قصتي مع حبيبي الـــــــ …ابي نصايحكم

انا اخذت معرف بنت خالتي وحبيبتي سمو الورد عشان اقدر ادخل مباشرة انا صاحبة المشكلة الاساسية واشكو لكم مشكلتي اللي مقلقتني واتمنى انكم تتفهموني لأني صج واللهي محتاجه نصايحكم يابنات ومحتاجة توجيه صحيح منكم كلكم

ما راح أبدأ بمقدمات ولا راح أطيل في العبارات سوى اني اول مرة ادخل منتداكم اللي قالوا لي عنه منتدى حلووو واايد واقدر الاقي فيه حل لمشكلتي

أبي حديثي هـ المرة من القلب إلى القلب
بافتح لكم جزء بسيط من قلبي , لأن اللي فيه تركته شكوى لربي ..

في البداية و قبل لا أدخل في صلب الموضوع

أبي أقولكم شي بسيط عني

أنا بنت خليجية عمري عشرين و الحمد لله
من صغري يا أخواتي حظي طايح
إن بكيت رحت الغرفة لحالي و طلعت اللي بقلبي
ما كان فيه شي يفرحني غير جو المدرسة
صديقات – معلمات وقلبي يميل الى احداهن وهذي سالفتي سنويا
ذكرى و آآه مااحلاها من ذكرى ..

ما أحس بطعم الفرح الا اذا بدأت المدارس
إيه و الله , في هذا الوقت تزداد ثقتي بنفسي قيـمة .. !!

تخيلوا معي يا بنات , طول عمري الـ 20 سنة اللي هي عمري الحين
ما بكيت بسهولة , كنت قوية وشايفه حالي كثييير على زميلاتي بالمدرسة
الحمد لله كنت على ثقه تامة بنفسي وجمالي وشكلي وشطارتي وكل شي
اذا شفت القهرر من احدهم ماكنت أجمع بقلبي كنت افجرها على طول بوجوهم وارتاح ..
مثل القنبلة هذا أنا بالضبط .. !!
الحين خلصت مدرسة ودخلت الجامعه والحمد لله طبعا لقيت كم واحد اعجب فيني او بالاحرى حبوني
بس مثل ماقلت لكم انا ماعندي حظ بالدنيا يعني حتى يوم حبوني وبدون مااعمل معاهم علاقات والله يتفركش كل شي بس واحد منهم انا اللي رفضته وهذا الشخص هو اللي حبني بالفعل وخلى اخته تتوسط بيننا بس ماكو فايده معاي
سالفتي الاساسية هي :

يوم من الايام بداية شهر رمضان

كنت فيها مواصلة بالنت .. تخيلوا معي يوم كامل انا بالنت من الفضاوة الله يسلمكم ..

و تميت مواصلة للظهر .. ..
ما فيني نوم مرة .. لأني وقتها كنت متضايقة ..
و تعبانة شوي .. ألم نفسي و جسدي ..
لأني فقدت كل مااملك من حلمي بالرومانسيات والحب والتخيلات الحلوة مع فارس الاحلام ..
افكار يالغاليات ورى افكار تفجعني
لين كرهت شي اسمه حب ورومانسية بس الله يعين قلوب الشغوفات للحب والزواج وانشاءالله كلنا نتزوج قريب
و آآه يا حر البكا على هذا الحال المؤلم
أحس قلبي بدى يضعف , مع إني كنت أروضه ع الشدة ..
أحمده سبحانه على كل شي .. !!
المهم على نفس اليوم اللي هو من بداية رمضان..
كنت من الفضاوة أفرّ من موقع لموقع في النت ..
ما أحب اقعد فاضيه احب الاثارة والمغامرات حتى بالنت ولااحب ادخل شات ( حطوا عليها خط) لأني بالفعل ماكنت احب دخول الشات ابدا ..

موضوعي يا خواتي .. ياليتكم تقرأونه بقلوبكم الطيبة وعقولكم المتفهمه..

بعد ما فريت و حسيت بنوع من الطفش ..
مدري شلون قررت ادخل على شات وادردش شوي معاهم ..
هذا الشات طلع شات مصري .. ومنه تعرفت على عدة اشخاص وضفتهم على ايميلي
طبعا لما اضيفهم على ايميلي اتعرف عليهم واذا حسيت انهم يخرطونها على طول احذفهم واروح ادور على غيرهم بالشات .. وهكذا
الى جا اليوم اللي تعرفت علي واحد مصري شفت فيه كل انواع الاحترام
ادري بتقولون كلهم يلفون ويدورون لهدف معين بس هذا لا
شفته شخصية محترمه يكبرني ب 4 سنوات يعني كان يفهمني الغلط والصح يعلمني معنى الحب والرومانسية واذا تفتكرون انه لغرض الجنس فانتوا غلطانين لأنه ماجاب لي سالفة هالشي ابدا وانا معاه وليومكم هذا وغير هذا يبين الشخص اللعوب من الشخص الصادق بالنسبة لي ..
استمريت معاه شهر رمضان مو طول الوقت لا بس فترة الليل ومن يطلع الصبح ظهرنا من النت
عرفت منه قيمة انوثتي كبنت تحتاج مثلكم الى واحد يسندها ويحسسها بقيمتها ويدلعها
والا انا غلطانه ؟؟
ولما تعلق فيني صارحني !
يبي يتزوجني بشرط اروح اعيش معاه ببلده ومااشتغل يبيني اقعد بالبيت اشوف له بيته وعياله
مو طمعا منه انه يجي للخليج ويشتغل ونصرف عليه
صارحته بأمكانية رفض اهلي وخصوصا انه مصري ولاحتى على الاقل خليجي
بينت له ان لو ينتظرني 5 سنوات يمكن اكون كبرت وفهمت اكثر للحياه واعتمدت على نفسي ويمكن اكون بوقتها اقدر اقنع اهلي وفي الوقت اكون اختبرته بما فيه الكفايه
احبه من قلبي ولأول مرة احس بمعنى الحب طعمه يخبببل
كلام الحب يدخل القلب ع طول
غير الاسلوب الحلو في الحب
الاخلاق مع الحبيب
الوفاء والصدق والاخلاص
كلها لها اثر في نفس المحب
المهم بعد هذا كله الرجل خاف يتعلق فيني اكثر من هذا وخايف في نفس الوقت ان احنا مانكون لبعض
ودايما يكرر لي نفس هالكلام
طبعا علاقتنا تقتصر على النت فقط
اتصالات الموبايل تقتصر على رنه بس اذا واحد فينا دخل النت ومالقى الثاني
هو مايبي يكون اكثر من جذي عشان مو كل واحد فينا في المستقبل يعشق الثاني ومايقدر يستغني عن الثاني واحنا مو متأكدين بنكون لبعض او لا
ارجو انكم فهمتوني ..
بالنهاية مازلنا على هالحال الاقشر

ابي منكم نصيحة حلوة او توجيه رقيق بعيد عن المشادات والتهجم والعصبيه
ومثل مااعتبرتكم خوات لي ارجو انكم تعتبروني اخت لكم وبلاش الكلام الفاضي اللي ماله معنى للاخوات اللي بيدخلو ويتكلموا غلط