قصة حلوووووووه لاتفوتكم لـ بنت طموحه

هاذي رواية نقلتها لكم من باب الترفيه وتغيير جو كآبة الغربه ..الله يهون عليناوعليكم…تاااااابعوها 👿

لازم تكوني فاضيه ومعاكي شاهي عشان تحلى القصه وتفيدي وتستفيدي
………………………………………….. ……….

ـ من جدك والا تستهبلين ؟

ـ لاوالله صادقه

ـ هبااااال ,هبااااااااااال ,مجنونه والا صاحيه ؟تخلين امك وابوك يوم صارو بحاجتك ؟تتغربين بلحالك ؟

ـ ومن قالك انهم بحاجتي ,والله العظيم تمر ايام مايدرون انا ميته والا حيه

عندهم ولدهم مايشوفون بالدنيا غيره ..نوف ,صدقيني انا محد بحاجتي ,اجلس وش اسوي بالله ؟

عمري 30سنه ,عانس مااحد يبيني ..

ـ وش انتي الله يهداك محد يبيك ,من قاله ؟بكره تعرسين وتنسين ..

ـ هههههههههههههههههههههههههههههه ههه تدرين كم لي انتظر؟ياشيخه بس خليها على ربك ..
على طاري العرس ,تذكرين لمياء البنت الصغيره هاذيك اللي كانت تدرس معنا بثاني ثنوي ..

ـ وش فيها؟

ـ تصدقين ذاك اليوم شفتها بالمشغل ..

هههههههههههههههههههه معها بنتها عمرها تسع سنين وتقول ان عندها ولد بعد عمره 11سنه .ماشاء الله ..

يوم قلتلها اني ماتزوجت قعدت تضحك ماهيب مصدقه اني للحين عانس..

نوف,نوف ,نوف……..خلينا نصير واقعيين ونتكلم بشوية منطق..السفر احسن حل لوحده مثلي ,اجلس وش انتظر ؟عرس؟ مافيه امل ,وظيفه؟مستحيل

وبيني وبينك بعد قمت احس ان زوجة اخوي تتحسس من قعدتي معها بنفس البيت ,ترى مهما كانت طيبه وعسل وقلبها ابيض من حقها تعيش مرتاحه بدون مااحد يزعجها ببيتها ..

ـ سمعتي منها شي؟

ـ الكذب خيبه ,لاوالله ..بس خلاص لازم استحي واقدر من نفسي ..البشر طاقات ..

ـ خلاص قررتي السفر ؟؟

ـ ان شاء الله ..على الأسبوع الجاي بكون جاهزه وامشي يوم الأحد ..

(دخلت ام فهد زوجة اخوي وقطعنا السالفه)

ام فهد:حياك الله ينوف زارتنا البركه ,,هاتي فنجالك..

نوف:يحيك ياام فهد ,الا وش اخبارك ؟وش مسويه؟

ام فهد:اخباري تسرك ابشرك..

(نوف في محاوله يائسه)

ـ شفتي اخت رجلك الخبله وش بتسوي؟ بتسافر ديره ماتعرف فيها احد ..

ـ والله يختي اني عجزت فيها ,هي نفسها مقتنعه.. وزهره عاد اللي تقتنع فيه تمشيه غصبن على اللي مهوب راضي..

انا:اتخلى عن فكرة السفر؟انسو..خلاص قررت ..وان شاء الله ماشيه ,,,الله لايعوق بشر..

راحت نوف بيتهم وانشغلت ام فهد بعيالها وجلست انا افكر ..

ادري ان الطريق موب سهل وان كلام الناس كثير بس
ماهموني ,يحكون لين يملون ,والله ماحسو فيني وانا اموت قهر
كل ليله بلحالي ..

مايعرفون معنى كلمة عانس ..ماقد مرر عليهم يكونون((شخص غير مرغوب فيه))

يمكن ربي كتبها لي عشان ارتاح ..

مهما كانت الحياه هناك صعبه مستحيل تصير اصعب من حياتي هنا ..

كل شي حكره حكره ماناقص الا تصير شمة الهوا عيب..

رحت الجامعه ثاني يوم عشان ارتب اموري وآخذ ملفي ..وكان في راسي مواااال ثاني ..

من8لـ10 عشان اخلص كم ورقه بس ..وهاذي عادتهم مايخلونها!! كل مامريت على وحده قالت مهوب شغلي روحي لفلانه !!

خلصت وانا اتحمد واتشكر على نعمة الذوق والأسلوب ..
والله انها نعمه يفقدها كثير ويخربون على انفسهم وينكرهون بسرعه ..

طلعت وتذكرت فكرتي ..الحقيقه كنت تعبانه من طول الوقفه بس كله يهون عند اللي في بالي ..

ولأول مره اسويها في حياتي ..

دخلت على الدكتوره (نشوى) السبب الأول في كرهي للجامعه ..

