عالم البنات النسائي كل ما يخص المرأة العربية من ازياء وجمال والحياة الزوجية والمطبخ
هذي قصيدة كتبها عمي على لسان امي لما تزوجت انا ومن ثاني يوم سافرت مع زوجي لاستراليا وكأنها تشكتي لاخوي الكبير محمد
وكنت انا آخر العنقود يعني دلوعة ماما اللي مانستغني عن بعض ➡
بس عاد هذي سنة الحياة على قولة ابوي وكل وحدة تتبع نصيبها الغالية جاية معي تودعني في المطار وكأنها تبي تناظرني النظرة الاخيرة
طبعآ من قبلها بسنه كان اخوي برضو مسافر للدراسة في امريكا .. يعني المسكينه امي فقدت اثنين من عيالها جعلها ماتفقدهم من شر والله يخليها لنا ويشفيها يارب ويرزقنا برها هي وبابا
عمومآ مااطول عليكم بس لاتنسون الردود مو بس مشاهدات 
لانه يهمني رايكم طبعآ
عــن لـذيـذ النوم جزّتني شطوني
الله أقوى ماعلى الصبر احتمالي
ما استطيق الصبرعن قرّة عيوني
لو سليتوا خاطري ماهوب سالي
تصعب الفرقـا على الأم الحنوني
كل ماحاولت أخفي ماجرى لي
غصب تظهر عبرتي مير اعذروني
أتـخيـــل زولها دايـــم قبـــالي
لحـظـــة التـــوديع قبـل يسـافـروني
قبلها عبـدالحـميد أعـز غـالي
البــطــا والبــعد مــن دونــه ودوني
أطلب اللي عالم في كل حالي
بـالـسـلامـة كــلهـم لـي يــرجـعــوني
يامحمد شوفكم هو راس مالي
لاجـتـمـع شـملـي بـكـم زالـت حــزوني
واذكـر الله عد ماهل الـهـلالي
وعــد مـاهــلـت هـمـالـيـل الــمـــزوني
آآآه ياقلبي كل ماقريتها دمعت عيني ياربي من جد اشتقت لامي والجلسة مع خواتي وبنات عماتي وخالاتي واللمة الحلوة اشتقت للسعودية كلها:P
الله يرجعنا وجميع المغتربين لاهالينا بالسلامة
