” قصــة ولآدتــي في الغربــه وبالصــور “

هذي قصة ولادتي بالتفصيل ماشاء الله لاحول ولاقوة الا بالله <~ خآبرتكم تحبون هالقصص مثلي
ولدت يوم السبت 23-7-2011 <~ بكرية
ولادتي في مستشفى بورتلاند في لندن
اللغه عندي ميييح بس يجي مني <~ تقولون بنقاليه لاتكلمت

أفهم وش يقولون لكن ماعرف اتكلم وزوجي هو المترجم

دخلت السابع بداء ثقل وتعب وياطووول السابع وعلى الثامن ماقدر اطول بالمشي خطوتين واجلس والتاسع ماعاد ابغى اطلع من البيت ولاابغى اشوف أحد والأخلاق تجاريه
وفيني خوف على البيبي مادري ليش خايفه يصير له شي بسم الله عليه
وأبكي من التعب والغربه وشغل البيت وماحولي احد وزوجي مايعرف لي ولا هو حآس فيني ومايبغاني اتشكى يبغاني اصبر واسكت ولا قلت شي قال الجنة مهوب ببلاش 🙁
وأهلي ماعمري قلت لهم اني تعبانه دايماً اقول اني طيبه وبخير خصوصا لأمي معاها سكر ومابغاها تشيل همي أصلا ماعلمتهم إني حآمل إلا في الشهر 6 اللهم أختي الكبيرة علمتها بدري
عاد اقولكم كويس انشغلت بالموااعيد في التاسع والله كل موعد عندي ارجع متحطمه من كلام الممرضات والدكتورة والمدوايف
مرة وجهك اصفرر ومرة البيبي صغيرر ومرة الدكتورة ترعبني بالولادة والنزيف وهالأمور لارجعت اجلس ابكي شسوي بنفسي انا كذا صحتي كذا عصقولة ومعاي فقر دم اروح انتحر يعني !!!

طبعا اعطوني كذا موعد للولادة وكان أولهم هو اللي ولدت فيه والولادة ماجات من حالها لا الظاهر لو خليته اكثر ماعنده مانع يتكي الأخ
حسمنا الموضوع هاليوم لا وزين مني انتظرت الين خلصت 39 اسبوع كنت ابغاها في 37 لكن حجمه صغير وخوفتني الدكتورة تقول ممكن مع الطلق
والتحريض تتأثر نبضاته وترتفع وتنزل بسرعه ولايقدر يتحمل لأنهم كانوا بيسوون لي تحريض كل 6 ساعات لمدة يوم او يومين او ثلاث على حسب استجابة الرحم وهذا خطر ع البيبي
قالت لو طول ببطنك يكبر ويقوى شوي قلت الله يكتب اللي فيه الخير والله كنت شايله هم مرة وخايفه على البيبي ودي ان الولادة جاتني من حالها ولا أني أتدخل وأندم والحمدلله هونها ربي
مادري كيف عدت هالأيام

اعطوني ورقه مكتوب فيها طرق الولادة واختار منها
عاد انا اخترت الولادة في الموية وإضاءة خافته 💡
مهوب مني ابستر الخآفي <~ ابوك يالجو اللي برآسي
وأبرة الظهر <~ عشرين ألف خط من بداية حملي ابغاها
لكن زوجي مادري وش سآلفته مايبغآني آخذها يقول عشآن تعرفين وتجربين الآلم والولادآت الثانية خذيها لكن انا مصرة
قلت له وربي لو تنعطى الإنقباضات اللي احس فيها من دخلت السابع لأعطيك تجربها مو عاد طلق
ومشكلته مع الدكتورة بكل اللي تقوله يعني لو جاني الموت وقالت له دي بتهزر صدقها مع أني والله مآني مهولة بالحيل 🙁

