قصة ولادتـــــــــــي ..ْ

كيفكم

الحمدلله بمنـــة الله وفضله علي ولدت يوم الثلاثاء 29/1/1432

لي اسسبوعين

ومابعد صحصحت مره بس قلت ودي اكتبلكم قصة ولادتي عشااان اذا فيها شيء يستفاد منها

تستفيدون

<<لكل من يمر هنآ

بدآية قصتي بدأت يوم السبت…اللي قبل الثلاثاء<<صدق عاد

حولتني دكتورتي في مستوصف خاص للمستشفى اللي بولد فيه طبعا حكومي لانو اختي تعمل فيه وابيها تكون عندي

هذا الكلام السبت قبل الظهر طلعت من الدكتوره ورحت للمستشفى لانو بالاشعه عندهم طلعت المويه ناقصصه

ورحت انا وامي للمستشفى وهناك عاد تعرفون المستشفى الحكومي يغثونك

رحنا على طواريء النساء وكان فيه دكتوره كمخه خبله سوت لي اشعه قالت مافي شيء كل شيء كويس على انو كملت التاسع ودخلت العاشر

المهم انتظرنا لما جت الاخصائيه وقالت خلاص اطلعو وتعالو الاثنين عشان نحط لك طلق صنااعي

وطلعنا وانتظرت ليوم الاثنين ورحت الظهر الساعه 2

ورحنا للدكتوره فالعياده طبعا انا واختي وشوفو طريقة التعامل شلون اختلفت عشاان اختي تعمل معهم شويه ويشيلوني من عالارض

كشفت علي الدكتوره قالت مفتوح 1 سانتي روحي سوي اشعه اذا طلعت المويه قليله نومناك وحطينا لك طلق صناعي

ورحنا سوينا اشعه طلعت المويه قليله ورحت فوق ونومني قالولي الساعه 6 المغرب نحطلك طلق صناعي طبعا كانت الساعه 4 العصر

الموهيم رحت وسويت تخطيط وخلوني بغرفة التخطيط من الساعه 4 الى الساعه 6 وقالو روحي اكلي شيء وتعالي ورحت اكل

وجت الممرضه قالت بنحطلك شرجيه ورفضت لانو عندي التهاب فالقولون يعني بيصير ولاده ثانيه من الحقنه

وجو عندي قالو بنعيد التخطيط ونحطلك التحميله بعده ورحت مره ثانيه وعادو التخطيط وحطو لي تحميله الساعه 8 فالليل

وقعدت ضحك وسوالف انا واختي وصديقاتها واتمشى شوي واجيهم مافيني الا العافيه الين صارت السساعه 11 ونص بدا الالم شوي يجي ويروح وبان غلى وجهي قلت لاختي بروح الغرفه بنام وقمت وانسدحت فالغرفه صار الالم يجي يمسك خمس دقايق ويفك عشر دقايق وهكذا

ولما جت الساعه 2 بديت ارجع “وانتم بكرامه” كل شيء ببطني اخرشيء صار يطلع معي شيء لونه اصفر كركم من الم الطلق

ولما تمت الساعه 3 قالتلي اختي تعالي امشي ماراح انادي الدكتوره عشان تمشين خل نروح للغرفة الكشف عندها ورحنا وربي اني حاطه علي بطانيه وامشي من البرد اسناني تطق ببعض بقوه ويالله بالقوه امشي وجينا عند الدكتوره قالت مفتوح بس 3 سانتي وانا اقعد ابكي ابي اولد بسرعه وانا ارجع للغرفه واقعد من الساعه 3 الى الساعه 5 ونص وانا اتالم وكان معاي زيت ومويه مقري فيه وكنت امسح بطني وظهري فيهم واشرب من المويه لما ماعاد اتحمل الالم قلت لاختي خلاص بنروح واقوم قالت اختي اجيب لك كرسي قلت لا بمشي ونمشي ربع ساعه لغرفة الكشف وربي اسحب رجولي سحب قالو الدكتوره بغرفة الولاده ورحنا لغرفة الولاده ودخلنا وكانت الدكتوره مشغوله قلت لاختي خلاص روحي نامي انا اذا بيولودني بقولهم ينادونك