ـ اهلا يازهره,ازيك؟

ـ انا طالعه بعثه وتاركة لك القسم بكبره ,كله منك.. الله لايربحك دنيا وآخره مثل ماخليتيني اكرهه..

ـ فيكي ايه يابنتي ؟انتي تعبانه؟

ـ لاابشرك اللحين جا وقت الراحه ,انتي ماتخافين الله ,اجل يصير مجموعي 42من 60وادخل الإختبار واضمن الدرجه الكامله وآخرتها f

تدرين انك حطمتيني ,وكرهتيني بالماده على حبي لها ..

ـ امتى ده؟ ياحبيبتي انا اديتك bالمستوى اللي فات؟

ـ اللي فات؟ايه, بعد ماعرفت طريقتك القذره في التعامل عرفت آخذ حقي ..انا اتكلم عن ثاني مستوى يوم جربت الرسوب اول مره في حياتي ..

تدرين انا بعمري كله ماقد رسبت الا عندك وانا متأكده اني مظلومه ..

مااقول الا اللهم اني مظلوم فانتصر..حسبي الله عليك..

ـ ايه إلة الأدب دي؟هو كدا لازم نص الشعبه تحمل الماده ,مفيش شعبه كامله تنقح..

ـ انتي وحده ظالمه ماتخافين ربك ,والا وش القانون اللي يقول هالكلام ,مافيه احد عاقل عنده مخ يفكر مثلك ..

انتي دكتوره وحسافه فيك اسم دكتوره لأنك اقل من المستوى المطلوب ..بجد انتي فري بااااد

اسمعي مني حقيقتك المره ..

ـ اطلعي برااا ,مش عايزه اسمع حاقه..

ـ لااسمعي , صدقيني بيجي يوم واجلس مكانك بس وقتها مارح اظلم ..بوقف في كل قاعه واحكي لطالباتي سواد وجهك ياظالمه ..

مااقول الا عسى كل ريال اخذتيه وتربحتي من ورانا نااار عليك في قبرك ..

الله يحرقك مثل ماحرقتي قلوبنا ..

ـ اطلعي برا ياأليلة الأدب ..

ـ طالعه بس الوعد في جهنم يانشوى,وهالمره بدون القاب..تساوت الروس خلاص..حسبي الله عليك..

طلعت واحس بالنار اللي كانت داخلي سنين طويله بردت ..والصداع اللي كان في راسي24ساعه رااااااح..

وانا راجعه للبيت مريت على اكبر محل حلويات واخذت من عنده اكبر قالب كيك موجود..

كان في نيتي احتفل بنفسي وافرح حتى لو مااحد فرح عشاني ..

جيت للبيت والوالده نايمه وام فهد في الدوام والعيال بالمدارس واخوي ماندري عنه من اسبوع, يمكن يكون مسافر ..

وقررت احتفل بلحالي وحيده ,لأني اصلاً وحيده. وبظل وحيده ,هذا هو قدري ولازم ارضى فيه ..

يقول الشاعر:
في زمان الصمت عيني عاشت الوحدة حزينه

ماتهنـت فالمنـام ولاتهنـت فالمقـامـي

بسمتي في دمعتي محبوسةٍ ماتـت سجينـه

نور صبحي منغشي في ليل معتوم الظلامـي

طبعاً الوناسه بفكرة السفر ماخلتني انام ..جلست على التلفزيون..

جاني مسج من نوف (شوفي الأخبار الديره اللي بتروحين لها بيجيهم اعصار)

ضحكت بقوه لدرجة ان عيوني دمعت, ياغباء هالبنت ..يعني بخاف ؟

وان جاء اعصار وانا عندهم وش بيصير بموت يعني؟؟

انا بصراحه مااخاف من الموت لأسباب كثيره ..

من ضمنها ان حياتي ماتعني لأحد من البشر شي ..

امي وابوي ,اخوي..كلهم بيرتاحون من همي ..

صديقاتي ,موتي بيكون لهم رحمه, من الإحرجات ونشبتي بحلوقهم على غير سنع..

وان مت ربي مارح يظلمني اكيد ,بدون ماامدح بنفسي انا اعبد ربي ومااشرك فيه ,اصلي,اصوم,باره بوالديني ..

بحسن الظن فيه واكيد انه بيعوضني خير من الدنيا واللي فيها ..

المغرب جا اخوي ..

تقهوينا وسولفنا شوي وفتح معي الموضوع ..

طبعاً احسن شي في اخوي انه موب من المهبل ربعنا..

انسان واعي وفاهم.. يقدر المرأه ويحترمها على عكس عمي ..
مع ان عمي اكبر الا اني اشوف ابوفهد اعقل ..

وهذا الشي اللي يخليني اثق ان العقل مايقاس بالعمر ياما ناس اعمارهم كبيره ..عجز, وشيبان ومايفهمون شي ..