نعود لمحور حديثنا :
جهزت شنطتي من التاسع اتذكر شكلها طايحه بركن الغرفه وفاتحه فمها وكل مرة ارمي فيها شي واطلع منها شي أول ماحطيت الكآميرآ <~ فايقه 😛
قبل الموعد بأسبووع نزل مني حاجه صفراء كتله وحده ثقيله بدون دم ارسلت للدكتورة قالت Don’t worry [ لاتقلقي ] <~ لغير الرآطنه بالأنقلش
ضعيفه اقلقتها بالمسجآت وهي ماعندها الا Don’t worry شكلها مسويتلها نسخ عشآني
جاء يوم الخميس بالليل جاني ألم اسفل بطني قووي مرة ومرات مايفكني ومرات يروح ويرجع قلت يمكن تعبت نفسي لأني رتبت بيتي من قلب
رحت ابغى انام عجزت لاانسدحت احس بألم ولا وقفت اقوى وصحيت زوجي
وجلس يطبطب علي ينومني كأني بزر عنده وهو في عينه النووووم ومايتكلم عشان مايطير لكن هيين
قال نروح المستشفى قلت لابنتظر للصبح ان ماخف رحنا ومع الألم كنت شايله هم مطبخي حااايس من العشاء ،،
قلت بقوم قال وين قلت بنظف المطبخ قال فاضية خليه لاقمت بسويه <~ ببطي عظم
قمت اغسل ولاجاني ألم اتكي على الولادب شوي واكمل والحمدلله خلصت سويت لي حليب بالزنجبيل وجلست اقراء سورة البقرة وأدعي بهالدعاء طبعاً هذا فجر الجمعه

(((اللهم إن في تدبيرك مايغني عن الحيل . وفي كرمك ماهو فوق الأمل وفي حلمك مايسدالخلل ، وفي عفوك مايمحو الزلل
اللهم فبقوة تدبيرك وعظيم عفوك وسعة حلمك وفيض كرمك اسالك أن تدبرني بأحسن التدابير وتلطف بي وتنجيني ممايخيفني ويهمني
اللهم لاأضام وأنت حسبي ،، ولا افتقر وأنت ربي فاصلح لي شأني كله)))

خف الألم شوي رحت أنام الحمدلله نمت ياااازين العآفيه اللي يجي وراها نوم 🙁 الله لايحرم كل مسلم منها يارب
صحيت على 12 وافطرنا وكان موعدي اروح المستشفى اليوم على الساعه 2 وقبل اروح نزلت مني السداده اللي يقولوا عليها افرازات شفافه بخيوط دم سبحان الله بنفس يوم التحريض نزلت
وتجيني ام الركب واطلع واقول لزوجي ياااااوه جتك الولاده وعلمته بالسداده خاااااااااااف وحط يدينه على فمه 😆 🙂
قلت هذا اللي بيدخل معاي في الولادة !!
ورحنا المستشفى 3ونص كان احساسي متبلد واللي ماخلآني أشيل هم أبرة الظهر <~ بآخذها ماعلي منكم
وفي الطريق اقراء سورة الكهف وادعي بالتسهيل وللمسلمين ولكل محرومه والرحمة لموتى المسلمين
وصلنا نزلت انا وكريشتي وكنت نآوية أسوي تغطية كآملة بالصور لكن يادوب صورت كم صورة
ودوني لغرفتي جاتني الممرضه قاست الضغط وحطت على بطني شي يقيس نبضات البيبي ويقيس الطلق عندي
عرفته من وحده الله يجزاها خير ويوفقها كانت تقول اللي على اليسار للبيبي واليمين حقك وكنت اشوف نبضاته كويسة فديته اما طلقي مافي بين الصفر وان طلع طلع 13 يعني ولاشي
وهذي صورته

والساعه 6 قالت بسوي لك تحريض ممكن ..؟ ياعمري ع الأدب قلت لايردك الا يدك جابت العده وكشفت علي قالت 2 سم وانا أكتئب وهي تضحك وتضربني وتقول نوووو كويس مرة ليش زعلانه <~ افهم ترآني
قلت ابغى اكثر من كذا كل هالأوجآع البارح و2سم 🙁 <~ ياحليل هالأوجاع مع اللي شفته
عاد مادري اش حطت لي الظاهر جل ماعورتني مرة يدها خفيفه وراحت خلص الشفت حقها قالت بجيك على الصبآح وإن شاء الله تكوني ولدتي
قلت إن شاء الله هي تقول إن شاء الله لكن ماتدري وش معناها
مررررة رهيبه وعسل قلت لها استني لبى خشتس بطقك بصورة

