قصة ولادتي السهلة والصعبة

السلام عليكم
كيفكم يا أحلى فراشات ؟؟ اتمنى انكم بخير 😳
حبيت إكتب قصة ولادتي وشوي طويلة لمحبي القصص
من أول أسبوع بشهري التاسع كان عندي موعد مع الحكيمة وقالت لي إن الرحم مسكر بس رأس الجنين مش بس تحت كمان دخل الحوض وما بتوقع انك تكملي شهرك بعطيكي بحدود الأسبوعين فرحت وقلت الحمدلله خلص قرب الفرج
بعد أسبوع ع موعدي الجديد صار معي مشكله بعيادة الحكيمة وهي إن السكرتيرة إلي كانت دائماً تسجل دخولي ما قالت لي إن كارت الحكمة ( التأمين ) وقف
بس سبحان الله على حظي في هذا الأسبوع السكرتيرة كانت مشغولة فاستقبلتني سكرتيرة ثانية و قالت لي إنت كيف عم تجي و ما عندك كارت إنت هلأ صرتي مديونة للعيادة بمبلغ ٢٠ ألف $ ( والله هبلت مبلغ كبير ولو ولادة ما بتكلف هيك ) سألتها كيف مقطوع قالت مقطوع من ٤ شهور
يعني السكرتيرة القديمة كانت عم تدخلني و تسجل علي بدون ما تقول لي ولو قالت لي من ٤ شهور كنت دغري سويت الموضوع بس لأنها بنت حرام ( عذراً على هذا التعبير ) ما قالت لي المهم ما دخلت حتى ما زيد على حالي فواتير رجعوا اتصلوا فيني من العيادة وقالوا لي لازم تجي حتى تشوفك الحكيمة ( عم يأمنوا حالهم لأن إذا أي شي بصرلي برفع عليهم قضية خاصةً اني بشهري الأخير )
رجعت رحت كشفت الحكيمة وقالت لي مسكر و ما بتوقع تولدي بكير و لما سألتها ليش غيرت رأيها جاوبتني هي وخارجه فما سمعت منها شي <<<وكل أنواع التحطيم نزلت علي
هذا كان نهار الخميس ٥ شباط
نهار السبت بعد ثلاثة أيام فقت الصبح ع وجع بطني كإن الدورة بتنزل بعد شوي شربت يانسون راح الوجع قلت مش طلق الظاهر غازات ( أكرمكم الله )
نهار الأحد الصبح القصة ذاتها بس هذه المرة كان شوي أقوى و دخلت شوف إذا في دم ما لقيت شي وبعد ما شربت يانسون كمان راح الوجع وإختفى
بعد الضهر كان الطقس حلو وأنا من أول يوم بالتاسع ما مشيت غير مرتين فقلت خليني امشي برا ما دام الطقس حلو
وضهرت امشي مشيت نصف ساعة وحسيت حالي هلكت وما قادرة كمل مشي أبداً وحسيت لمعة وحده بضهري
فتت على البيت وقلت لأهلي خليني روح على المستشفى اطمن ليش لوجع إلي اجاني الصبح
رحنا على المستشفى على الطريق قلت لأهلي إذا ما كان فاتح ولا سم ما تقولوا عني شي صاروا يضحكوا أنا خفت يصير معي متل قصة الراعي والذئب ههه المهم وصلت على الطوارئ دخلوني بسرعة وكشفت علي الحكيمة وقالت مفتوح ٤ سم فرحت وخفت و بكيت
بس المستشفى إلي رحت عليها مش المستشفى إلي بتولد فيها حكيمتي فخيروني اني ابقى أو روح على المستشفى الثانية فضلت اني روح ويا ريت ما رحت
كانت الساعة ٨ المغرب لما ضهرت من المستشفى فضلت روح على البيت وبعدين بروح على المستشفى الثانية صارت الساعة ١١ قبل نصف الليل وأنا الحمدلله ما فيني الم ولا أي شي و لا حاسه بشي
