قصة نجآتي واغلى ماعندي الحمدلله على كل حآل

السلآم عليكم ورحمـــة اللـــه وبـــركــــآتــه
أخبآركــم إن شاءالله بخيـــر وعآفــــيه
ورمـــضآن كريـــم والله يتقبل منا ومنكم صآلح الاعمآل يااارب
.
.
.
.
الحمدلله الذي انجآني انا ومن معي من المــــوت الحمدلله لك يارب على العافيه والسلآمة
حبيت اكتب لكم قصة نجآتنآ ولطف ((الله)) بنـــــآ ,وقبل اكتب القصة يآخواتي والله العظيم
اننـا غآفاين بهالدنيا نطلع ونضحك ولآهين عن اشياء كثيررررة والمووووت اخر تفكيرنا
انا شخصياً قسسسم بالله العلي العظيم اني مستبعده الموت وكل شي راح يصير لي واللي معي
الحمدلله انا ماني راعية معاصي الحمدلله بس الغفله ذبحتنا

.
.
.
فـــي يوم الاربعاء 19-6-1431هـ السآعه 5 العصر
عندي إختبآر التحصيلي بالجامعه وربي كنت انتظر هذا اليوم بشكل لآنه يحدد مصيري
ولمآ جى هذا اليوم المشؤوم تجهزت وراحت معي اختي وبنت عمي واتصلت بي صديقتي قالت ابروح معتس
قلت طيب تجهزي المهم والله العظيم يابنات اني احس احسآس غريب بس تعوذت من الشيطان قلت اكيد هذا
من خوفي من الأختبار لآاكثر ولآاقل المهم ركبنا السياره اخوي قدام عمره 10 سنه الله يحفظه قلت له
انا ابركب قدام قال لالا انا ابي اركب وركب جنبه اخوي الثاني 3 سنوات يارب احفظه وابوي اللي يسوق طبعاً
وانا وبنت عمي واختي وصديقتي ورا المهم مشينا على بركة الله بالسيارة كنت اسولف مع صديقتي بشويش
وكنت اقولها يوووة الجامعه بعيدة شوي وابوي الله يحفظه مشغل شريط اناشيد ومستانسين ولله الحمد
وحنا ماشين وقدامنا إشارة وجنبنا سيارة صهريج ماء كبير الا يلف بقوة قدامنا آآآآآآه بسسسسس كل ماتذكرت
المنظر بكيت المهم لف بقوة مااعطى ابوي يهدي يشوف حل وقدر الله ونصدم فيه بكل قووووووووووووووووة
ياربي رحمتك صرآخ ابوي بكى اختي ياربي لطفك ورحمتك ابوي لما شاف مافيه امل على طول دف اخواني
الصغار اللي قدام تحت مكان الرجول لآنهم صغيرين وتمت الصدمة بكل قوة بكل وحشيه آه والله كل ماتذكرت حالنا
ابكي من قلب ياربي لك الحمد على كل حال طبعاً لما صارت الصدمه اختي من قو الصدمة نطت قدام وطاحت
على اخواني وانا وبنت عمي وصديقتي ماتحركنا من اماكنا بس بنت عمي ضربت المرتبه بقوة وانا مااذكر شي
احسه كأنه حلم وابوي ياربيه ياربي لاتحرمني منه هو موقفه اقوى مننا لآنه عياله مايدري فيه احد
من عياله مات ولآلآ..؟بنت اخوة وبنت جارنا اللي هي صديقتي جد صعبه على طووول ابوي يصارخ
انزلوا انزلوا بسررررعه انا احس اني صاحيه وبنفس الوقت احسه حلم مابكيت ولا شي عادي جداً شعوري
وبنت عمي جتها صدمة وجلست تصارررخ وصديقتي تبكي واختي مالها حس نزلوا كلهم تجمعوا العالم كثير
انا جلست اسحب اخواني اللي طاحوا تحت واشوف الدم على وجيههم ويدينهم قسم بالله مابكيت ولا شي
واشوف اختي طايحه ماتتحرك ولا شي ايقنت جد انها ماتت جلست اصارخ فلااااااااانه والله ماتت شوفوها
والرجال كانوا يسحبوني سحب وانا اروح لها وهم يردوني اخر شي طحت بالآرض وجت صديقتي وهي
تبكي تقومني طبعاً اول ماصار الحادث وقف شاب الله يجزاه الجنه هو ووالديه يارب تجزاه كل خير
والله العظيم الى الان ادعي له من كل قلبي ومانسيناه وربي رجال بمعنى الكلمة الله يسعدة وقف سيارته
وعلى طول بدا يركبنا واحد واحد ابوي حبيبي اغمى عليه آآآه ياربييييه ياعساكم ماتشوفون هذا الموقف
اعز ماعندي بهالدنيا اشوف حالهم كيذا اختي ماادري حيه او ميته ابوي مغمى عليه من الصدمة اخواني
ملطخين بالدم بنت عمي تبكي بكاء يقطع القلب صديقتي توئم روحي متأثرة من الصدمة ….
اللهم آجرني في مصيبتي واخلفني خيراً منها يارب …..
