عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله..
هذا موضوعي السابق وحبيت أكملكم قصتي مع التنظيف (كحت الرحم) بموضوع مستقل
وان شاء الله ما ثقلت عليكم وطولت السالفه بس حبيت اي وحده عنده خبره تفيدني وتساعدني..
أو أي وحده تمر بحالتي ممكن تستفيد والله يعافي ويشفي الجميع يارب ..
وهنا الرابط
http://satfrequencies.com/girls/alfrasha13/thread1464213/
هذا موضوعي السابق وحبيت أكملكم قصتي مع التنظيف (كحت الرحم) بموضوع مستقل
وان شاء الله ما ثقلت عليكم وطولت السالفه بس حبيت اي وحده عنده خبره تفيدني وتساعدني..
أو أي وحده تمر بحالتي ممكن تستفيد والله يعافي ويشفي الجميع يارب ..
وهنا الرابط
http://satfrequencies.com/girls/alfrasha13/thread1464213/
وهذي قصتي وبكملها هنا ان شاء الله .. واتمنى الكل يرد لو بدعوه حلوه ان الله يشافيني ويعافيني ويقومني بالسلامه لأني مازلت تعبانه ومحتاجه الى الإستشاره والدعاء
اللهم لك الشكر ولك الحمد من قبل ومن بعد..
الحمد لله الذي أحياني وعافاني بعد ما أماتني وإليه النشور..
أشكر كل الخوات اللي ردو ع الموضوع بس ما حبيت أحذف الموضوع قبل ما أخبركم قصتي مع التنظيف (كحت الرحم) تحت التخدير الكامل
أنا يوم الاربعاء بعد ماخرجت من المنتدى وقفلت اللاب حسيت بنزيف شديد وقطع دم كبيره صارت تنزل مني وانتم كرامه واقول لبنتي بسرعه الحقي ابوك قبل ما يروح الاستراحه يوديني المستشفى وأنادي شغالتي تجيب لي حفاظة ولدي الصغير لاني قمت أحس بشي يمشي بين رجولي وصكيت نفسي بقوه عشان أسيطر على نفسي وحسيت بروعه وخوف شديد وقمت اقول لنفسي يارب سترك لايكون هذا الموت ..
اللهم لك الحمد يارب والبس عبايتي وتمسكني بنتي وزوجي وينزلوني مع الدرج وع السياره على طول حتى الله يهديه زوجي سيارته مرتفعه ويالله قدرت اركبها حتى يوم صرت بالشارع صار يقول تبين الاسعاف قلت لابسرعه بس. متى يجون الحق علي !!
لاحول ولا قوة الا بالله موقف ماراح أنساه طول عمري ..
وادخل المستشفى وبالكرسي على طول للطواري وتشوف الممرضه الحفاظه وانتم كرامه وتنادي الدكتوره مصريه الله يهديها بهذلتني كشفت داخلي وسوت سونار من فوق ومن تحت وقالت مو عارفه مشكلتك بالظبط ما أشوف شي واضح .. وحسيت وقتها برغبه شديده لحمام وانتم كرامه بس موقادره اقوم اخاف انزف بالحمام فسوت لي قسطره وقالت خليك ع السريرونزلت مني قطع سوداء مو عارفه وش سالفتها بصراحه حسيت أني ولدت وأنا مو حامل .
يارب سترك وتنظفني وتركب المغذي وتنادي الممرضه تطلعني ع الترقيد عشان تشوفني الاستشاريه .
وطلعت فوق وزوجي وبنتي معي وانا بالسريروافكر بيني وبين نفسي وش سبب هالنزيف لايكون ناسين شي في الرحم أو مسوين ثقب في جدار الرحم بعد التنظيف الأول أويكون تليف بالرحم أو هذا حمل خارج الرحم وهم مو عارفين السالفه والأفكار لاحول ولا قوة الا بالله تودي وتجيب وكل شي أتوقعه وأفكر فيه ووصلت غرفة الترقيد بالدور الرابع
وتجيني الاستشاريه باكستانيه كانت مناوبتها وتدخلني غرفة الكشف وتسوي أشعه للرحم من فوق ومن تحت نفس الطواري ..
فقامت تحاكيني بعربي مكسر شوي قالت أنا أشوف بالأشعه فيه كيس صغير اتوقع انه كيس مويه يروح بعد شهرين او 3 اشهر ومامنه ضرر والنزيف اللي معك ممكن يكون دوره وكان فيه بقايا بالرحم بعد التنظيف الاول نزلت معك عموما بعطيك ابر اللحين ومغذي علبه صغيره توقف لك النزيف ..
