قصة ولادتي

السلام عليكم ,, وكيف اخباركم ,,

طول فترة حملي كنت بينكم واقرأ مواضيعكم واستفيد منكم ,,

واليوم بكتب لكم قصة ولادتي ,,

كان آخر موعد لي في المستشفى يوم الخميس 172010

ولله الحمد الدكتورة طمنتني على البيبي وكان كل شي سليم

واللي اعرفة واللي سمعته من امي وعمتي ان حركة البيبي تقل في نهاية الثامن والتاسع

وقلت للدكتورة ان حركة البيبي كانت اكثر في الشهر السابع وعطتني موعد بتاريخ 472010 علشان تسويلي تخطيط

وصار يوم الاحد (( يوم الموعد)) ورحت للدكتورة قالت لي اكلتي ؟ قلت لها قبل ساعتين تقريباً قالت لي لازم تاكلين الحين علشان التخطيط اكون مضبوط

ورحت اكلت ورجعت لقيت الممرضة وحطت عليه جهاز التخطيط اشوفها تشيله وتحطة مرة ثانية بعدها قالت الجهاز خربان

غيرت الجهاز وبعد نفس الشي حطت لي جهاز ثالث وبعد نفس الشي اهني بديت اتوتر واخاف بعدها قالت لي روحي عند الدكتورة علشان تسويلك سونار

وبالفعل رحت للدكتورة وحطت عليه الجهاز وبعدها سألتني زوجك معاك ؟

قلت لها ايه بره ونزلت ادموعي لا إرادياً طلعت عند زوجي وبعدها دخلت اهي وزوجي وكانت تسأل زوجي اخبرها ؟

على طول سألتها شفيه ولدي ؟ قالت لي الممرضة حاولت وآنه حاولت بس البيبي مافيه نبض 😛

اهني حسيت آنه اللي وقف نبض قلبي مب ولدي وخصوصاً إن آنه بكرية بافي اسبوعين عن موعد ولادتي

وبعدها طلعت وامي كانت تعرف ان عندي تخطيط اتصلت عليي بس مارديت عليها لان ماكنت آبيها تسمع صوتي

اتصلت على زوجي ورد عليها قالها ان آنه للحين مادخلت على الدكتورة وآنه طلعت من عند الدكتورة ورحت مستشفى ثاني علشان اتأكد وبعد أكدو لي ان الطفل مافيه نبض

بعدها رجعت بيت ابوي وطبعاً كان الوضع مأساوي بعدها طبعاً ترقدت في المستشفى وحطو لي طلق صناعي بعد ثلاثة ايام من موت الطفل

ويوم ثاني من حطولي الطلق الصناعي تاريخ 1272010 ودوني غرفة الولادة وآآآآه من غرفة الولادة دخلت الساعة عشر في الليل وماولدت اله يوم ثاني الساعه 1 الظهر ,, وامي وزوجي وابوي واخواني مساكين كانو طول الفترة الي آنه موجودة في غرفة الولادة هم ينطروني في غرفة الانتظار

طبعاً جميع انواع الالم بتلاقيها خصوصاً ان الطفل ميت يعني مايدفع بس آنه اللي ادفع بس الحمدالله على كل حال

والحمدالله ولدت بالسلامة