لحظه بالله لحظه ايه ايه انتي وياها استني لالا لا تنزلين تحت ادخلي موضوعي اول لازم لاز

………………………….
المهم أبدأ لكم في موضوعي العجيب
اللي تأديني تقدر ترفع يدها اللي بتسب الموضوع يتعذرها
واللي بتناقش بأدب وهدوء ورويه وسكينه حياها الله
بس كل شي وله حدود لو سمحتوا
………………..
دقت ساعة الموضوع
دقت ساعة الكتابه
دقت ساعة الهواش
الى الأمام
الى الأمام
الله أكبر
الله أكبر
………………………

ياذا القذافي سيطر على مخي
تذكرون افلام الكرتون حق السيطره على العالم مثل كرتون بنكي وبرين
احس القذافي سيطر على العالم بسوالفه الغبيه
طلعت عن الموضوع بعيد بعيد
………….
بالله عليكم بالله ما زهقتوا من موضوع القياده ؟؟
……
يختي خلاص هدوا وربي اذا سمحوا بالقياده راح تقود كل وحده تبي غصب عن اللي ما يرضى رضيتم والا رضيتم صح والا لا
طيب ليه الصراخ لكم سنين تصارخون
وكل وحده تقول رأيها واللي تعارضها يا ويلها ويلاه
مافي اي احترام لوجهات النظر
يختي اذا ساقت وحده مو معناتها انها فاجره
ومو معناة ان كل اللي راح يجلسون في بيتهم عفيفات
يا بنات الحلال انا مع القياده ايه معها بس بشروط معينه
يعني مو من كل هب ودب تسوق علشان ما يصير فيه زحمة وحوادث وفتن
يختي والله لما الأم هي تسوق وتودي بناتها وتجيبهم ان ارحم واحسن من السواقين اللي مالهم أمان
انا من يوم شفت مقطع السواق اللي اغتصب بنت كفيله هو ومجموعه من اصدقائه صرت مع القياده وبقوه
اي والله كذا راح نسلم منهم ومن شرهم
ولا تنسون ان في عوايل يجلسون في البيت بالشهور محد يطلعهم ولا يشبرون لا عند ناس ولا سوق ولا غيرها
الأب مو فاضي والأبن مافيه خير ولا يسمع كلام امه
بالله مو هنا المفروض الام تسوق؟؟
طيب بغض النظر عن القياده مو المفروض كل وحده مننا على الاقل تعرف تسوق الله لا يقدر صار لزوجها او ابوها او اخوها شي وهو يسوق والا نزل من السياره واحد من البزارين حركها والله ما نقدر نتصرف يعني نموت كلنا والسبب ما كنا نعرف نتصرف وقتها (صارت معنا على فكره كم مره )
مصيبه والله ما نعرف نشغل حتى مكيف السياره وما ندري هذا زر ايش وهذا ايش
مره نزل زوجي من السياره وبغيت اقوي المكيف ضغطت زر على قولة زوجي بغيتي تودينا في ستين داهيه هذا الزر زر الدبل اللي يطلع السياره من التغريز هههههههههههههههههههه
يا عيني يا ام البتول على ذكائك الخارق
……………………
زي ما قلت قياده بشروط معينه
تحمينا بإذن الله من شرور السواقين
وتطلعنا المكان اللي نبيه من دون ما نكون تحت رحمة احد او نترجى احد
اعرف عايلة مساكين ما يطلعون مكان بسبب اخوانهم ليه كذا طيب والله حرام بصراحه
برضو محد يدري الله لا يقدر احد تعب والا بغى مستشفى نكون نقدر نتصرف وقتها

………

مشكلتنا كل وحده تتكلم على قد ضروفها ما تدري ان يه ناس كثيره ضروفها غير ومتطلباتها غير
انا اقول بلا انانيه وكل وحده ياليت تشوف متطلبات غيرها مو نفسها وبس

………….
اذا جينا بنقيس شرعا
زمان كانوا يركبون الدواب
قيسوها على السيارات
شرعا يعني حلال
وقليلة الادب قليلة ادب سواء ساقت والا قعدت بالبيت
ووسائل الخراب يا كثرها من بلاك بيري لا تيلفون لا جوال لا اسواق وغيرها كثير كثير
ما جت على السواقه
على قولتكم فساد وفتن
سلامات ليه اللي بتسوق بتسوق وهي عريانه مثلا
لا حبيبتي تلبس عبايتها وغطاها وتضلل سيارتها وسمع الله لمن حمده
اذا على الشباب الفاسد اللي عندنا وما يخلي خيال اسود يمر من جنبه الا وسوا لها اذيه
ما راح نسلم منهم سواء الحرمه ساقت والا قعدت يعني تكفون اللحين الشباب هذا ما يغازل ؟؟ شدخل السواقه في الشباب
يعني الفساد موجود موجود بإختصار ما جت على السواقه
والغبي واللي ما يستحي برضو موجود موجود سوا البنت مشت على رجولها والا ركبت سياره راح يأذيها راح ياذيها
لكن ان شالله يحطون نظام اسمه نظام ضد المغازل زي ساهر اي واحد يغازل يصيدونه ويغرمونه الف صدقوني بعدها محد راح يغازل

………….

وبعدين انا وزوجي نسافر كثير يعني لازم من اليوم ورايح استلم السواقه مره انا مره هو خلكم شوي ديموقراطيين
ممنوع التفحيط والتنطيل في موضوعي مسموح بالقياده الهادئه
…………………………………