ابوفهد: شوفي يازهره ,لاتظنين ان الغربه سهله ..

من خبره اقولها لك اول شهرين بيجيك اكتئاب وماتبدين تتعودين الا بعد اربع شهور ..

والحياه هناك صعبه وغاليه والمكافأه مارح تكفيك ..

اكيد انا بساعدك بس اعرفي اني مهما عطيتك مستحيل تكونين مرفهه وتصرفين هناك مثل ماتصرفين هنا ..

يبيلك شوية تقدير وحسن تصرف..فاهمتني؟

ـ والله اني عارفه ياابوفهد ,انا موب بزر تقولي هالكلام..

كل هالأمور انا عارفتها وراضيه فيها اهم شي اجيب الشهاده

وابيض الوجه ..

ـ اسمعي ..مارح اكون شديد مثل ابوي واقولك جيبي امتياز

ادري انها صعبه ,لو جبتي جيد, الحمدلله بعرف انك اجتهدتي وكافحتي..

ـ لاان شاء الله انا نفسي مستحيل ارضى بأقل من الإمتياز..

ـ زهره,بسألك سؤال واتمنى ماتفهمين اني ابي احطمك ,زيادة اطمئنان لااكثر ..

ـ سم ياابوفهد..

ـ انتي قادره تعيشين بلحالك ,وتمرضين بلحالك ,وتاكلين بلحالك ,وتروحين وتجين بلحالك ,وتدرسين بلحالك,وتعيدين بلحالك,وكل شي تسوينه بلحالك؟

ـ من متى ياابوفهد كان معي احد ؟

بعد العشا رحت لغرفتي وناداني اخوي ..

ـ زهره بعطيك هديه اتمنى تقبلينها ,بس هاه لاتفتحينها الا بعد ماتوصلين هناك ..

ـ طيب ابشر..

كانت علبه مغلفه وشكلها غريب ..
ونمت وانا افكر وش ممكن يكون فيها ..ساعه,قطعة ذهب,مصحف؟ بجد ماكنت ادري..

صحيت ثاني يوم على صوت الوالده ..

كانت تهاوش الخدامه عشان نست تحط الحطب في الخيمه..
جيتها وحبيت راسها ..

ـ من الصبح وانا اصحي فيك ,صاير نومك ثقيل ,مدري وشلون بتصحين بلحالك اذا سافرتي ..

ـ ههههههههههههه لاتخافين ياميمتي بشتري لي منبه صوته قوي..

ـ والله ماظنيت يفيد فيك يالخبله ,اقول بس اقعدي كود ازوجك لو متزوج.

ـ يممممممممممممممممه ,خلاص ماقلنا ماعد فيه شي اسمه عرس .الا اذا ودك تزوجين بنت ولدك زوجيها ..

ـ ومن قال اني بخليها تقعد مثلك ,ان شاء الله بزوجها بس خلها تخلص الثنويه ..

ـ هههههههههههههههههههههههههههههه ه الله يعينها بس ..

العصر جانا عمي ..

قلت لنفسي مستحيل اشوفه عشان لايحطمني ,ووصيت اخوي يقوله اني نايمه ..

بس للأسف مافاد فيه ..

جت بنت اخوي الصغيره تقول :عمي يقول صحي زهره وخليها تجي بسرعه ..

الله يستر..

ان اعجبتكم كملت..

على كرهي لــ عمي الا اني احترمه ,طبعاً موب عشانه ادري انه مايستاهل بس عشان الوالد ..

نزلت له غصبن علي,وبالطريق شفت الوالد يتوضى عشان يروح الصلاه..

ابوي: لايهمك يابنيتي ,خذيه على قد عقله قولي طيب ,وابشر ,وتامر ,خذيه على قد عقله ..

ـ ابشر ياابوي ..

وانا رايحه للمجلس اذن المغرب ..

شوي واطير من الفرحه بالأذان ,,اكيد انه بيروح يصلي وافتك منه ..

رحت المطبخ اسوي القهوه ,وصليت,وبس انتظر اسمع صكة الباب ..

اقامت الصلاه وانتهت وهو مكانه ..

معقول ماصلى ؟!!

توني اصدق كلمتهم لقالوا هم يضحك وهم يبكي ..

جت بنت اخوي الصغيره وسألتها :عمك ماصلى؟

ـ لا يكلم بالجوال ,اجل ماسمعتيه يضحك ؟ من اول ماجى يسأل عنك روحيله..

ياقلة الحيا بس ..

الرجال راحوا وصلوا وهو مكانه..واعيباااه بس ..

أخذت قهوتي ورحت المجلس وفي نيتي افشله كود يستحي ويصلي ..

انا: هلا عم ,كيف حالك؟

ـ بخير..,, وش اللي سامعه انا ؟اجل طالعة لك بعثه وبتطسين تفشلينا ..