وراحت اختي وكشفت علي الدكتوره الساعه 6 الاربع وقالت مفتوح 5 ونص او 6 تبين تدخلين غرفة الولاده ونفجر كيس المويه والا تروحي تمشي قلت لا بس ولدوووني

ودخلت غرفة الولاده تبع التوليد وقعدو يجهزون الاغراض وينادون دكتور الاطفال ويجيبون اغراضهم وانا ادعي ربي يسهل علي

وادعي اني ماطول وحطوني عالسرير وفجرو الكيس كانت الساعه بالضبط 6 وقالتلي اذا فيه طلق دفي بقوه لو تكتمي نفسك 10 دقايق بس حتولدي وانا قلت ببالي دام الم الم خل اخلص واول ماجت طلقه قعدت ادفع بعدين هم قالو خلاص ارتاحي يوم جت الطلقه الثانيه وانا ادفع بقوووه وطلع الراس وبدت تشجعني وانا ادفففففففففففع بقوه لين سمعت صيحه خفيفه بس ماصاح على طول ولدي لانه كان متبرز ببطني

بس شفته اول ماطلع ونا اقعد ابكي وتهاوشني الدكتوره تقول احمدي ربك ليش تبكين

والحمدلله طلع الشيخ تتركي بعافيه الله يكمله بعافيته يارب

هاذي قصتي …

وهاذي نصايحي للحوامل خاصة البكريات..~

1/ الولاده ساعه محدده والله لو وش سويتي ماراح تولدي قبل هالساعه .. انا شربت كل شيء وكنت امشي من الثامن لما ربي كاتب اني اولد بهاليوم ولدت لدرجة مرتين يقررو لي طلق صناعي ولايصير سبحان الله ربي ماكتب

2/لاتخافين من الولاده لدرجة تهلوسين فيها ولاتهونيها انا بصراحه وانا فالطلق كنت بموت مره بس كنت اقول اكيد فيه الم اقوى وكنت اصبر نفسي لاني بكريه ماجربت فانتي ياختي البكريه ماتعرفين الالم كيف لاتسمعين كلام احد ولاتحكمين على شيء وانتي ماجربتيه..

3/اهم شيء بنات صلاة الليل وربي تريح نفسيتك انا لما خلص التاسع ماتخيلون نفسيتي صارت اشوا من قبله لاني بديت اصلي الليل واكثر دعاء..

4/ جهزي لك مويه اقري فيها ايات تسهيل الولاده وزيت وربي كان يخدرني وقت الطلق..

5/ لاتمشين كثير لدرجة التعب والارهاق لانك ماراح تتحملين وقت الدفع وبعد الولاده بتاخذين ايام تعبانه من جسمك

6/وقت الولاده لاتصارخين حاولي تعضين على شيء بس مايكون لسانك:( وياليت تكونين شاربه مويه لانك راح تعطشين مره وقبل ماتروحي غرفة الولاده روحي الحمام عشان مايركبون لك قسطره لانها تالم مره

7/ اشبعي نووووووم لانك راح تفتقدينه 🙂
…………………

طبعا انا الحين الحمدلله بخير بس الخيااااطه ووووع محومه كبدي طاح خيط واحد بس ورحت الدكتوره قلت فكيها رفضت

فالنفاس اهم شيء الاكل والراحه النفسيه وربي انها اهم من الحوايج

فيه حبوب زيت السمك صرفتها لي دكتورتي بعد 5 ايام تصفي المزاج وهي فيتامينات يعني عصفورين بحجر

اسمها اوميقا3 اللي هي زيت السمك