قالت طيب هاتي الكآميرا أصورك قلت طيب وصورتني ياشييين صوري مع التعب والكرش
وقتها ماكنت أحس بألم جالسه أسولف مع زوجي قلت ابدلع عمري أبغى عشاء وطلب لي عشاء خفيف
شوي حسيت بألم واحيان يرتفع الرقم وماحس بشي واقول ياترى اقوى شي إلى وين بيوصل كان يوصل معي 40 وحولها وكنت منشغله بالجهاز اتابعه ونضحك نقول بداء مفعوله وجاتني الدكتورة المصرية
وازيك عمله ايه هاه بتحسي بحاقه قلت خفيف قالت كويس طب انا حروح البيت وقاالت ماراح تولدين الحين بعد 6 ساعات بيسوون تحريض ثاني وراحت
شوي يزيد الألم وكان محتمل يوصل للـ 70 بس ذكرت الدورة كنت اتعذب منها
قلت لزوجي يالله قولهم يعطوني الأبرة قال وين بدري مافيك طلق قلت ياويلي هذا شغل التحريض اجل الطلق كيف ويزيد الألم كان كل 5 دقايق قلت هذا زي الطلق بالله مابغى احس بشي هذا ووراي مشوار 6 ساعات وتحريض ثاني وآلام ثآنية
تكفى خلهم يتصرفون وكنت ادعي واقراء الزلزلة واقول يارب لطفك
راح كلمهم هذا تقريبا الساعه 9 جو قالوا تبغين مسكن تنامين بعده صرت افكر قلت بعد وراي نوم وبعده أصحى وألم قلت لامافيني نوم وراحو جلست افكر قلت ابغى مسكن حتى لو مانمت نادهم لي بسرعه
واعطوني مسكن الظاهر غير حق النوم واتوهم اقول اي بيخففه واجلس شوي واتلوى من الألم وامسك حديد السرير وأتأوهـ ومرة امسك يد زوجي قلت بسرعه نادهم يعطوني الأبرة وناداهم
قالوا طيب خلاص شوي نطلعها فوق ونعطيها يسكتوني وكلموا الدكتورة قالت لاتعطونها الحين لأن الأبرة توقف الطلق
احس روحي معلقه بين السماء والأرض مااصدق تفكني الطلقه عشان اهاوش زوجي
ابغى الأبرة نسيت الآياات كلها والدعوات كلها مااقول الا يارب لطفك يامخلص النفس من النفس خلصني
وامسك يد زوجي بقوووووووووة بعدين يقولي والله عورتني يدي ماصدقت انه انتي اللي ماسكتها كأنه رجال ماسك يدي بقوته كلها 🙁
قلت مانفعت المسكنات جيب حبوب النوم بسرعه وجابوها واكلها وادور النوم والألم مازال وقالت المدوايف احسبوا له ومرة يحسب زوجي ومرة انا كان كل 4 دقايق والرقم كان يوصل 170 تقريبا
ماعاد ادري عن احد اخااف لامسكني الألم مرة ثانية كنت اغطي راسي بالمخده او امسك السرير واسحب المفرش وحاقده عليهم قلت عطوني الأبرة حرام وش الفايده وانا قاعده احس بالألم احس روحي بتطلع
كلم زوجي الدكتورة قال الألم كل ماله يزيد وماتقدر تتحمل قالت ماعليك دا هزار البنات لسى ماجا الطلق وقالي خلاص اتحملي بدري
انهبلت فيه اقوى من كذا !! ينتظرني !!
قالت المدوايف قومي اتحممي بموية حارة .. قلت ضفي وجهك .. وين اتحمم وانا بهالحال .. شوي الا كبدي لاعت ابغى استفررغ الله يكرمكم طردت زوجي من الغرفه واخذت راحتي وطلعت عشاي كله
وقلت بقوم اتحمم بالموية الحارة يمكن صادقين والله رحت اتحمم صحيح تخفف الألم لكن مازال اقوى من المحتمل لاجاتني الطلقه جلست على الأرض وكنت مدخله جوالي احسب الدقايق طوولت على 4 دقايق
واسمعهم جو الغرفه ويتكلمون وانا ماودي اطلع من تحت الموية الحاااارة وكنت اوجه المويه على بطني وظهري وطلعت لقيتهم يبغون يكشفون وسوا لي كشف عورتني والله
قالت لسى انا من بعد 2 سم ماعاد سألتهم كم اصلا طول الوقت احس انهم يكذبون علي او يصرفوني كانوا يسوون كل شي ويخلصون ويتكلمون بين بعض وزوجي يقولي لسى
وطلعوا قلت اسمعني انا ماعاد اقدر اتحمل المسكنات ماتنفع جيبوا الأبرة بأي طريقه والدكتورة كذابه هذا طلق وراح قالوا طيب بنطلعها الحين لغرفة الولادة وكلموا الدكتورة اللي بتضربني الأبرة
وجاتني مدوايف طول ماأنا أتألم هي واقفه سانده جسمها على الدولاب اللي مقابل لي وتطالع فيني أتألم نرفزتنيييييي ولاجاني طلق قلت خذوا عقلك وصديت عنها وقمت اتلوى
وهي تجيني قالت بسوي كشف قلت طيب يالطييييييييييف الظاهر دخلت راسها مو يدها حتى ماقدرت اخذ نفس عورتني بشكل مو طبيعي وطلعت يدها اصابعها كلها دم
وانا فيني بكوة واطالع بزوجي اقول هذي اش سوت يدها كلها دم انصدم زوجي وبحلق بعيونه يوم شاف الدم وماهو عارف يتصرف وجهه اسود ومرتبك ويروح ويجي 😳
وتجمعوا على الجهاز وانا مو يمهم أتألم ومعطيتهم ظهري قالوا يالله نطلعها للغرفه طلعوني جلست شوي قلت هاه الأبرة وينها ؟
