كيف تحمين طفلك من برودة المكيف؟!! .. أبغى الحل لا هنتم ..

كيفكم يا فراشات وكيف اولادكم الحلوين ؟!!

طبعا مثل ما انتوا عارفين الصيف جاء .. والحر كل ماله يشتد .. والمكيفات جاء موسمها ..
حبيت أسألكم وش تسوون مع عيالكم الصغار عشان تحمونهم من برودة المكيف ..؟!!
لأن حنا الكبار لو بردنا تغطينا .. وان احترينا وخرنا الغطا
لكن الصغار المفعوصين .. الأمورين يبغالنا ننتبه عليهم ..
وسبب موضوعي هذا .. ان بنتي المفعوصة الله يحفظها عمرها اربع شهور .. وجننتني مع المكيف
من اول كنت البسها بجامة والفها وكانت صغيرة ما تقدر تفك اللفة وكنت مرتاحة .. لكن الحين صارت تفك اللفة .. وصرت اخاف احطها عندها لأني مرة قمت من النوم لقيتها فكتها وهيي تتحرك جات على وجهها
يعني لولا ستر الله كان انكتمت .. بعدها صرت البسها بجامة وشرابات واخليها بدون لحاف
لكن احس اني مو مرتاحة .. ذابحتني الوساوس .. أحيانا اقول البجامة خفيفة .. مع انها قطن لكن اخاف تبرد وانا ما ادري عنها .. انا ارفع المكيف وسريرها جاي بمكان ما يجيه الهواء كثير .. لكن اخاف تبرد الغرفة وتبرد البنت معه .. واحيانا احس انها محترة ومعرقة ..
بصراحة ما ادري وش اسوي بها علشان أتأكد ان الجو معتدل ومناسبها .. وفي نفس الوقت ما يجيها برد من المكيف ..