شوفي اهون علي ادفنك حيه بس ,مااخليك تسافرين لحالك ..

ـ والله ياعمي اللي بيفشلكم موب روحتي ,اللي بيفشلكم شي اكبر ..

ـ (في ذهول) وشو؟

ـ امس دق علينا الجرس امام المسجد وطلع له الوالد ..

ـ ايه..

ـ يقول ان عندكم رجال مايصلي ,يدخل ويطلع من بيتكم

مانشوفه بالمسجد خلوه يستحي على وجهه ويجي يصلي ..

ـ (قلب وجهه الوااان) طيب كان قلتو له مريض فيه سكر ورجله منكسره ويصلي بالبيت ..

ـ لاوالله ماقلنا له ,قلنا جايته زكمه قووويه وخاف يعدي المصلين ,واول مايتحسن بيجي يصلي ..

طبعاً كل هذا وانا يدي على قلبي لايكشف كذبتي ..

سكت فتره طويله وكأنه يراجع نفسه ,كانت الوقاحه من اهم صفاته عشان كذا رجع فتح نفس الموضوع ..

ـ المهم ان مافيه سفر..البنت مكانها من بيت اهلها لقبرها ..

ـ ابشر, طيب ..

ودعته, وقبل يمشي تذكرت ان عندي مطويات دينيه ,قدمتها له وحبيت راسه وطلبت منه يسامحني لو كنت اخطيت عليه ..

الخميس كان في بالي شي مهم اسويه ,ادري انه صعب وقويه بحقي بس بجد هالشي مهم ..

زرت عمتي هند ..طبعاً عمتي هند اكثر انسان يكرهني بالعالم ..من صغري تحقد علي ..

الهدف طبعاً………والا اقول ..ماله داعي اقولكم بس ..

الهدف اني ,اني خفت تموت وانا مازرتها خصوصاً وان فيه نص صريح في الدين

[لايدخل الجنه قاطع رحم]

كانت طول الوقت تحاول تجرحني بكلام ماله معنى ..

اخذتها على قد عقلها وسايرتها ..

وطلبت منها تسامحني لو كنت اخطيت عليها بيوم من الايام ..

وانا طالعه من عندها والا داخله بنتها (ابلى ريم)>>تدرس دين..

بنات عمتي مالي أي علاقه فيهم ,من صغرنا وحنا مشاكل وطقاق ..

مسكتني بطريقه غريبه وكأنها تشحدني ..

ـ زهره ,تكفين سامحي امي ..

ـ على ايش ؟

ـ بس تكفين سامحيها ,من اول مادريت انك بتسافرين وانا ادور رقمك بقولك سامحيها ..تكفين الله يخليك ,ترا مهما كانت تراها عمتك..

ـ والله مسامحتها ,انا مسامحه كل اللي اخطو علي واللي مااخطو ,عسى ربي يسامحها دنيا وآخره ..

ـ جزاك الله خير ,ترجعين بالسلامه ..

ـ الله يسلمك ..

باقي يومين على السفر وانا ماجهزت نفسي ..

مسكت ورقه وجلست اشخبط ,,,, كتبت..

وش الشي اللي انا بحاجته ؟

1/ ثقه كبيره بنفسي واعتراف بقدراتي..

2/ ثقه بالله واحسان ظن فيه..

3/ دخل مادي ثاني ,استغني فيه عن الناس واعتمد على نفسي ..

…
وبديت افكر فتره طويله من يوم الخميس المساا لصباح الجمعه ..

وجمعت افكار كثيره براسي عن الحياه في الغربه, والطريقه اللي بتبعها في تدبير اموري..

مع الصباح سمعت صوت بزر يبكي في الصاله ..

طلعت والا ام فهد مع ولدها عبد العزيز ..

ـ وشفيكم من الصبح ؟؟

ـ هالولد من امس يبكي ,سمعنا نسولف انا وابوه عن موضوع سفرك واقلقنا ..

ـ وشفيك عبودي حبيبي ,تعال ياماما ..

،،،،،،،
جاا الولد وحظني بطريقه مؤثره وكأني امه موب عمته ..

ـ عمه لاتروحين ابيك ..

ـ حبيبي انا بروح شوي وبعدين اجي ,وانتم بعد بتجوني بالإجازه وبابا بيمشيكم عندي ..

ـ لا لا(واستمر يبكي) ,,اجل خذيني معك ..

كان موقف صعب جداً جداًعلي وعليه ..

عبد العزيز اصغر عيال اخوي

وبالنسبه لي هو طفلي المدلل ,بما ان ماعندي عيال صرت اعامله وكأنه ,وكأنه فعلاً ولدي ..

ماقدرت انام ,,كان ودي اقضي اكبر قدر من الوقت مع اهلي ,ومع عبودي اكثر.

باقي يومين بس..