قالوا خلاص بتجي الحين وعندي قابلتين يتكلمون عربي خفيييف ويقولون كلاااس هبيبي ( خلاص حبيبي ) ويمسحون على يدي وانا امسك يد زوجي واعصرها بكل قوتي واتحايله تكفى الأبرة بسرعه ماعاد فيني
فجأة احس اني ادفع تركت زوجي تركت كل شي وربي احس روحي بتطلع احس بشي لاشعوري بيطلع وانا اعصر نفسي لاإرادي وكنت ادفع وراسي يطيح على ورا وعيوني تقلب
وتجيني مرة ثانية واحس بدفع احط يدي تحت اقول بيطلع بيطلع احس بدفع وريقي ناشف وفيني المووت انهد حيلي وكل اللي عندي استغربوا مايدرون شسالفه
شوي احس بدفع مرة ثانية وشي يصب واقول شي نزل وزوجي مايدري وش الطبخه وهم مايفهمون وش اقول ويحاول يترجم لهم وهي تجي تبغى تكشف قالت الموية نزلت
وهي تصيح تقول ولادة وقاموا يتناقزون ونزلوا السرير اللي تحت رجولي ورفعوا اللي عند ظهري صرت جالسه وجابوا عدتهم
قلت الأبببببببببببببببببببببببببببببببببرة !!
قالت كلاس هبيبي مافي ابرة فيه ولادة قلت يالملاعين هذي آخرتها 😉
قلت حسبي الله عليكم
قالت يالله فيه ألم دوفي وانا صرت ادف في صدري اعععععععععععععع
وتهاوشن وسكتتها الثانية قالت لالا اسمئي فيه ألم خذي نفس وادفع من تهت وانا منهد حيلي مافيني للدفع قالوا يالله والله اني اتعصر وادفع وهم تشجيع
يالله يالله قوووووه قووووه يالله قوووووه قوووووه قوووووه 😉
انهد حيلي وطحت وسكتوا وجاتني الطلقه واحاول وعجزت قلت آي كانت بوش وهم يضحكون قالوا تتكلمين انقلش جلست اطالعهم واطنش واحاول اتعصر
وجابوا لي موية وشربوني شوي اشوا يوم بليت ريقي صرت احاول وتقول يالله شوفي شعر يالله
وتجيب مرايه واشوف يمااااااااااااااه شي لايوصف لاالمنطقه ولا الشعر شي غريب هي تبغى تحمسني وانا تنحت من المنظر
واحاول ادفع مادري وش صار يوم شفت المنظر ومن التعب الطلق شغال واانا احس المنطقه تحت تخدرت ويبست انا صرت اقول لها شوفي فيه طلق ولالا عشان ادفع
وهي تدخل علي دكتورتي وجهها مخطوف جايبينها من بيتها اظن الساعه 12 قالت حصل ايه وتلبس لبسها وتقولي يالله ادفعي فجأة مع الدفع حسيت راسه طلع من الحوض لكن مو راضي يفتح من تحت
قالت لي لازم اسوي لك توسيع قلت لو تبين تشقين راسي شقيه بسرعه المنطقه احسها بتتقطع انا كنت معارضه التوسيع لكن اكتشفت انها رحمه
وسوت لي توسيع قالت يالله ادفعي واحاول مرتين وطلع اخيرا وجسمه زلق وراه زي الصابونة وانا مبحلقه عيوني من اللي صار كله واش هذا اللي طلع مني سبحااااااان الله ➡
كانت لحظة تأمل اكثر مما هي فرحه شي حي طلع مني وشالوه والدكتورة تسحب المشيمة وطلعتها وتبداء تخدر المنطقه وتخيطني وانا اناقز من الألم قالت جيبوا ولدها تلتهي فيه
والله جابوه لي وصدق التهيت فيه ومو مصدقه ان هالشي طلع مني وأني أم وكذا
وزوجي بيتشقق ويقول ترا والله مالي ذنب في الأبرة ولاني متفق لا تفهمين غلط وانا اشمق فيه 😆 hy:
وهو محزن علي وخايف من ردت فعلي
وقوموني ورحت الحمام الله يكرمكم والمدوايف معي لبست وتبغى تشوف الدم لاقدر الله نزيف او شي والحمدلله كويس وجابوا لي أكل
مالي نفس آكل قلت بكلم أمي وكان الوقت بالسعوديه 3ونص تقريبا مسكينه نايمه وخرعتها
قلت يمه انا جبت ولد قالت هاه كذابه قلت والله واخذ زوجي الجوال وكلمها وصدقت
وشوي الا خواتي يدقون ويرسلون طيرت نوم العائلة
وبعد كذا ماعاد ادري وش صار متى طلعوني وكيف طلعوني وكيف وصلت غرفتي ماذكر ولا شي ياانهم ضاربيني ابرة ولا مادري وش فيني
ماقدرت انام ليلتها كل الأحداث تدور براسي اما زوجي جابوا له سرير وانواع المشاخر 🙂
المنطقة من تحت رايحه فيها ألم مو طبيعي كأنها مرضوضه وماقدر اقرب منها يادوب اصب الموية
نفسي اشوف لكن ماعندي مرايه راح زوجي البيت وقلت سو لي قشر قهوة وجيب مرايه صغيرة
وماقصر جا وجايب ثلاجه قشر وثلاجه حلبه ولاب توبي وأول ماجا قلت هات المرايه اوروح اشوف تخيلوا اش شفت !!!!!!!! ❗
تخيلوا طلع الأخ شقق الدنيا من غير توسعه الدكتورة لقيت شق بالجهة الثانية والدكتورة مخيطته هذا غير البواسير اللي هلكتني الحمدلله على كل حال
جلست بالمستشفى 4 ايام وكانوا يحممون البيبي وينادوني اشوف عشان اتعلم <~ لو يدرون عني كيف احممه الحين سفرة وطشت وشغل عدل مدل
أكل المستشفيات تعرفون سامط ومافيه طعم لكن بعض الأشياء حلوة وطريقه التقديم شي والخدمه روووعه
ويوم جينا نطلع جابوا لنا هديه ودبدوب
وهذي الهديه صورتها

