ليش مامتي كده ؟؟؟

يا بنات انا جدا زعلانة من امي ، بس في نفس الوقت انا خايفة من العقوق و خايفة من غضب الله عليا ، بس ما اعرف ايش اسوي ❗

انا راح اقلكم حكايتي و ايش صار معايا اليوم

انا يا بنات عندي امي ( كنت ) احبها و ( كنت ) اشوف فيها حياتي كلها و هدفي بالحياة و كان كل همي اسعدها و ارضيها ، و افكر فيها كتير ، بس بعدين للأسف حصلت شوية ظروف غيرت نظرتي لامي و حياتي للأبد

انا بنت عمري 27 ، و محتاجة امي بس للاسف مافي علاقة حلوة بيني و بين امي ، لا تفاهم ، لا حوار ، لا كلام كويس ، اللهم معاملة رسمية وانا اللي خليتها رسمية عشان لا اغضب ربنا فيها بس حبي لها طار و ماني بنتها حقت اول بسبب موضوع قديم صار و هي وقفت ضدي فيه ، و من يومتها انا تغيرت و هي كمان تغيرت

الموهم اللي صار اليوم بالصباح ، طبعا انتو عارفين انه الدراسة بدأت و التسجيل للمواد بدأ ، و انا تسلفت من ابويا مبلغ 4000 ريالو باقي بس تقريبا 200 ريال ، و انا و الله العظيم حسابي مافيه شي و ماعندي ريال بمحفظتي حتى عشان اخدلي شي اكله و اروح شغلي ، رحتلها قلتلها يا ماما ممكن تسلفيني 200 ريال و ارد لك هي لمن ينزل راتبي ، و تعالو شوفو المعاملة اللي عاملتني هي و التحقيق اللي فتحت لي هو

ليش تبغيها ؟؟ ايش بتسوي فيها ؟؟ انتي مو اخدتي من ابوكي 4000 ؟؟؟ ليش ما طلبتي منه 4000 و 200 ؟؟ انتي راتبك فين يروح ؟؟ انتي الجمعيات المشتركة فيها فين وديتيها ؟؟؟ انتي في احد بيبتزك و يبغا منك فلوس ؟؟ ( تخيلو بالله هادا السؤال ؟؟!! و انا اخرج من شغلي و ارجع بيتنا الساعة 11 و 12 بالليل من الكلية ليش يعني ؟؟ و هي عارفة كده لانه احيانا تمر عليا تاخدني ) ؟و كمان قاعدة تهزئني على سالفة سويت لها هي امس و زعلتها و بعد السمفونية الطويلة العريضة اللي سمعتني هي قالتلي هاتي شنطتي اديكي الفلوس !!! و طبعا قلتلها لا ماني ماخدتها و خلاص انسي الموضوع

و نسيت اقول انه قبلها رحت لاخويا الصغير اترجاه يسلفني 200 ريال و صرفني من الغرفة

يلا قد ايش حسيت نفسي باشحت 🙁 ، قد ايش حسيت كرامتي انهانت ، ليش ماما تعاملني كده ؟؟؟ مو كفاية انه ما عندي علاقة كويسة مع امي زي كل البنات ؟؟؟ ( انا نزلت موضوع قبل كده عن علاقتي معاها و ايش اعمل عشان اصلحها )

انا جاوبت على أسئلة ( التحقيق ) اللي سألتني هي لاني املك اجابة صادقة لها ، و هي كالآتي : ( عشان بس تكونو بالصورة )

ليش تبغي الفلوس ؟؟؟ ايش بتسوي فيها ؟؟ …… عشان اسجل مواد
ليش ما طلبتي من ابوكي 4200؟ لاني ما اكتشفت انهم يبغو 200 فوقها الا بعد ما سلفني
راتبك فين يروح ؟؟؟ فين جمعياتك ؟؟ جمعيتي استلمتها و دفعتها للترم الأول و راتبي كله اجمعه عشان السمسترز اللي باقيتلي ( للعلم راتبي ما يبقا منه الا مبلغ بسيط بسبب هالجمعيتين اللي داخلة فيها ) ، و ( للعلم برضو دراستي غالية جدا جدا بادفع 90% منها من راتبي و 10 % الباقية ابويا يساعدني فيها ) يا حبيبي يا بابا ، قد ايش يقوللي كلام وحش و يسبسبني و يشتمني بس وقت ما احتجت اعطاني ➡

و آخرتها ماما تعاملني كاني ( شحاته )!! ، و الله اكتب لكم و انا ابكي ما راح اقول ما ني مصدقة اللي سوته فيا لاني صرت اتوقع منها اي شي

و دحين ابغا أسأل سؤال : كيف اعامل امي بحيث اني ما اوصل للعقوق و لا اغضب ربنا فيها ؟؟؟ علما انه خلاص انا غسلت ايدي منها و صايرة اتوقع منها اي إساءة ليا و ما صرت احبها زي اول ؟؟؟

و ملاحظة : انا رحت لاختي اللي حنت على حالي واعطتني اللي ناقصني و رحت سجلت موادي ، و قالتي انه مامتي يمكن ماخده على خاطرها حبتين لانه احنا ما نجيبلها هدايا من رواتبنا ، مع انه ماما ماشاء الله عليها مو ناقصها شي و عندها الخير و عندها مورد مالي غير ابويا و اختي بتدلعها و بتعطيها ( بس ما تعطيها فلوس )وانا يا بنات و الله العظيم راتبي كله يروح نصه جمعيات و الباقي من راتبي احوشه عشان دراستي ما انزل اسواق ولا ادلع نفسي لانه اصلا ما عندي فلوس عشان اجيب لنفسي فكيف اقدر اعطيها ؟؟؟ و هل هادي الحجة ممكن تكون سبب في تصرفها هادا ناحيتي ؟؟ و حتى لو كانت سبب هل يعطيها الحق انها تهينني بدا الشكل كاني شحاته ؟؟؟ ، و للعلم عشان لحد يجيني يقوللي انتي يمكن ما بتعاملي امك كويس ، ماما انا معاملتي لها معتدلة ما اقرب منها كتير ولا ابعد عنها كتير ، هي زي النار اذا بعدتي عنها راح تتجمدي برد و اذا قربتي منها راح تنحرقي فانا اخترت انه اكون معتدله بس ما يمنع انه عن جد انا طمعانة في قربها و حبها و حنانها لاني كتيرررررررر محتاجتهم بس بصراحة تقدر تقولو تصرفاتها خوفتني و ما سمحت لي اتقرب منها كتير ! 💡