الله يبارك لي بالوقت واخلص كل اشغالي ,كذا كنت ادعي ..

صلحت الفطور وجلسنا نسولف ..

كان لأم فهد اخت تدرس مع زوجها في دوله اجنبيه ,عشان كذا كانت تعطيني من خبراتها عشان استفيد ..

بجد انا احب ام فهد وموب بس احبها ,الا اغليها وكأنها اختي الكبيره ..

لها مواقف معنا مستحيل ننساها ..

الساعه عشر طلعت واخذت معي عبودي ..

ومريت على نوف ورحنا السوق عشان اشتري لي شوية اغراض للسفر ..

كنت امشي واشتري خلاقين شتويه لأني سمعت ان هالديره بردها موب طبيعي ..

وكانت نوف تقولي:ماقد شفت بنت مثلك ,كأني رايحه السوق مع اخوي ..

ماتشترين الا اهم الأساسيات.. لاعطر, لاروج ,لا لون يفتح النفس..

ـ اصلا ماعندي وقت لهالخرابيط ..لأني نسيتها من أول ماصرت في الثلاثينات ..

سكتت نوف موب عشانها ماعندها شي تقوله بلعكس ,سكتت لأنها تدري ان معي حق ..

مرينا الخياطه ,وكنت مفصلة لي عندها عبايات بألوان مختلفه لأني قد سمعت ان هالديره يتحسسون من اللون الأسود ..

اللي صار ان الخياطه عطتني عبايات صغيره مرره علي ..

عصبت عليها وشوي بعد كنت بطقها ..

ماباقي الا يومين وامشي وعباياتي خربت ..

راحت تقلب بدفاترها وهي مستغربه واكتشفت الخطا انها عطتني عبايات وحده ثانيه وخربطت لأنها نفس الوان الأقمشه ..

دخلت المحل بنت صغيره ,جميله جداً..مبين عليها مابعد خلصت الثنويه مررره صغيره ..

قلت لنفسي :ياحليلها اكيد ابوها او امها مبتعث..

وعطتها الخياطه ملابسها وطلعت ..بجد اعجبت فيها ..

جمال,اسلوب ,وكل شي مميز فيها وكأنها لبنانيه ..

خلصت من عند الخياطه واكرمتها عشان هاوشتها وطلعت ..

حطيت نوف ببيتها وودعتها وانا ابكي ,نوف بتولد قريب, وبصراحه خفت يجيها شي وتكون هالمره آخر مره اشوفها فيها ..

كنت تعبانه مررره من امس مانمت ..

رجعت البيت وقضيت باقي اليوم كله في النوووم ..

صباح السبت صحيت من بدري بدون مااحد يصحيني وكأني كنت احاول ابرمج نفسي على نظام معين ..

كانت اول مره اكوي ملابسي وارتب سريري بنفسي ..

كان البيت شبه خالي لأن الكل نايم الا انا ..

افطرت,, ورتبت شنطتي ..كانت شنطتين كبار بالإضافه للـ لابتوب..

وكنت اظن انها كثيره وكان في نيتي اختصر الأغراض واخذلي ثلاث لبسات بكيس اتخلقن فيها

بس تذكرت البرد وصعوبة الغسيل بأجواءنا حنا اللي تسمى دفا ,عاد كيف اجواؤهم هم ؟

صحى اخوي مفجوع ..

ـ ليه ماصحيتيني بدري اكلم الناس؟

يوووه ظنك نامو والا ينتظرون ؟؟

انا مواعدهم اكلمهم اليوم ..

واخذ التلفون وكلم ..بعد ساعه كامله انتهى ..

ـ يقولون رتبو الدور الثاني لك,غرفه وحمام ومطبخ ..

شي بسيط بس خليه فتره مؤقته وبعدين نلقى لك مكان ثاني ..

انا متوقع انك ترتاحين لهم عجووز بالخمسين عندها بناتها 2 وحده بالإبتدائي والثانيه بالجامعه..

وولدها ساكن مع صديقته في بيتها ..

ومايجيهم الا بالويكند ..

عاد اذا جا لاتعطينه وجه ولايشوفك اصلاً..

ـ اكيد ..

ـ والله يازهره ان هالعيله نقاوه ..

والا وين تلقين مثلهم ؟!..

لارجال ولاشي عشان تاخذين راحتك ..

ـ الله يخليك لي ياابو فهد..

كنت مرتاحه نفسياً من ناحية السكن ,لأن هالناس من معارف ابو فهد ..

بعدها جلسنا يوريني شوية صور لأصحابه عشان اعرفهم ويعطيني ارقامهم وعناوينهم عشان اذا احتجت شي ـ لاسمح الله ـ اعرف من ممكن يساعدني ..

فجأه قصر ابو فهد صوته وكأنه خاف احد يسمعه ..

