ياهلا ويامرحبا فيكم
راح ابتدي معكم بقصة ولادتي طبعا ماأحس انو فيها اكشنات بس بقولكم عنها
من اول ماحملت ووحده من الاهل حاطه العين علي مع انو بنتها حامل معي عشان
كذا صارت بنتي دايم مستعجل في الخروج من الشهر الرابع وهي مستعجله مادري على شنو
طبعا بالرابع جاني طلق مبكر وجلست بيت اهلي شهر كامل عشان ارتاح
والحمد الله بعدها صارت اموري طيبه ورجعت بيتي
يوم جاء في الثامن بدايته جاني طلق وانفتح الرحم عندي 2سم وتنومت اسوبع بالمستشفى
عشان يخففون الطلق عني وكل ماجاني طلق نزلوني غرفة الولاده واذا خف صعدوني غرفتي
بعد ماطلعت جلس بيت اهلي الشهر الثامن الى بداية التاسع بعدها صرت اروح واجي بيت زوجي
جاء رمضان وصمت اسبوع وكان معي طلق خفيف يروح ويجي الى جاء اليوم الموعود
تاريخ 7/9 كنت في بيت اهلي والطلق صار يروح ويجي اكثر ويزيد علي بس ماعلمت احد
ماابقى امي تحاتي وسوي فوضه بالبيت المهم وقتها امي مواعده اهل زوجي بتروح تشوفهم
قلت يالله معك بروح وكان يبين علي التعب اشوي مع اني حاطه ميك اب
ورحت معها وكل ماجاني الالم قمت اروح واجي المهم يوم جاء نص الليل الساعه 12 امي قالت
بتمشي قلت بجلس زوجي من زمان ماشفته وبتسحر مع اهله
جاء وقت السحور زاد الالم كل ماجيت اقرب مااقدر تسحر زوجي وقلت له قوم بروح امشي
ورحت على انو بمشي بس ماقدرت زاد ذاك الالم وعلى طول المستشفى ويدخلوني غرفة الولادة
وتدخل الدكتورة اصبعين من يدها وتشوف كم مفتوح قالت مفتوح 4سم وعلى طول غرفة الولاده
هذا الكلام صار وقت الفجر ويالله يجلسون يدخلون ابرة المغذي ويحطون التخطيط ويلبسوني
ذاك اللبس اللي مفتوح من ورى حتى اذا بقيت اروح الحمام الله يكرمك استحي
واجلس اطالع في ذيك الساعه كل شوي متى اولد متى يزيد الطلق وجات الساعه 6 الصبح
ويزيد الالم اشوي وانادي سستر سستر عصبت علي من كثر ماانديها قامت تستغفر وتقولي
بس كلو سستر سستر قولي يارب ياحليلها شكلها مسلمه
وكل مازاد الالم قلت بموت وهي تستجن علي وصار عندي ضيق تنفس ويعطوني اكسجين
كل مازاد الالم حطوه لي بعدها قالو بنعطيك ابرة مسكن طلعت ابرة طلق عشان يزيده
وانا على عماي قلت لهم عطوني اهم شيء يسكن الالم وارتاح اشوي الا شفت الويل زاد الالم
جاء الساعه 9 الصباح زاد خلاص مااقدر صرت اسويها تحتي من الالم
يوم قاست الرحم صار مفتوح 7سم واطالع في الساعه واقول الله باقي كثير علىى مايفتح الرحم
جات الساعه 9و45 دقيقه انفتح اكثر وتجي الدكتورة وتدخل يدها وتفتح ماي الراس ويع
قمة القرف وهو يصب تحت سيل من الدماء والمياه ويزيد الطلق معي اكثر جات الساعه 10
خلاص انفتح الرحم كله الحمد الله بس باقي الدفع طبعا وقتاها كل شوي يعلموني بس
طلعت رووحهم مااعرف ادفع على تحت كلا على فوق ومن صوتي ادفع والله وقتها جبت لهم الجنون
جاتني ممرضه فلبينيه وجلست تدلكني فديتها والله اني حبيتها تهبل مع اني جننتها بس صابرة علي
يوم جاء وقت طلعة الراس جاني الاستشاري وش يبقى هذا الحين
جاء يوسع لي عشان يطلع راس بنتي والله استحيت وحطيت يدي على عيوني
المهم صب على المنطقه طهر باااااااااااااااااااااااااااارد الله يبرد عليه وعلى طول سوه توسعه المهم
وقتها قالو يالله دفعي على تحت وادفع وادفع واقول لبنتي يالله طلعي طلعي طلعي خلاص
وطلعت على الدنيا بنتي من الظلمات الى النور ويوروني اياها
وجلست ادعي ربي واحمده واشكر يوم انو بلغني بشوفتها طلع الدكتور وجلست الدكتورة
تنطف من داخل وتطلع الدم وطلعت المشيمه وانا جالسه اسمع صياح بنتي وهـ فديتها
ابقاهم يجيبونها لي بس ماجابوها راحو يرووشونها على طول
المهم بعدها جلست الدكتورة تخيطيني واشوفها وكل ماالمني شديت نفسي بعد ماخيطتني جات
وضغطت على سري وصار دم كثييييير بعد ماخلصت قالو يالله قومي تروشي عشان نوديك
غرفتك خلاص بعد الظهر وادخل اتروش وتدخل ذيك الممرضه معي الللي حبيتها وتروشني
وتصب علي ذاك الشامبو وتفرك جسمي وبعد ماخلصت عطتني الملابس والفوط الصحية ولبستني
الله يعطيها العافيه
وقالت يالله لبسي عباتك والبسها ويطلعوني فوق وعند باب غرفة الاولاده استقبلني زوجي وامي
طبعا امي مادرت الا يوم ولدت الساعه 10 ونص اتصلت عليها وابشرها بس ماصدقت واسمعها
صوت بنتي ماصدقت تقولي حاطتك عدله عندهم كيف جاك طلق مسكينه مادرت انو معي الطلق
من يوم انا عندهم المهم بعد ماستقبلوني ودتني الممرضه لغرفتي وانا على الكرسي المتحرك
يوم وصلت يالله جلست انتظر دخول بنتي علي عشان اشوفها وجابوها لي
يالبى قلبها كانت متنفخه من الطلق وجلست اصورها بعدها راح زوجي وامي البيت وجلست لحالي
واتاملها ماجاني النوم وقتها ماصدقت على الله تطلع واشوفها وكانت تشبهني طبعا بعد الخياطه جاني ترجيع مو طبيعي لوعة كبد الممرضات واثناء الطلق بعد جاني ترجيع بس الحمد الله ارتحت
هذا قصة ولادتي اللي من غير اكشنات
طبعا انا ولدت في مستشفى الحرس الوطني (مدينة الملك عبدالعزيز الطبيه)
احب اشكر الطاقم اللي ولدوني كلهم على صبرهم معي وطول فترة الطلق كانو معي بالغرفه
وعلى حسن تعاملهم ولطفهم معي ومع غيري