قصتي مع تأخر حملي … والسحر

الله يرزقكم جميعا بالذرية الصالحة ومايحرم احد منها

انا حابة اكتب الكم قصتي و حابة انكم تفيدوني لأني محتارة وحاسة حالي اني مكبرة الموضوع والحكاية لافيها سحر ولا شي

اول شي انا صارلي سنتين ونص تقريبا متزوجة وربنا مارزقني بالاطفال
المهم عدت حوالي5 شهور من زواجي وكل شي تمام كل شهر نقول الشهر اللي بعده …. بدأت بعديها تظهر عليا الام في معدتي وكل يوم عن يوم تزيد الالام وكنت احس بأنتفاخ ونفسي دايما استفرغ بس مابقدر وبعديها صرت كل شهر لازم اتعب وارتمي ومااقدر اعمل اي شي حاسة بخمول وتعب فظيع اقعد حوالي 5 ايام مرمية ماني قادرة اعمل شي لولا كنت اروح المستشفى يعطوني ابرة بعديها اصير كويسة
طبعا رحت لدكاترة كتير ويكتبولي ادوية وتحاليل وكلي هادا وماتاكلي من هادا على الفاضي ارتاح على الدواء وبس يخلص ارجع انتكس تاني
رحنا لدكتور قال لازم تعملي عملية منظار للمعدة وفعلا عملت العملية قلي في عندك ارتجاع في المرئ ولا مابعرف شو حكى بالزبط وكتبلي علاج معين
اخدته ولاكن برضه على الفاضي وقررت انا وزوجي نجرب اخر حل نفع الحمد لله مانفع نوكل امرنا لله وهو اني اروح على شيخ وبالفعل رحت وقعد يسألني اسئلة… المهم قال لزوجي زوجتك مسقية يعني شاربة شي فيه سحر او عمل
واعطاني خلطة فيها حليب وعسل وحبة بركة وشي اسمه قرن الحنتيت وطبعا الخلطة هادي مقري عليها وقلي خديها على 3 ايام على الريق راح تستفرغي كل اللي في معدتك واقرائي سورة البقرة اسبوع كامل…. وبدأت اخد الخلطة هادي اول يوم تعبت كتير منها واستفرغت وتاني يوم كذلك كنت استفرغ وافضل تعبانة مااقدر اتحرك جيت ثالث يوم قلي زوجي اشربيها قلتلو مااني ماخده هادا كله كلام فاضي وانا ماني حاسة بتحسن ومااخدتها ولكن بعد بأسبوع تقريبا بديت احس انو معدتي اتحسنت كتيييير وكل الاعراض اللي كانت معاية راحت بس ما اختفت يعني تقريبا بأحس فيها كل فترة وفترة بس بشكل بسيط وقلت لنفسي ياريتني اخدت الخلطة ثالث يوم كان راحت كل الاثار

لكن انا مع ذلك مااني مصدقه بالمرة اني ممكن اكون مسقية لأني قلت مين هادا اللي بدو يضرني شو انا عاملة فيه لكن الناس بقولولي بتصير وطالما انتي تحسنتي بعد الخلطة يبقى اكيد كنتي مسقيه

وطبعا خلال الفترة هادي بعد حوالي 8 شهور من زواجي قررت انا وزوجي نفحص ونشوف حالنا انا قلتلي الدكتورة معاكي شوية التهابات ووضعك كويس والرحم عندك سليم لاكن ما اعطتني اعمل تحاليل
وحلل زوجي وطلع عنده كزا مشكلة ضعف ولزوجة والتهابات
وبدات رحلة علاج زوجي مع العلاج وقله الدكتور لازم تعمل عملية دوالي تقريبا كان بعد سنه من زواجنا وعمل زوجي العملية وبعد خمس شهور من العملية في شهر 11/2008 ربنا كرمني وحملت لكن للأسف مالحقت اتهنى بعد بثلاث ايام من التحليل اجهضت والحمد لله على كل شي لكن اطمنت انو في امل اني احمل تاني
بعد بكم شهر حلل زوجي لكن نسبته ضعيفة والعملية على الفاضي وبدأ يتعالج عند دكتور متخصص وياأخد خلطات والحمد لله وضعه تحسن كتير وجسمه بيستجيب للعلاج