ـ زهره,شوفي هاذي اسمها (جوو) بنت طيبه مره وقلبها ابيض ..

اذا بيوم طفشتي والا ضاق صدرك روحي لها ,عندها مزرعه وساكنه بلحالها ,اقضي عندها كم يوم وخبريها انك اختي وابشري بكل خير ..

ـ كيف عرفتها ؟

ـ (كأنه يحاول يخترع لي ترقيعه) كانت زميلتي بالجامعه..

ـ هههههههههههههه اكيد موب اكثر ..

ـ قلت لك زميله وبس ..الله يصلحك..

راح ابو فهد للدوام وجلست انا ارتب غرفتي,,

بديت بالأدراج وبديت اطلع اغراضي

طاح بيدي كتاب يومياتي الأخضر..

اول صفحه كانت بعنوان (الله لايفرقنا)

كنت كاتبه فيها يوميات اول يوم دوام لي في الجامعه

وكيف تعرفت على البنات ,

كان احلى ايام حياتي وبدا شريط حياتي الجامعيه يمشي قدامي ..

من اول مستوى وحبي له, لنهاية البكلوريوس, لبداية الماستر وتركي له وكرهي للقسم ودكتوراته ..

وتذكرت صديقات العمر ..وقطاعتهم لي بمجرد زواجهم ..

سألت نفسي كثير :معقول حب البنت لزوجها ينسيها اقرب صديقاتها؟

فكرت كثير اتصل فيهم قبل سفري واودعهم بس ترددت ..وشوله اذكرهم فيني وانا اصلاً ماشيه ..ولمت نفسي كثير على هالفكره ..

نظرت بمرايتي واوراق الملاحظات الي عليها..

(لاتنسين فلانه)

(لاتنسين علاج الوالد)

(لاتنسين تسألين عبد العزيز اذا حفظ سورة الفلق)

لاتنسين ولاتنسين ,ولامره نسيت شي ,,دايم اذكر نفسي بس ماادري ليش الناس عاديني من المنسيين ؟

فتحت ثاني درج وطلعت كتاب قديم ,يذكرني بكميه لابأس فيها من الغباء اللي كنت اعيشه..

كتاب طبخ لأشهر طباخ عالمي ..

مااخفيكم اني كنت ناويه اتعلم الطبخ لأني هههههههههههه, لأني كنت اقول بعد زواجي مستحيل اجيب خدامه وباعتمد على نفسي واكون اسره مثاليه..

بس اللي صار لاانا اللي قدرت اتعلم ولاانا اللي قدرت اكون
اسره مثاليه..

خلصت ترتيب الأدراج وحرقت اللي لازم ينحرق ومسحت اللي ممكن يستفيد منه غيري ورتبته..

ورحت ارتب الدولاب وجمعت كل شي زين وينقدم وفرزته بعنايه وحطيته بكراتين في المخزن ..

عشان ترسله الوالده بأقرب فرصه للجمعيه مثل عادتها السنويه..

كانت في بالي فكره تمنيت لو اقدر انفذها (بعدين اخبركم عنها)

فتحت لابتوبي وبديت اكتب الـ سي في.. باللغه الإنجليزيه ..

من يدري يمكن احتاجه؟

مع كل فقره اكتبها احس اني فخوره بنفسي ..

بجد الـ سي في.. حقي مليء بالإنجازات مثل مايحب ابو فهد يثني علي دايم ..

قدمت خمس دورات في مراكز مختلفه داخل المملكه وخارجها

,نظمت مؤتمرات كثيره

,بكلوريوس بمعدل كبير..

تدريب بعاهد ومدارس كثيره ..

اشتغلت معيده ترم كامل..

والأهم من هذا كله حفظ القرآن كامل ..

وهذا الشي الوحيد اللي ماعرفت كيف اصيغه بالسي في ..الإنجليزي..

اكيد بيقولون واذا حفظتي كتاب دينك ؟وش يهمنا؟

فتحت الرساله اللي كنت على وشك انهيها ونظرت فيها بحسره ..

مااقول الا حسبي الله على الظالم اللي خلاني أعجز حتى اكملها ..

وواسيت نفسي اني بعد ماتتحسن اموري الماليه ان شاء الله ممكن اطبعها في كتاب وانزلها في المكتبات..

بعد ماخلصت كل شي قررت اخذ لي شور ..

ناظرت في المرايه وشدني شكل شعري ,

نظرت له بشكل مقرف ..

ياكم اهتميت فيه وتحملته على اساس ان لو تزوجت اسوي تسريحه عند الكوافيره الفلانيه واصير بشكل مميز بزواجي..

وبلحظة ضعف مني قصيته كله,كله ,

…صار شعري بطول شعر عبودي ..

كذا احسن ..

كنت اردد هالكلمه وكأني اواسي نفسي على الوقت اللي قضيته وانا اعتني فيه ..