وخلتني ارجع غرفتي واعطتني مسكن قوي ابرتين مع الورك وخلتني انام ع الساعه وحده بالليل راح زوجي وبنتي للبيت بعد ماتطمنوا علي والحمدلله
في الصباح الساعه 6 جت الاستشاريه وقالت لازم أنزل أشعه في قسم الاشعه يعني تفحصني أخصائية الأشعه عشان نشوف سبب النزيف وع الساعه 8 ونص بعد الفطور نزلت وسويت إشاعه ثالثه من فوق ومن تحت ولاحظوا هذا كله صار في غضون 12 ساعه فسألت الاخصائيه عن حالتي قالت الدكتور يعطيك النتيجه ورجعت غرفتي ..
ارتحت ونمن لين الساعه 11 فجاء بعدها الاستشاري دكتور مصري اسمه ياسر وقال تعالي معي غرفة الكشف عشان أتأكد من حالتك ورحت لغرفة الفحص ولمس بطني من فوق السره وتحت وقال بسوي لك اشاعه قلت بصوت عالي تكفى لا والله من جيت باليل الا الحين هذي رابع اشاعه تكفى لا قال معليش يا أختي لازم عشان أقدر أشخص الحاله مظبوط .. وكلت أمري لربي وقلت تعبانه تعبانه خليني استسلم واسوي اللي يبونه
اهم شي العافيه ..
سوى اشاعه من فوق وشاف الكيس وقال هذا كيس بويضه عادي يروح بعد فتره من حاله قلت يعني تكيس ع المبيض ولا ايش قال لا هذا غير.. قال هذا مو سبب النزيف لازم اسوي فحص داخلي بالاشعه قلت الشكوى لله سو اللي تبيه اهم شي تريحني شافني وقال اشوف قطع صغيره موجوده بالرحم ومو مشكله هي سبب النزيف بعطيك ادويه مع المغذي ونعطيك تحميله اللحين وراح تنزل ان شاء الله ..
تعبت خواتي الفراشات اكمل بعد شوي ..
يتبع… عذرا لحد يرد الى اذا خلصت السالفه ,,
بعد كذا جت الممرضه واعطتني مضاد حيوي بالوريد وركبت مغذي صغير وراحت بعدها كلمت زوجي وقلت له السالفه ولزمت عليه يجي يكلم الدكتور ويعرف القصه مظبوط
طبعا شرح له وضعي وقاله نفس الكلام وقال بالنسبه للكيس الصغير هذا كيس بويضه يروح من نفسه واللحين بنعطيها تحميله واذا مانزلت القطعه بعد العصر يمكن نسوي لها عملية تنظيف طبعا خرج زوجي وانتظرت الممرضه او الدكتور يعطوني التحميله اللي قال عليها وعلى الساعه 2 الظهر جت الممرضه وقالت خليك صايمه والبسي القميص الابيض طبعا حق العمليه واخلعي الملابس الداخليه وسألتها قلت ليش فيه عمليه قالت مافيه معلوم وطلعت وخلتني وانا أفكر ياربي وش بيسون تحميله ولا عمليه وجلست لحد المغرب ولا أحد سوى شي بعدها جت ممرضتين وقالو يله بسرعه مدام عمليه اللحين قلت بصلي اذن المغرب قامت تصارخ وقالت لا مافيه دكتورياسر زعلان بعدين يتأخر وفيه مشكله
أنا
قلت صبر جميل والله المستعان.. يارب وكلت أمري وفوضته إليك ..
صليت ع السرير وانا متوجهه لغرفة العمليات..
اعطوني البنج بالكمام وسوى لي العمليه وصحيت في غرفتي ع الساعه 9ونص باليل
حمدت الله اللي أحياني .. بعد هالتعب والهم اللي عشته من بكره الصباح جاني الدكتور ع الساعه 7 وقال لي كيفك اللحين وكيف النزيف؟ قلت الحمدلله لمس بطني وقال بعطيك مضادحيوي وادويه استمري عليها مدة اسبوع وان شاء الله تصيري أحسن وكتب لي خروج يوم الجمعه ومن خرجت وأنا أحس تعب في جسمي وصداع بالراس وخمول والمغص مستمر اما النزيف خف ولله الحمد ..
واللحين صحتي الحمدلله أفضل وأحسن من أول.. بس مشكلتي مو عارفه ليش المضاد ومو عارفه للحين ايش الكيس الموجود هو بويضه او كيس مويه على كلام الدكتوره ؟؟
وابغى مساعدتكم وش ممكن أخذ من أعشاب انا اللحين أشرب حلبه مع الحليب والعسل وقبلها اكل 7 حبات حبه سوداء مع مويه ع الريق وبس لاني خايفه أخذ شي يمكن يتعبني كذا كويس أولا ؟؟
وش رايكم أروح لحرمه تعالج شعبي أو خلاص ماله داعي ؟؟
الله يوفق ويعافي من ترد علي وجزاكم الله كل خير
طولت عليكم بالسالفه بس تحملوني يالغوالي مالي الا الله ثم انتم الله لايغنيني عنكم يا أحلى فراشات..
