مافي فائدة من هذا القسم!!!

وبسم الله نبدا.

ماهي خطوط الطيران؟؟
الخطوط السعودية الى ماليزيا سنة 1429 ه انا وزوجي وطفلي 10 شهور
درجة سياحية ,المسافة 7 ساعات الذهاب كان عادي بس الرجعة كان فيها توقف في الرياض بس
كويس مازلنا من الطيارة على طول اقلعت.

بخصوص الحقائب ؟؟
لاني كنت اول مرة اسافر وكان معايا طفل فخفت اني مالقى احتياجاته فااختكم في الله حملت البيت معاها وكانت غلطة كبيرة لان الشنط صارت كثيرة ومتعبة في الحمل .غير كذا المطار الماليزي
واحنا مغادرين البلد كانو يبغو ياخذو مننا 1700 حمل زائد رغم اننا راجعين في طيران السعودية.
لما جينا ننتقل من سيلانجور الى بيننانج وهي جزيرة اخذنا طيران اسيا اخذو مننا حدود 400 .
النصيحة تاخذو هاندباج زي الاجانب كل واحد في العائلة شايل له هاند باج او من الشنط الصغيرة اللي تنسحب بعجلات ويدخلها معاه الطيارة .

المكتب السياحي؟
مكتب ريكسون في جدة بصراحة حجزو لنا الفنادق اللي احنا اخترناها والطيران الداخلي وكان كل شي تمام بحدود 6000 ريال سعودي

الفنادق؟؟
انا اخترتها بنفسي بعد بحث في النت وبصراحة ندمت في فندقين ,
اول شي احنا اتاخرنا في الحجز علشان كذا كثير من الفنادق مالقينا فيها حجز .
-سيلانجور : هوليداي فيلا ……..الغرفة عادية ومالها اطلالة ورطوبة فيها
بوفيه الفطور عادي بس تلاقي طاولة بسهولة .
منطقة المسبح حلوة واحلى شي فيه . بس ماارجع اسكن فيه لو سافرت تاني.
-بينانج : وندمت اني ماقضيت فيها السفرية كلها لانه جزيرة وحلوة مره
الفندق كان باي فيو وكان اسم على مسمى خدمة ممتازة وغرفة تطل على البحر والمسبح
ومن جد كان منتجع يخبل .
بوفيه الفطور متنوع ولذيذ وتحتاري من كثرة الانواع .
قسم المساج : رحت عندهم علشان قلت اجرب اعمل مساج وتقشير بصراحة الموظفة دمها رزل
وطلبت مني اقعد ملط …هههههه علشان تعمل المساج
ماقدرت بصراحة خرجت .
واتعرفت على وحدة اسمها مدام ليلى عندها مكتب سياحي وانتي خارجة من الفندق تمشي على طول على يسارك تلاقي مدام ليلى مرتزة في مكتبها بصراحة اخلاق ,اعطتني رحلة لجزيرة القرود مع
الغدى ب 80 والفندق كان عارض علي ب 150 ………
المهم هي جابت لي وحدة ست كبيرة في السن مسلمة جابتها لين عندي بالفندق وطلعت غرفتي
ولبست شورت وتوب قصير وعملت لي مساج ب 50 .

-جراند سيزن : ماادري امكن في كوالالمبور سيئ لابعد حد ،اصوات جيران في الفندق تسمعيهم
بوضوح.
وكل الفندق هنود مجوس وايرانيين …………..والبوفيه والله ماتلاقي لا كرسي ولا حتى فطور من الزحمة وكلهم يناظرو فيني لاني مغطية وجهي …..كرهت نفسي .
صح انه جنبه القطار المعلق السريع ….يادوب تدفعي شي بسيط ويوصلك لمنطقة التسوق و وفرنا حق التكاسي والزحمة.

-امبيانا وهو قدام البرجين التوام رحنا للبرمج مشي ………….ياسلام على هذا فندق يستقبلوكي بكاس شاي مثلج
والغرفة فيها صينية فواكه وكفاية ديكور الغرفة يشرح القلب.
البوفيه كويس بس الجلسات مافي مجال انك تلاقي زاوية او طاولة على جنب كل الدنيا مفتحة بس
فندق حلو.

-جنتنغ : فارست ورلد ………..زحمة والدنيا طوابير علشان يجي دورك وتعملي تشك ان
مالقنا الا غرفة عادية وكانت صغيرة ومزعجة ….لازم تحجزو من بدري علشان تلاقو غرف كبيرة
البوفيه برضه زحمة واكله مايناسبنا الا البيض فيه…..
بس الملاهي ابداع للي رايح يلعب السحب تمر من جنبك وانتي قاعدة …..
وقتها بكيت على زوجي لان ولدي عبود صغير ولا اقدر اروح العب في اي لعبة واتركه
وطلب مني اروح وهو يمسك الولد بس ايش الفايدة العب لوحدي يعني بصراحة ياريتني مااخذت
ولدي حرمني من اشياء كثيرة.

تكلفة السفر؟؟
اذا ذاكرتي بخير كلفت علينا حدود 20000 ريال لمدة 15 يوم
___________________________________

ان شاء الله انزل لكم بعض الصور للفنادق .

بس ياريت القى تفاعل خاصة اني ناوية اسافر دبي واتمنى تكون وحدة راحت لها وتفيدنا
بالمعلومات