قصة ولادتي والسر الي خلاني اولد قبل العاشر

السلام عليكم حبيباتي الكروشاااات 
اليوم راح احكيكم حتوته شويه مرعبه الي على وشك ولادة تطلع وإلي باقيلها كتير تقرأ للاخر —ياذكائي طيب الاتنين قدامهم ولاده 
المهم نجي للحتوته
انا حكتبلكم كل شي بالتفصيل الممل الي بتروح تتفرج العشق الممنوع اقول اقعدي ترى سمر بتموت بالاخير ومهند بياخد نهال ها خربت عليكم يلا اقعدوا اقروا— اخلصي
بسم الله الرحمن الرحيم
هادا كان اول حمل لي واختكم في الله ماتعرف ايش يعني ولاده ومرررره حماس وجا يومي الموعود وكان باقيلي 3 ايام واخلص التاسع ونفسيتي زفت ابغى اولد وجربت كل شي شربت خروع وشربت قرفه وجلست بالبانيو وعملت القرفصاء وكله كله ماكوا فايدة واخويا الصغير يقولي انبطحي واذا رفستك تولدين هع
المهم قررت خلاص اني اولد باي طريقه قبل لا اعوشر وشوفوا ايش سويت 
الخطه الجهنميه
قلت لاهلي انو انا كملت واحد واربعين اسبوع والجنين ماتحرك من يومين اهلي انفجعوا وودوني المستشفى على طول وقلت للدكتوره على اخر دورة ليا عاد انا قدمت اسبوعين هههه المهم جات تكشف تشوف الجنين يتحرك او لا وانا اقول للبيبي ياويلك لو تحركتي نامي يابنت نامي لاتفضحينا خلينا نطلعك من الكرش هع
المهم الدكتورة الغبيه قالت لازم ولاده حالا وانا مبسوووطه وفجأه تكشف علي من تحت الساعه 1 الظهر وتقول ماشالله الرحم مفتوح 4سم يا حبيبي ومافي طلق ههه قامت ادتني طلق صناعي وبدا الالم معايا الساعه 3 وكان مررره خفيف زي الم الدوره يروح ويجي وانا مع اختي مبسوووطه وضحك وسواليف وتجي اختي تقلي انا حكشفلك من تحت اشوف كم فتح الرحم هع هيا دكتورة بس انا رفضت قلت والله لو تشوفي الي تحت ماتشوفي وجهي تاني والممرضه تروح وتجي تسال ها في الم وانا اقول بس خفيف وتقول يارب نزل حتتة الم عليها ههه
الساعه 7 المغرب اشتد الالم مرررره يالله والله الي يقولوا الولاده سهله وتساهيل وساعه وخرابيط اقول اخرموا تراه الموووت بعينه
والله كل مايجيني الطلق اصررررخ وابكي ولما دخلت كشك الولاده عالساعه 8 ونص خلاص من جد بغيت اموووت وبست يد الدكتورة عشان تولدني قيصري بس اتخلص من الالم بس رفضت وهاتك صراخ ههه وقمت انادي اختي واترجاها تشوف من تحت خلاص بيطلع ولا لا وشافت ماشالله كل شي من تحت والله مالي 
ومازال الصراخ مستمر وجيت انزل من سرير الموت واجري الا الدكتورة والممرضات مسكوني ماخلوني والساعه 8 ونص خلاص قررت ادف اقوى ماعندي تحدي والدكتورة تحمسني يلا يلا ودفيت اقوى ماعندي ولما سمعت الدكتورة تقول الراس طلعت اغمى علي وصحيت وانا فغرفتي بعد اربع ساعات وشفت اهلي شايلين بنتي قبل لا اشوف بنتي اطالع فكرشتي راحت ولا لا واتطمنت انها تنسمت وبعدين شلت حبيبة قلبي جودي 
عمرها شهرين الحين
طيب الحين بقلكم كم حاجه الي خايفه من الطلق الصناعي اقلها الم الطلق الصناعي بس ساعتين تلات اما الطبيعي ممكن يقعد بالايام واتوقع الالم نفس الشي
ايوا امي تقول الولادات التانيه تكون اسهل 
جات وحده يمكن عمرها 45 عجوز قالت بولد ولا كانه فيها الم دخلت كشك الولاده دقيقتين وولدت ونزلت لبست سروالها وراحت البيت ههههه
تقول هادا ولدها رقم 9
لما اتصل زوجي يباركلي اول كلمه قلتها لو تبغى عيال اتزوج علي خلااااص توبه 
حبيبي انفجع هوا فلندن عشان كدا ماحضر ولادتي انشالله بسافرله هادا الاسبوع مررره متحمسه اشوف كيف راح يكون شعوره لما يشوف بنته 😆 🙂 الله يسهل لكل حامل يارب وتوته توته خلصت الحتوته