الساعه ١١ ونصف قلت خلص خليني روح بكون فتح أكتر وصراحة أنا قرأت قصة ولادة وحده قالت إن حكيمة كشفت وقالت لها إن الرحم مفتوح وبعد وقت قالتلها مسكر فخفت لأن ما عندي الم إن الرحم يكون رجع سكر
بس الحمدلله إن الحكيمة كشفت بالمستشفى وقالت إنه مفتوح ٥ سم ( الحكيمة كانت مصرية مش حكيمتي عشان حكيمتي ما كانت دوريتها وكمان نسيت أقول لكم إن الحكيمة بس كشفت أول مرة باول مستشفى صار ينزل مني دم وأنا ما حبيت إني قول للحكيمة المصرية اني كنت بمستشفى المغرب حتى ما تسألني ليش ما جيتي لهون دغري وتعاملني معامله مش منيحة بس قلت لها اني بنصف شهري وإن عندي طلق ودم بس ما كانت تصدقني عشان ما عندي ألم وما عم بصرخ ) المهم بعد الكشف حولتني ع غرفة بإنتظار إن الرحم يفتح أكتر و اولد صارت الساعة ٣ وج الصبح وأنا بعدني نفس الشي بلا ألم اجت الحكيمة كشفت بعده ٥ سم وقالت لي إن رحم ما عم يفتح مثل ما بدها فلازم طلق إصطناعي وبما إن أنا ما عم حس بأي ألم وجالسه عادي نصحتني بلا ابره الضهر بس صراحة أنا خفت من الطلق الإصطناعي فطلبت ابره الظهر قبل الطلق عشان ما بدي حس بأي الم وفعلاً اجا الحكيم المختص ولما صار بده يعطيني ابره الضهر بلشت أنا حس بشويت ألم المهم أخذت الإبرة وكان الحكيم شاطر بس للأسف جسمي ما إستجاب للبنج وعمل رده فعل ضغطي وطي وما كان يرجع يعلى فأضطر الحكيم إنه يوقف البنج بس إلي كانوا دخلوا جسمي كانوا بعدهم مخدريني
وبعد نصف ساعة اجت حكيمة ثانية ومعها ممرضة وسألتني إذا فيها تكشف وأنا قبلت على طول عشان بعرف كتر الكشف بساعد على فتح الرحم كشفوا وقالوا ٦ سم ونصف فرحت بنصف ساعة فتح سم ونصف ومن الساعة ٤ و نصف ٥ راحت الحكيمة وما حدا رجع طل علي صارت الساعة ٨ وتغيروا الحكماء و أنا بعدني بإنتظار إن تجي حكيمة تكشف وتقول إنه فتح مع الطلق الإصطناعي وبدأت حس إن جسمي يرعاني دليل على إنتهاء فعاليه البنج
بس أنا الحمدلله اني الألم ما كنت أحس فيه إلا شي بسيط ولما سألت الممرضة ليش الحكيمة ما رجعت اجت لتكشف علي كان جوابها عشان أنا ما عم بصرخ استغربت و صرت صرخ واضحك طب أنا ما فيني ألم بس فيني طلق والرحم مفتوح ٦ سم ونصف يعني جسمي أنا هيك شو بعمل
اجت الحكيمة الثانية إلي استلمت بدل المصرية وكانت شاطرة كتير قالت لي إنت ما حدا شافك من الساعة ٤ قلتلها أيه
استغربت ليش حطولي طلق إصطناعي وقالت لي إنت كان لازم بس يفتحوا مي الرئيس والرحم بده ساعة وبيفتح لل ١٠ سم
وفتحتلي المي وبدأت أحس بالألم بس والله كان شي بسيط كتير يعني أحس بطلقة وأل أخ على صوت عليو بعدين خلص ما حس بشي و لما صار الطلق كتير قريب كل دقيقة بدأ التعب وفتح الرحم قسم ونصف واجت حكيمتي أنا قلت اجا الفرج الحمدلله حكيمتي موجوده
