لية يا بلدي الحلو فيكي مبيكملشي ؟؟

السلام عليكم :

في أجازتي الأخيره حجات كتير فرحتني أوي و حجات أكتر للإسف حزنتني …

و حزنت اوي …. من حجات كتير

حزنت لما لقيت الأسعار ناااااار ميقدرشي عليها غير الغني و بس و الفقير يروح في داهية …لدرجة إن أسعار اللحوم و الفراخ و اللبن و البيض و غيرها من السلع الأساسية أصبحت أغلى من بعض دول الخليج و كتير من دول اوروبا !!!!!!!!!!!!! مع الفارق في المرتبات طبعا …

حزنت لما صادفت ابني مشكلة صحية صعبة و أضطرينا نروح بيه مستشفى حكومي لنقل الدم لاجدني مع ابني في عنبر به عشرة أسره في مكان واحد بدون حتى مروحة في عز الحرو جو يعيي أي طفل سليم أصلا ….. و عن مستوى النظام و النظافة حدث و لا حرج :(, لا و خناقات ليل نهار مع الأخوه بتوع الأمن في المستشفى لرغبتهم في تكديس الجميع خارج المستشفى 3 ساعات وقت انتظار في مكان لا تزيد مساحتة عن صاله كبيرة في شقة !!!!!!!

حزنت لما لقيت مقاييس الجودة في المأكولات ملهاش أي علاقة بمقاييس الجوده في العالم وكأن الشعب المصري مش مهم صحته و لا صحة ولاده ..

حزنت من إستغلال بعض السواقين و السماسرة و غيرهم لاي انسان يشتمون منه انه غير عالم باسعار أي شئ حتى يبدأ سباق الاستنزاف…

حزنت لما لقيت ابن البلد هو أرخص حد فيها و حياته هي الأرخص .

حزنت بجد من قلبي على شعب عريق و بلد أقل ما يقال فيها أنها رائعة … جمالها غير عادي …آثارها هي نصف آثار العالم تقريبا…. عندها ثروة سكانية هايلة و قناة السويس و بترول و ضرايب و جمارك .. شعبها في كتير متعلم و في كتير عنده صنعة كويسة … جوها معقول … و الشعب في المجمل طيب و شهم … يبقى لية الوضع اللي وصلنا له ده ؟؟؟؟

لية يا بلدي الحلو فيكي مبيكملشي ؟؟؟؟ ❗