في يوم من الايام اجت عندي جارتي وزوجها وهيا بتكون بنت خال زوجي وقريبة زوجي هادي زوجها مركوب بعيد عن السامعين كل ماعصب الجن بركبه …فقالتلي الجني اللي على جوزي حكا عنك الاسبوع اللي فات انا بصراحة خفت كتير لما حكتلي قلتلها شو حكا عني فقالتلي بقول انك مسقية فهيا سألته مين اللي عمللها السقية هادي قريب ولا غريب قلها لا قريب فسألته من قرايب زوجها ولا قرايبها هيا فقلها من قرايبها هيا يعني حدا من قرايبي انا عاملي سحر اشربه لاوزايد من الشعر بيت وقلها انو السقية هادي هيا اللي مانعها من الحمل
قلتلها طيب ارجعي اذا حكا تاني اسأليه مين اللي عملي هالسقية وهل بيأثر على الخلفة ؟؟
وبالفعل نادت عليا تاني يوم وقالتلي مارضي يحكي مين اللي عملك اياها قال هما مابيحكه حجات زي هيك اما بالنسبة للخلفة فهيا مابتأثر
استغربت كتير من كلامها كيف قال امبارح بأثر واليوم مابأثر استعذت بالله من الشيطان الرجيم وقلت بلا تخبيص وهبل الخلفة كلها بأيد رب العالمين بلا جن بلا عفاريت

المهم قلت لأبوية على اللي صار والكلام اللي حكتلي اياه فقلي يابابا ماتردي الخلفة كلها بأيد ربنا وماتردي عليها بس سألني قلي يابابا مابتقدرو تغيره عتبت البيت هادا يعني نغير البيت كله فقلت في عقلي شو عتبه البيت هادي جديدة كمان فقلت ياشيخ هادي تخاريف الكبار وافكار الناس الكبيرة
وبحكي لأمي حكي ابوية فقالتلي اه ياماما عتبة البيت يبدو انها مش كويسة
قلتلها من وين بدنا نتأجر بيت هلأ الناس بدور على البيوت مافي شقق مافي بناء الحال واقف
بدكم الصراحة انا كمان حاسة البيت هادا منحوس وعلى قولة المصريين قدمه مش سعد
والحمد لله سلفي طلع من بيته واشترى بيت جديد ونقل فيه واحنا راح نسكن في بيته والكل متفائل انو ربنا حيرزقنا في بيته لأنه مرته ماشاء الله خلفت 5 اولاد وراء بعض في هالدار وكلها يومين وننقل على بيت سلفي وان شاء الله يكون خير علينا …

طبعا انا قبل رمضان طلبت من الدكتورة تكتبلي اعمل تحاليل وعملتها وللأسف طلع معايا هرمون الحليب مرتفع صارلي سنتين مع هالدكتورة ماكتبتلي اعمل تحاليل قالتلي طالما صار معك حمل يبقى وضعك كويس مع اني كنت اشكي كتير من وجع صدري لكن قدر الله وماشاء فعل وهيني باخد علاج لهرمون الحليب وغيرت الدكتورة اللي كنت بتابع عندها

معلشي صدعتكم بقصتي

بس حابة اسألكم ممكن البيت يكون الو تأثير في عدم الانجاب او حتى السحر وهل هالشي موجود اصلا انا مآمنه بالسحر وانو موجود بس مش داخل مخي انو في حدا عملي شي
فأرجوكم افيدوني اللي مرت بتجربة او سمعت قصة من فلانة او علانة …. الله يخليكم طلبتكم ماتخيبوني ❗

تحيـــــــــــــــــــــــــــــــــــاتي