بصراحه ..

وياليت تفيدوني بخصوص الأقسام العلميه ..
ولا تقولون تو الناس ، ترى الآيام تمر بسرعه
وانا ما احب اختار شيء بدون قناعه 🙁

.
.

ومشكلتي الثانيه ..
إدمان النت ..
قبل لا افصّل فيها ..
أحب اقول شيء ،،
انا مو من روّاد المواقع اللي مو زينه
ولا أحب أكلم أولاد ..
وقلتها عشان ماترد بنت وتقول يمكن لأنج
تحبين او شيء .. لأن تفكيري أكبر من هالأشياء
وخوفي من ربي سبب يخليني أتخلى عن اشياء
كثيره ..

حاولت أشغل نفسي بأشياء كثيره
و لي محاولات بالشعر آخر محاوله فيهم نزلتها هنا
وأحب اسوي اعمال يدويه ..
واشياء كثير ..
بس النت مآخذ السياده مع إني والله أمل منه ساعات
بس بعد ارجع وادمنه اكثر ..
لدرجة إن بس باليوم اللي عندي اختبار فيه ما ادخل ..
– احلف عشان ما ادخل واخرب على نفسي –
وحتى صلاتي اصليها ما اضيعها ..
بس أبي اتغير ..
مابي حياتي كلها تكون نت وبس ..

أتمنى وصلكم اللي بقلبي

أحبكم في الله كلكم
وربي لو ما ارتحت لكم وحبيتكم
ماتكلمت

بإنتظاركم يآصبايا