عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
فجر 25-12-1429هـ الساعة 4الفجر قلت لزوجي احس بثقل خلنا ننزل نمشي بالشارع شوي قالي انتي صاحية دحين وبعد الزن وافق نزلنا وانا يالله اشيل رجل واحط رجل مشينا لاخر الشارع العام يمكن نص كيلو وزيادة ومافي مخلوق بالشارع غيرنا ورحنا السوبر ماركت اللي جنبنا وشرينا حلويات وجلو وعلكات و…. المهم رجعنا البيت اذان الفجر وحنا بس نمشي واخونا نعسان موت صلينا الفجر ونمنا …
صحي زوجي راح دوامه الساعة 7ونص وسألني ها كيفك قلت كل اللي كان امس رااااااااح كأنه كذب .اتطمن ومشى…
فتحت عيني الساعة 1الظهر ومافيني شئ وبس لفيت وجهي للجهه الثانية الا واحس ماء حار نزل مني(الله يعزكم)نزل عليا خووووووف فظيع اتصلت على ماما وقلت تعالي دحين قالت طيب 5دقايق بس…قمت رحت الحمام (الله يعزكم) وجلست عالكابينيه مافي اي شئ نزل ولا اي الم ابد ابد وانا في الحمام دقيت على زوجي قلت تعال يمكن رح اولد.
رحت لبست وجهزت نفسي والشنطة بكل هدوء…الم مافي …خوف اكل عظامي ..جات ماما وزوجي سوا ملهوفين مستعجلين اتفاجأو مني هادية رايقة مستعدة(بس من بره) ورحنا المستوصف اللي جنبي اللي اراجع فيه كشفت مافي طلق ولا مويه ومفتوحه1سم بس قالت احسن روحي المستشفى
عاد انا مابدي اروح مافيني شئ بس زوجي اصر قلت اوكي
ابو الشباب مايعرف مكان المستشفى بالضبط بس انا بعرف وهو ضيع الطريق وانا من تحت الغطوة اضحك وساعة ياحبيباتي الين عصب قلت انا عارفة مكانها لاكن مابدي اروح مابدي اولد فيها موحلوة ولانظيفة هو ضحك بس مو من قلبه نفسه يرفعني بس الوضع مايسمح
دخلت المستشفى وهات يابكى:Dكاني مدبوحة كشفو قالت 1سم بس بندخلها وطلعت فوق والدموع اربع اربع لاني بكرية وحرام طلعو ماما معي الين السرير وخلاص سوو الازم حقنة ومحلول وتخطيط في غرفة التجهيز للولادة الله لايوريكم اياها ابدآ هذا الكلام المغرب بعدين يمكن الساعة 12 بالليل قالو مافي اي تقدم وودوني غرفتي مع وحدة بالليل بدأت احس بالم بس عادي وياحبيباتي الى ثاني يوم العصر الساعة 3جات الدكتورة وقالت انتي ولادتك يوم الثلاثاء الجاي يعني بعد اسبوع تعالي باكتبلك خروج لانو خميس وجمعة ما في دكاترة..وانا ماصدقت ابغى الفكة من ذي المستشفى القرف وجاني زوجي طلعني الساعة 4قلت بروح اتغدى بره واغير جو قال انتي مافيكي حيل.
والله والله والله وانا على باب المستشفى بدأ الطلق يقول خذي جااامد ولا تكلمت ابغى الفكة بس ورحنا جاب غدا ورحنا عند اهلي وخلاص عالاخر اذن المغرب اكلت ورجعت كل الاكل وماما سوتلي مرميه وقرفة وينسون والاشياء هذه وصارت الساعة 11 خلاص صرت اشوف الشمس بالليل الا وتلفون زوجي يرن وانا اصرخ ويرد وطلعت شخصية جدآ جدآ مهمة وسمعت صوتي 😆 hy: قالت لزوجي عسى ماشر قال المدام بتولد عندها طلق جامد ومو راضية تروح مستشفى الولادة لانها مهملة قالت قوم خدها يا التخصصي او العسكري ولو احد كلمك هنا قول انا من طرف(…؟؟..؟؟..؟؟) وانا ماصدقت اسمع اسم المستشفيات طارعقلي هذه احسن مستشفيات جدة فقلت يلا قوم دحين بروح اولد….
عاد اذا اتحبو اكمل اوكي لاكن لو الموضوع ممل انا آسفة واسكت احسن
لاتبخلو بالرد…………..
