محتاجه رايكم..محروق جسمي وماكنت اعرف انها مصيبه

الســــــــــــــــــــــــــــــــــــــــلام علــــــــــــــــــــــــــــــــــــــيكم
صباحكم مورد
كيفكم حبايبي؟؟ اولا هذا اول موضوع لي بالمنتدى وماكنت احب يكون بهالشكل
هذا الموضوع لي ونقلته نصا من منتدى ثاني لاخذا اكثر من راي
حابه اقولكم مشكلتي-اتمنى يكون هذا مكانها الصحيح- اللي ماكنت حاسه فيه ابد الا بعد زواج اخوي قبل كم يوم
بالاول انا متخرجه من الجامعه (23سنه)يعني موصغيره ونظرتي للامور بعقلانيه الحمد لله يعني عديت مرحله طيش المراهقه
وراضيه بما قسمه الله لي وصابره عليه اللهم لك الحمد والشكر لهذا ما ابي احد يقول اصبري ومن هالكلام
محتاجه اعرف وضعي حتى فقط اتأقلم واعرف مسار حياتي بأي اتجاه
الموضوع من 15 سنه تقريبا صار لنا حادث سياره وصار ماصار وتوفى السواق واصابات وكسور لكن انا احترقت مع السياره لاني كنت تحتها ولا انتبهوا لي المسعفين الا متأخرين
بعد كم شهر تعافيت وطلعت من المستشفى وخلاص نسيت الموضوع لان كان فيه من هو اصعب حالة مني
يعني ماتعالجت نهائي
كبرت على هالشي وانا متأقلمه معه وراضيه فيه لانه غير واضح للناس من الاكتاف و النحر حتى تحت الركبه بشوي ومرره عميق ويابس الحمد لله اعرف البس بطريقه ماتبينه للناس
لكن بهالسنه تغير كل شي
اخوي اللي جهزت زواجه قال لي انه بيكافئني على تعبي وبيعالجني لانه سمع من زملائه ان الحروق لها علاج والبنت المحروقه ماتتزوج ولاتحمل ولاتستمتع ابد مع زوجها
هنا انصدمت لاني كنت متوقعه اني ممكن اتزوج واخلف
وانصدمت ليش اهلي مافكروا يعالجوني طول 15 سنه اللي فاتت يعني معقوله ولا استشاره او حتى ماحطوني قدام الامر الواقع
على الاقل اشيل فكرة الزواج من بالي
واعذر اللي تقدموا لي يبغوني متعه او اربي اولادهم اثاريهم عارفين الوضع وانا لا
وافهم ليش اختي اللي اصغر مني تزوجت قبلي لها سنه الان وحامل الله يوفقها
وليش اهلي ما يضغطوا علي للموافقه بعكس اختي اقنعوها تتزوج وانا لا على راحتك تبغي تتزوجي او لا
بعد هالافكار دخلت كذا موقع مهتم وتعرفت على بنات مصابات بحروق
صراحه فرحت ان فيه عدد لابأس به منهم
عرفت من كل المناطق والدول حتى من هنا بالرياض فيه كم وحده وان شاء الله بتعرف عليهم اكثر واكثر لحد مانصير مثل الاخوات ما احب علاقتنا تقتصر على الماسنجر
عرفت منهم انهم صلحوا عمليات اشكال والوان غيروا لون الجلد وسمروا انفسهم و اللي كبرت صدرها والا مؤخرتها والي سوت زراعه واللي سوت بالونات عشان تنفخ الرحم واللي سوت مكان الاعضاء الخاصه عمليات واللي ليزر والي زراعة شعر واصابعها كانت محروقه ومنهم وحده اخذو جلد من ظهرها وافخاذها وحطوه بمكان ثاني ما اعرف كيف واشياء غريبه ويقولو مؤلمه جدا وعيشة بالمستشفى وادويه ولايقربوا صوب الشمس حتى بالبرد!ومكلفة جدا سواء سوها بالمملكه او خارجها واشياء ما افهمها ولا قدرت افهمها
وكلهم ماتزوجوا يقولون ما احد يرضى فينا عشان الحمل
والشكل الغير مقبول
كيف الرجال يتقبلنا واهلنا ماتقبلو حتى يلمسوا المنطقه المحروقه
الاوحده تقول انشبكت كم شهر يمكن5شهور بعدين تركها
ووحده تطلقت من ليلة زواجها
واعمار بعضهم فوق 35 سنه
وانا اصغرهم ولاتعالجت نهائي لان ماكنت حاسه او بمعنى اصح ماكنت عارفه اني ممكن اتعالج
كلهم نصحوني اني ما اصلح اي حاجه لان فيها تكشف وتعب نفسي ولاتنجح الا بنسبة بسيطه
ناهيك عن الاخطاء الطبيه بدل ماتبريها تهريها
واني انزع فكرة الزواج من بالي
(انا مو ميته عل الزواج حالياً وغير راغبة فيه لكن اخاف يجي يوم واتمناه واتندم على سنيني وحسيت ان هم البنات المصابات هو الارتباط بالزوج)
الان لي فتره وانا تفكيري مشتت لكن مجنبة التفكير بهالامور حتى يتم زواج اخوي على خير
والحمد لله تم والان تفرغت للتفكير بحالي
هل انا بمشكله حقيقيه او اتخيل
هل كلام البنات اللي مثل حالي صحيح والا هم متشائمات وانا متفائله
وحكي زملاء اخوي له صحيح؟
يعني انا ناقصه؟؟ولا اعرف اوضاعي صح؟؟يعني هبله والا كيف؟؟
بهالحال ارضى باللي يتقدم لي عشان اربي عياله منها استر على نفسي واقطع كلام الناس اللي بيجي لو عزفت عن الزواج
فيه احد منكم يعرف وحده مصابة بحروق وتزوجت وخلفت؟

الله يرزق كل من تتعاون معي كل ما ببالها ويستر عليها ويرفع مقامها ويشرح صدرها وييسر امرها