حسيت راسي صار خفيف ومريح موب ثقيل مثل ماكان ..

صليت الظهر وطلعت للصاله ..

ام فهد:وش سويتي بشعرك؟حرااااااااااااااااااااام عليك ..

انا: كذا احسن ..

ـ والله انك ظلمتي نفسك يازهره ,ياكم سمعت بنات يتمنون شعر مثل شعرك ..

ـ ام فهد اذا تحبيني صكي الموضوع ,تكفين..

ـ براحتك..

جت الوالده وناظرت فيني بإستحقار وطنشت ..

جلسنا نسولف كثير وكانت نصايح الوالده لي شوي معقده ..

لاتكلمين الرجال ,

لاتطلعين بعد المغرب,

لاتسوقين سياره

..ومن هالكلام..

اما ام فهد هي اللي استفدت من كلامها اكثر شي ..

الوالد من يومه مايحب يتدخل فيني ولا في أي شي اسويه ..

ودايم يقولي ترا اخوك ابو فهد هو ابوك من بعدي وهو المسؤول عنك ..

وبصراحه هذا الشي اللي كان مريحني ..

مالكم بالطويله ..

مرر اليوم وانا الكل يعطيني نصايح مابقى الا الخدامه تقولي وش اسوي ,

وبصراحه اكثر وسر بيني وبينكم انا مااخذت كلام احد الا ابو فهد وام فهد ..

جاا الليل ماقدرت انام ذبحني التفكير ..

بجد كان نفسي اسوي مثل الافلام وانام بحضن امي بس ادري ان امي مستحيل تعطيني وجه ..

بمجتمعنا ,,المشاعر يسمونها خباااال ..

جا الصبح ومابغى يجي ..

ماصدقت يأذن الفجر الا وقمت صليت,,

طبعاً مانمت مدري ليه ؟

ماكان خوف بلعكس ,شعور مااقدر اوصفه ..

ابوفهد انا متأكده انه هو بعد مانام هاذيك الليله يمكن يكون شايل همي ..

الصبح بدري جلس يملي علي وش اسوي بالتفصيل الممل ..

وانا اسجل ملاحظات عشان ماانسى أي شي ..

افطرنا ونزل اغراضي للسياره ..

كان الكل نايم واقترح علي ابو فهد مااصحيهم لأن الفراق صعب على قولته وبعد مايبيي عياله يشوفوني وانا رايحه وبالذات عبودي..

رحت ابوسهم وهم نايمين وانا ماسكه الصيحه ..

أخذت لي لفه بغرفتي يمكن اكون ناسيه شي ..

نظرت لها نظره عابره ونزلت دمعتي ..

مر شريط حياتي قدامي سريع ..

ياحوبي لك ياغرفتي ,كل شي فيك احبه من سريري ومخدتي لين دولابي المكسور ..

في الطريق للمطار كان ابو فهد يحاول يشغلني عن التفكير ..ويعطيني الأمل اللي انا بحاجته ..

ان شاء بترجعين بالشهاده وتصيرين دكتوره قد الدنيا,,

وبتصيرين مشهوره ,,

وانتي تخصصك نادر مافيه منه الا ميه وخمسين شخص على مستوى العالم

وصلنا المطار ..

وصلني ابو فهد لحد باب الطياره وجلسنا ننتظر ..طبعاً من الرياض لأبو ظبي ومن ابو ظبي للديره الحلم بالنسبه لي (الولايات المتحده الأمريكيه) نيوورك..

مالقينا رحله مباشره ..

المهم اعلنو عن الرحله ..

وسلمت على اخوي وحبيت راسه ..وركبت الطياره ..

حسيت بشعور غريب احسه اول مره ..حسيت اني قويه, قويه مره واني موب حاجة رجل مثل ماكنت افكر زمان ..

يازينك يالحريه ..

اقلعنا وشفت الرياض من فوق ..

الحقيقه ماجا في بالي الا شي واحد ..

حسبي الله على اللي خلاني اكرهها ..

حسبي الله على كل شخص تكلم عني بسوء..

حسبي الله على نشوى الظالمه..

حسبي الله على عمي المتخلف..

وبدت تشغلني شوية افكار سلبيه ,,

معقول بقدر اصبر على 7سنين دراسه ؟

معقول بصبر على بعد امي وابوي ؟

مرر في خيالي موقف مؤلم جداً بالنسبه لي ..

بإختصار..

مره كنت مريضه جداً جداً..

وكان يوم عيد ..

للأسف مااحد سألني وشفيك ؟

مااحد اظهر لي أي تعاطف ,,

مااحد جابلي علاج,,

مااحد اهتم ..

كلهم راحو لبيت عمي يتعيدون..

بعد ماهديت شوي رحت لحالي للمستوصف القريب ,

ودخلت من باب الطوارئ..

الكل كان مستغرب اني جايه لحالي ..

