قصة وفاة ابوي الله يرحمه

بالبداية الله يحفظ لكم ابائكم ورحمهم دنيا وآخره
موضوعي يابنات فيه نصيحه لكم قبل فوات الأوان واتمنى انكم ترحموا ابائكم وامهاتكم

الوالد الله يرحمه كان انسان يرضي ربه بكل معنى الكلمه طول حياته مايشوف الا بيته وشغله واولاده ماهم من اللي يحبون يجتمعون ويحكون في الشياب كثير طول عمره لاهي بعمله اللي جلس نص حياته وهو يتعب عشان اهله والله اني ماأبالغ بس الله يرحمه ماكان ياخذ ويعطي معنا كنا من احترامنا له مانتناقش معاه بأسلوب همجي يعني في حدود بننا للكلام كانت ولله الحمد طلبانتنا مجابه مايحب يزعل احد من عياله ولو شاف احد يبكي يبكي معه لأنه حسااااااااااااااااس الله يسلمكم من حبي لأبوي كنا نراضيه بأي طريقه وندلعه كثيررررر ومانحاول نتشكى عنده لأنه طول حياتنا الشغل اخذ من وقته الكثير فلما ندردش معاه نخجل ولكن ليتني ماخجلت ليتني حضنته و أدلعه اكثر من أول

طبعآ عنده مرض الله يحفظكم اللي هو القلب وانسداد الشريان سووا عمليات ببلاد الخارج والحمد لله تعافى ولكن بعد مرور اكثر من 10 سنين اللي هو بوقتنا الحالي تدهورت حالته ولكن لم نكن نعلم وماقالنا عن حالته جلس مايقرب الخمس سنين بين فترة تنويم وفتره نقاهة بس ماكان يحب يجلس على تعبه كان يتعب اكثر اذا ماشاف وتابع شغله كنا نخليه على راحته مانضايقه ولكن لما يجلس ويقعد قدامي واشوفه يكح او مايقدر ينام في الليل كان ودي أقوله ليت اللي فيك فيني وأشوفك مرتاح كنت ماأبغاه يتضايق أو يحس بالعجز ولكن ليتني قلتها قبل لايتوفى ربي اكرمني اني اجلس معاه طول فترة رمضان اللي فات لأن زوجي مسافر والحمد لله على نعمتك

ولكن قبل وفاته بعشر ايام نوم في المستشفى ورحت زرته بحكم اني بمنطقة بعيدة عنهم شوي بس والله اني ماأكذب عليكم لما دخلت عليه وشفته لافف البطانيه البيضاء عليه جاني احساس انه بيفارقنا وبعدها طالع فيني قال هلا والله بنيتي حبيت ايدينه وراسه قلت لا انشاء الله طهور وشكلك احسن من اول بس تتغلى علينا شوي وانا بقلبي قهرررررررررر عليه

رجعت لديرتي بعد مرور اسبوع قبل وفاته بيوم كنا نتكلم فيه وكانت خالتي تقول الله يشفي ابوكم والله ماد رجله يوم اني رحت له لونها اصفر كانها رجل الأموات قلت الله يعطيه طولة العمر

ولكن احساسي بموته كل ماله ويزيد لدرجة اني اطالع بالسدر اقول اوديه لأمي بوقت العدة لاسمح الله ولكن اتعوذ من الشيطان الرجيم

في يوم الوفاة دخلت نمت بوقت متأخر تقريبا الساعة 4 الفجر وجاني حلم ماأنساه ان كانت حرمه عجوز تحاول تناديني وتقول لي شئ وانا ابعد عنها خايفه منها ولكن لم انسى شكلها
دق علي باب شقتي الساعة تقريبا 6 وربع الصباح الا خالتي تقول لي ابوك تعبان وييغونكم عنده هناك
في هذي اللحظه كل البيت صحى ورحنا له وحنا بالطريق اوهم نفسي انه تعبان ويودع او يحتضر وانا في قرارة نفسي حاسه انه فارقنا دخلت البيت لقيت الوالدة مصدوووووووووووووومه وتبكي بهاللحظة تأكدت وماني مصدقة احاول اهدي امي واخواني ولكن مالقيت اللي يهديني ويبرد حرتي كيف مات توني مكلمته البارح ويقول انه بيطلع اليوم او بعده قالو يكح وضاق عنده التنفس وتوقف قلبه الله يرحمه ابكي وابكي وابي اشوفه واسلم عليه قبل صلاة الظهر خذو امي وانا واختي ورحنا لمغسلة الأموات عشان نودعه الوداع الأخير
لقيناه مكفن مو فاتحين الا وجهه الوالده صابره ولله الحمد ضحكت وباسته ودعت له وان يكون راضي عليها وانا حبيته مع راسه ودعيت له (اللهم باعد بينه وبين خطاياه كما باعدت بين المشرق والمغرب اللهم نقه من خطاياه كما ينقى الثوب الأبيض من الدنس اللهم اغسله من خطاياه بالماء والثلج والبرد) واشم فيه ريح المسك اللي مافارقت نقابي يوم كامل

الحمد لله كان مبتسم ودفنه اسهل واسرع مما يكون ولكن جلست فتره اتندم ليتني وليتني لكن زارني في حلمي انه مره يضمني ومره كان خجلا لأنه لم يعطيني حقي في جلوسي معه ولكن اسأل الله ان يرزقه الجنه

يابنات الأب نعمة لا تحاولون تخجلون مثلي اقضي اكثر وقت ممكن مع ابوك وقولي له اللي بقلبك امانه يابنات فراشه لاتهملونهم حبوهم مع رجولهم وايدينهم وأسألوهم يوميا اذا هم راضيين عليكم والله لو يرجع الزمن كان قبلت قدم ابوي وطلبت منه السماح بتقصيري معه