ولبست البيبي وهو يستفرغ ويوسخ الدنيا وارجع ابدل ملابسه من جديد
شوفوني اكرف مايمديني احك راسي يادوب تغفي عيني وربي اصحى على صياحه أنسى اغسل وجهي والله يعين لانوم زي الناس ولا حتى اقدر اهتم بصحتي زي الناس
ووقفت الحلبه استخدمتها بس 10 أيام لأني اعرف انها ترخي الارحام عاد مايحتاج اكيد هو نازل خلقه ومع الكرف اظن شوي ويسير على الجيرآن
ماأستخدمت غسولات معتمده على التجفيف وبالبدايه كنت البس فوط والحين بس مناديل الرول عشان مايتحسس الجلد وماأكتم الجرح مرة
مااستخدمت الا كريم ميبو مرتين باليوم والحمدلله بدت تلتأم وطاحت الخيوط اللي برا لكن مكانها ألم مو طبيعي وأحس بضغط لا وقفت كأن شي بيطيح اما اللي جوا الظاهر فيه خيطين لسى ماطاحت
وآكل رشاد مع التمر الحمدلله وطول ماأنا آكله ماشفت الإمسآك ماشاء الله

الحين لاشفت زوجي منسدح رحت أولده وأقوله يالله قوووه قوووه <~ يقول مهوب منك والله من اللي شفتيه 😉