لله شــكري وتمجيــدي

لله شــكري وتمجيــدي وتـوحيــدي
ادعيـه وقت الرخا وادعيه في الشــده
واعـوذ به لا كسـا الشـيب المواليـدي
في وقـتٍ تشخص الابصـار مـن شــده
من نـاره اللي تـذوب قـاسي الحيـدي
اللي يجـازي بها اهـل الكفـر والـرده
سبحانه اخضـع لسـلطــانه ولا احيــدي
عن ماكـتب لي وحـكمه ما اقـدرارده
يـــارب جنبنـي دروب المنـاقيـدي
واجعـل دروبي على الطـالات منحــده
الشعـــر لا هـو بعمي ولا هـو بسيدي
اعــده احيـان .. واحيـان مـا اعـده
أن هجـرست به هجـوسي دورته أيدي
والحبـل بيـدي مغــير ارخيه واشـده
وأن ما بغيتـه يروح دربه سعيـــدي
النفـس مـا على فرقـــاه منحـــده
والشعـر تالي الزمـان اصـلي وتقليدي
مـابـين مفتـوحه ومـابـين منســده
واللـي يجـي كـاش واللي بالتقاصيدي
وتزيــن مسـوده وتشــين مسـوده
حتـى فصـاحة خليـل ابن الفـراهيدي
ما ضاعت الاعلى الكـورنيش في جـده
ما فيـه شـي على ما قيـل تجـديـدي
سـلام رديـه .. ويـا مرحبــــا رده
والعـاشـق يقـول ذي جملة مواعيدي
نفسـه من فراق نــور العـين منضده
ما يدري ان الغـزل ومعـاشر الغيدي
ولا .. وغــابت نجـومه قـد لها مـده
الـذود هـامل من نياق .. ومفـاريدي
يـا راعي الـذود.. قلي كيف تـرتده
والوقـت وجهـه تغطيـه التجـاعيـدي
واشـوف فيه القــدور السود منكده
فيه القــروم الحلاحيـل الصنـاديـدي
ما بـين وده وهــاته وهــاته ووده
ماكل صقـارلا هــد الطـير بيصيـدي
حتى ولـوهــوعلى ما جـازله هــده
يـاليت كثر الحكى محشـوم ويفيـدي
لا قـول وارجي كـريمٍ ما انقطـع مده
واعيد وازيد .. ليه ..اعيـد وازيـدي
ما دام نصف العرب كفـه على خـده
يـا طـول دربي ويا مقواك ياقيـدي
انشهـد انه وصـل صبري على حـده
ولا صـبر في هـ الزمن غيرالاجاويدي
اللي بعضهم يموت ولا انكشـف سـده

_________

للامانه منقول