سلمت علي وسألتها إذا هي إلي حتولدني قالت أيه وخرجت
بعد شوي الممرضات قالت لي بدي منك كل ما تحسي بطلقة تدفشي
سألتها ليش إنت إلي حتولدني قالت لأ بس أنا لح جهزك للولادة أنا بكرية ما بعرف شي قلت أوك وصرت كل ما حس بطلقة إدفش إلا بعد شوي قالت لي لازم تحملي إجريكي وتدفشي وصرت أعمل متل ما قالت لي حتى ما عد فيني حيل إحمل قلم خلص وهون صرت صارخ موجوعة عن جد ولما بد دفش ما لازم أصرخ حتى تكون الدفع مظبوط وأنا عشان عام اجبر حالي شد أحس إن حنجرتي طقت وأحس من كتر الشد إن الشرايين الي بجبيني فقعت
ليش ما حطولي إلي بتحمل القدمين إلي بتكون على السرير ما بعرف
خلوني أنا إحمل رجلي وهذا الشي أخذ من قوتي
بعد ساعة ونصف من الشد و حمل الاجرين أنا خلص ما بقى اقدر اتحمل أبداً
وصارت الممرضات تعطيني معنويات وتمسك ايدي وتحطها من تحت وتقول لي حسي هون رأس الجنين وهيدا شعره وكلها دفعتين وبتولدي وأنا لما عرفت إن الرئيس بان صرت خاف إن ما شد منيح وإخنق بنوتي وصرت إدفش إدفش وما في نتيجه اجت حكيمتي وقالت لي لازم تدفعي بقوة أكثر أنا خلص كنت هون استسلمت قلت لها إذا ما ساعدتني أنا ما لح اولد عشان أنا مش تعبت من شد بس لأ أنا ما بقى فيني حيل اني شد يعني لما تجني الطلقة حاول اني شد بس ما في فايدة ما كنت اقدر خلص ما بقى حسيت بجسمي كله بس عام حس بألم من رأس الجنين لا قادرة الكي مؤخرتي على الفرش أحس بثقل وما عندي هايل اني إحمل رجلي صرت ابكي وابكي وقول لها خلص دخيلك خلصيني لو شق بطن ما عدت قادرة وحرام امي ( زوجة ابي وابي صاروا يبكوا علي )
وفجأة كل إلي بالغرفة صاروا يركضوا ركض و شقتني الحكيمة ودفعة واحدة خرج الرأس وسمعت صوت ( طق ) أنا هون صرت ابكي تهيأ لي إن رأس بنوتي إنفصل عن جسمها من قوة الدفعة ودفعت مرة ثانية وخرج جسمها وأنا عم اطلع عليها وقول شو منيحة ؟؟؟ فيها شي ؟؟؟
قالت لي الحكيمة لأ الحمدلله منيحة
بتعرفوا شو طلع الصوت رغم انها شقتني إلا إن ال-( طق ) كانت إنفسخ الجرح لأخر مؤخرتي
وكمان صاروا يركضوا ركض عشان دقات قلب الجنين خفت كتير
يعني لو ما خفت دقات قلبه ما كانت شقتني ويمكن كنت بعدني لهلأ عام اولد
الحمدلله اني خلصت بسلامة و إن بنوتي بسلامه ووالله اني دعيتلكم الله يسهل عليكم
ولادتي كانت سهلة ما كنت أم حس بطلق أبداً بس تعسرت بسبب الحكماء الله لا يحط حدا تحت اديهم
لو شقتني من الأول ما كنت تعذبت هالعذاب كله والله ما بعرف إذا لح عيد هذه التجربة بعدني لهلأ وأنا وجي متل إلي طالع من الأموات بس كله بهون بينتس لحظة ما حضنت بنوتي ونهار ٩ شباط ٢٠٠٩ الساعة ١١:٣٩ دقيقة كانت أحلى لحظة بحياتي
الله يسهل حملكم وولادتكم أمين يا رب العالمين