قصتي ومعاناتي في ولادتي يارب ماتجربوها

كلامي حيكون كثير اتحملوني بليز

كتبتو ولمن قربت اخلص علق النت واتمسح كل شي ومصره اني اكتبو عشان ارتاح

انا عندي مستخدم تاني بس حبيت افتح مستخدم جديد وابدء حياه جديده هنا..

انا عمري 22 متزوجه من سنتين ونص ربي ماكتبلي بالحمل غير لمن دخلت السنه الثانيه بفضل ربنا ثم استخدام الكلوميد حملت

طبعا مررررررررررررره كنت مبسوطه وفرحانه

الحمدلله في الشهر التاني عرفت انهم توام ومرررررررررره انبسطت وحمدت ربي

في الاسبوع 12 طلبت مني دكتورتي في الاطباء المتحدون اسوي اشعه للرحم وتشوف عنق رحمي
والحمدلله كان عنق رحمي كويس
بس كان واجب على دكتورتي تربطلي رحمي لاني بكريه وحامل في توام ..رحمي ماراح يتحمل طفلين من اول مره..
الله يسامحها ماربطتلي ..وهادا السبب بهدلني وهدم حياتي..

مرت الايام والشهور وسرت في الشهر الخامس الحمدلله وطبعا من يوم حملت وانا مريحه ما اتحرك ولا اشتغل دا كلو خوفا على حملي..

يوم صحيت من نومي لقيت دم ينزل مني ..؟؟

كلمت دكتورتي في الاطباء المتحدون قالت رووحي اقرب مستشفى طوارئ ..

رحت لعرفان لانه جنب بيتي..وقالولي انو المفروض يكون عنق الرحم 3 ونص سم..بس انا كان 1 سم مره قصير

وماينفع يعمولو ربط لانو احتمال ينزلو الاطفال

اتنومت عندهم 5 ايام وفي يوم قررو ينقولني لفقيه لانو اكبر مستشفى في جده عندو حضانات
..
رحت ولقو انو رحمي فتح 3 سم وكل يوم ينزلوني كشك الولاده ..واسمع الحريم يزعقو ويولدو وانا بس ادعيلهم

انا في الشهر الخامس بدري عليا الولاده وطبعا عرفت انو اللي في بطني اولاد

بس رحمي فاتح…
جلست 16 يوم وانا كل يوم كدا…ارتفع ضغطي وخافو عليا من كتر التوتر كل يوم رافعين رجولي وحتى الحمام اسويه وانا فوق السرير وممرضات سعوديات يغيرولي ..اتازمت نفسيا ودقت الالم والعزاب ..

قررو في يوم وكتبولي خروج مع انو رحمي فاتح ..رجعت البيت وماكملت 7 ساعات الا نزلت عليا مويا بسيطه..رجعتلهم قالولي كيس البيبي انشق..وسار ينزل مويا

طبعا الان رحمي فتح 5 سم والكيس مشقوق حالتي مره صعبه سارو الدكاتره خايفين عليا اكتر مو الاطفال

خايفين يجيني جرثومه او التهاب لانو رحمي فاتح من 20 يوم

وانا ما اوصفلكم خوفي لنفسي ولاولادي
كل يوم يرفعلولي رجولي وما اتحرك ولا اقوم ..

في يوم الاربعاء اللي فات 16 مارس الساعه 9 الصبح
قررو ولاده لانو الاطفال بدئو ينززلو ..طبعا للمعلوميه انا حالتي ولاده مو اسلاب لانو في 23 اسبوع الاطفال مو صغار..دخلت الشهر السادس ..

نزلوني كشك الولاده ولاخر لحظه والاطفال يتولدو وهما يتحركو في بطني ووضعهم كويس ونبضهم كويس حبايبي
..
اللي ولدتني دكتوره الله لايوفقها اسمها امامه
جزااااااااااااااااااره وقلبهاحجر ولدتني بصعوبه وبالم وتزعق عليا بدال ماترحم حالي وتطبطب عليا لانو حفقد اولادي

تخيلو لمن نزل ولدي وهوا يتحرك تحط المقص فوقو تقول ماحيعيش
طيب دا انسان فيلو روح ارحمينا ..جزاره جزاره قلبها حجر ..طبعا اشتكيناها وبيحققو معاها
…………………………………
دحين اقلكم السبب اللي خلاني اكتب الموضوع

انا انكسر قلبي ..حتقولولي قولي الحمدلله دا خير من ربنا وشفعاء ليكي وربنا يحبك وكتبلك اللي فيه الخير ونصيبك كدا..دا الكلام كلو عارفتو ولا اعتراض لحكم ربنا….

بس قلبي محروق يابنات تعرفو الاحساس اللي تحسو بحركه طفلكم جوه بطنكم وبمجرد يتولد وتشوفيه مره وحده ينزل ولدك القبر من غير ماتعطيه حبك وحنانك ؟؟؟

يارب ماتجربو دا الاحساس

ياناس ضناياااااااااااااااااا حبايبي كبار وحلوين وشبه ونسخه بعض

نزلو القبر …قلبي حارقني ..اكيد انهم راحو للي احسن مني راحو عند ربنا

سميتهم عبدالاله وعبد الملك..

تعرفو كل الاحلام اللي حلمتها اعيشها معاهم ..وكل ملابسهم اللي اشتريتها وقضيتلهم كل شي اثنين اثنين زي بعض
حتى طقم النفاس حق المستشفى فصلته ..

ياناس كل شي يذكرني فيهم

جسمي وبطني والتشققات وحليب صدري..حتى اكلي اقول اول كنت اكل عشانهم واخاف عليهم بس دحين اكل عشان مين ؟؟؟

كل شي يذكرني ويبكيني

لمن اشوف جسمي وشكلي وملابسهم يااااااااااااااااا الله صبرني

تعرفو الشعور لمن ادخل المستشفى وفي بطني ولدين ولمن اخرج من عندهم ومافي بطني ولا واحد

..؟؟..؟؟..

يابنات ماسارلي اسبوع وكل يوم ابكي كل يووووووووووووووووووووووووووووووووووووووووووووووم انام ببكى واصحى من نص نومي ببكى

سرت اخاف انام ما احس بامان

اقول اول كانو في بطني احس بامان دحين مره اخااااااف

يالله يابنات ادعووووووووووووولي ربي يبرد قلبي وينسيني والله مره صعب صعب صعب لانهم مو صغار

اللهم لا اعتراض لحكمك قدر الله وماشاء فعل

انا قلت دا الموضوع لاني احس نفسي بانفجر

لاني كابته نفسي قدام اهلي وزوجي

انا كتومه
احس نفسي بانفجر قلت افضفض هنا ويمكن بدعوه منكم ربي يبرد قلبي

ياااااااااااااااااارب يااااااااااااااااااااااااااااااااااااااااااارب يارب يارب ربي يتمم حملكم كلكم ويرزقكم بالاطفال السليمين
وماتشوفو اللي شفتو انا

اختم كلامي بدعوتين ….

((ربي اني امنت بقضائك وقدرك..فامنحني نسيان “مايؤلم نفسيتي“))

((يارب نسني وبرد قلبي لكل مايبكيني من حنين لمن هم لديك تحت التراب))