ركبنا كلنا مع الشاب وودنا للمستشفى بتسألون عن راعي الصهريج طبعاً هج الله لايوفقه غلطان علينا
وربي لاتلوموني يوم ادعي عليه سبب لي رعب تخيلوا 3 شهور من بعد الحادث ماطلعت جاني خوف ورعب
بس ابكي ,نرجع للحدث ووصلنا للمستشفى واول ماوصلنا تجمعوا الممرضين والعالم
ياربي لطفك ورحمتك اول مادخلنا المستشفى اللي بالسرير واللي بكرسي يدخلونا المستشفى
لما دخلنا كان عمي طالع تخيلوا شدة الموقف لما شافنا جلس يصارخ ويبكي لالالالا وش فيكم
آآه ياربي والله بنات عجزت اكتب من دموعي ,والله العظيم ان اللي بالمستشفى يبكون من قو اللي شافوة
طبعاً حبيبت قليبي وعمري امي كانت بالبيت وهي وخواتي الباقيات مادرت ولا شي …
بالمستشفى اخذونا واشعه وحاله حاله انا اول ماحطوني ع السرير جلست ابكي بقووووووووة
ابي اشوفهم وش صار عليهم لآن اللي اذكره اختي تعبت مرررررره وماادري عنها من دخلنا
صار لنا 2 ساعه ماادري عن احد تخيلوا الموقف ياربي رحمتك طبعاً جو كل عماني وقرايبنا وجيراننا
والمستشفى كله رجال واللي هداني شوي جت مره كبيرة بالسن ياعساة لطولت العمر وللجنه يارب
ضمتني وجلست تقرا علي وتهديني اخر شي رحت لأختي اشوف وش صار عليها كانت تتكلم الحمدلله
وبنت عمي اشوا الحمدلله هدت وصديقتي جو كل اهلها وشلموا علينا وشافوها والمستشفى امتلى ناااس
ومرت عمي جت وهدتنا الله يعافيها ويخلي لها عيالها آمين يارب وبعد 2 ونص طلعنا للبيت مع عمي
وابوي ماطلع لآنه بيشوفون صدره لآن الضربه ع صدره من الدركسون بعد ماتطمنا عليها كنت مصرة انه
يطلع معنا وقال الدكتور بس بنشوف هو مافيه شي ياربي لك الحمد بعد ماتطمنت طلعنا انا واخواني واختي
وبنت عمي مع عمي للبيت وصديقتي اخذوها اهلها …وحنا بالسيارةكنت ضامه اخواني وابكي اخاف يصير لنا
شي بعد تتصل علي امي اكثر من مليون مرة
وحلف عمي اني ماارد يقول اكيد بتبكين وتتوقع ان احد مات او فيه شي لاتردين وانا والله قلبي يتقطع ابي
اطمن امي اننا بخير انا واخواني وابوي مافيه احد مات الحمدلله المهم اخر شي رد عمي عليها من جوالي
كانت تبكي ابي روح قال عمي خليتس قوية صابرة روح طيبه بالله الكلام هذا مايشكك ان احد مات ؟؟
انقهرت من عمي هذا كلام وامي جلست تصارخ وتبكي والله ان روح ماتت يارب عوضني وسكرت
قبل نوصل قال عمي لنا اضحوا ولاتبكون عشان امكم مايصير لها شي المهم لما دخلنا
امي جت تركض وتبكي وتضمنا وتحبنا واحد واحد كانت مرت جارنا ياعساه للجنه والله يخلي لها ولدها
كانت داريه بالحادث قبل امي قالها زوجها وراحت لآمي عشان مايصير لها شي جارتنا ذي
اول ماشافت امي جلست تبكي ماتحملت وامي تسألها وش فيتس عسى ماشر ؟ وكانت ساكتة
وبعد مادرت امي من ابوي كانت تقول لجارتنا بالله مين اللي ميت ..؟ ياربي اربط على قلبي
وجلسنا مع امي ونضحك وانا والله فينا بكى بس متحمله عشان امي الساعه 8 طلع ابوي الحمدلله
وكلن جى جماعتنا وقريبنا وخالاتي وعماتي والله العظيم كل من جى جلس يبكي مو مصدق ان الحمدلله
مافيه احد مات لآن يابنات صورة السيارة مرة رايحه فيها واللي يشوفها يحلف مافيه احد عايش ياربي لك الحمد
والحمدلله ابوي خف صدرة واختي ظهرها اخذت اسبوع ماتتحرك وبعدين الحمدلله تعافت
واخواني الحمدلله طيبين وانا وصديقتي الحمدلله بس بنت عمي جتها صدمه نفسيه تأثرت منها بس تبكي
وانا تعقدت مااطلع وبس ابكي مثل حال بنت عمي ..اسألكم بالله اللي مثلي متوقع ان راح يصير له كل ذا؟
غافلين بهالدنيا ولاهين عن كل شي ,السيارة راحت مافيه امل تتصلح لك الحمد على كل حال
والله اهم شي العافيه مافيه اغلى من العافيه …….وهذي قصة حادثنا توي اكتبه لأني
والله العظيم كل ماجيت ابكتبه ابكي عجزت اتحمل والحين قويت شوي الحمدلله….
والله يحمينا من الحوادث وكل شر وجميع المسلمين يارب …..