كان الدكتور مستغرب يقول: انتي وين اهلك ؟مااحد معك ليه ؟

وكنت اشوف نظرات الشفقه بعيون الممرضات ..

الحمدلله على كل حال ..

كنت اكلم نفسي وانصحها وكأني القي وحده من محاضراتي على طالباتي ,,

بنفس اسلوبي وانا احثهم على الجد و الإجتهاد بداية الفصل جديد..

كانت هالرحله سريعه شوي ..

وصلنا لأبو ظبي بسرعه الساعه 10الصباح

طبعاً الرحله الطويله كانت الساعه8 المساا..

كان ابو فهد موصيني اروح لأي فندق انام فيه وارتاح استعداداً للرحله الطويله ..

بس ماادري ليه ماحبيت هالفكره ويمكن اكون خفت انام عن الطياره وتروح علي الرحله ..

طلبت تاكسي وطلعت من المطار,,قلت ودني أي مكان اشوف فيه البحر ..شاطي ,مطعم ..اي شي المهم اشوف البحر عن قرب..

نزلت عند شاطي رائع ومكان هادي ..

تذكرت رحلاتنا انا واهلي يوم كنا نجي الإمارات في الإجازات..

كانت ايام حلوه وبسيطه والأهم كان عندي امل ..

ايه امل ..

كان عندي امل اكبر واكون سعيده واحب الحياه بس اللي صار العكس ..

بدون مااحس بنفسي رحت اركض مثل ماكنت اسوي زمان بكل براءه..

جا وقت صلاه العصر وانا مااقدر اشيل راسي من التعب ..

رجعت المطار وأخذت لي غرفه بفندق المطار كم ساعه بس ..

صليت و اكلت ونمت بعد ماوصيت وحده من البنات على الرسبشن تصحيني الساعه 6 ضروري واكرمتها ..واكيد مااعتمدت عليها ..اتصلت في ابو فهد وبلغته يتأكد اني صحيت قبل الرحله..

نمت الساعه 3ونص وماادري كيف صحيت خمس ونص..يمكن بجد خفت تروح علي الرحله ..

يمكن كنت من اول الناس اللي ينتظرون الرحله ..

رحت اشتريت لي شوية مجلات ,وشبسات ..لأن الرحله طويله وخفت اطفش بالطياره..

كلمت اهلي وقفلت الجوال وركبت الطياره..

كان مكاني جمب الشباك بالضبط ,تذكرت كلمة ابو فهد يوم يقول اذا كانت الرحله طويله لاتجلسين جمب الشباك ابداً..

اخذت بالنصيحه وبدلت مكاني مع وحده هنديه ..

وكانت هي نفسها تجلس جمب الشباك ..

المفاجأه اني شفت البنت الصغيره اللي عند الخياطه جالسه جمبي بالطياره ومعها مولود عمره بالكثير شهر..

ومعها واحد طويل, وطول الرحله بس ينفخ ..

استنتجت انه زوجها ..

انا بالوسط وبعدين هي وبعدين زوجها..

استغربت انهم مايسولفون ولايكلمها ولاتكلمه ,ساكتين ..

كان هو طول الوقت مشغول بالفلم اللي حاطينه وهي ساكته وسرحانه ..

فتحت الكيس اللي معي وعطيتها بسكوت وكان بجد ودي اتكلم معها ..

أخذته وشكرتني وسكتت..

قلبي حاس انها ودها تسولف بس مستحيه او فيه شي يمنعها ..

التفت جمبي من الجهه الثانيه والا امريكيه تقرا كتاب وش كبره..

بمجرد ماناظرت فيها ابتسمت وبدت تسولف وتسألني ليه رايحه ؟

وليه للحين بحجابك وحنا رايحين بلد الحريه؟؟

وضحت لها بشكل بسيط ومقنع ان اللي ملزمني بالحجاب اقتناعي فيه موب أي شي ثاني ..

نمت شوي يمكن ساعتين وصحيت ..

على بداية فلم جديده حطوه وتابعته ..

وتعشيت..وكملت سوالف مع الأمريكيه وعيالها الصغار ..

كانت مستغربه اني طالبة ماستروعمري30سنه ,

وحجمي صغير جداً..

وزاد استغرابها يوم قلتلها ان حنا كذا بنات نجد احجامنا صغيره ونحيفات,بالمقارنه مع نساء الشعوب الأخرى ..

كنت كل مابديت افكر افكار سلبيه احاول اطردها وافتح سالفه جديده مع هالعيله ..

حبوني بشكل مايوصف ,وهالشي كنت اقراه بعيونهم ..

واضح على البنت الصغيره ان ودها تسولف معنا بس ماشاركتنا ولابكلمه..

المهم

راح زوجها الحمام ..

ماحسيت الا وهي ماسكه بيدي ..

ـ عطيني رقمك ودي اتعرف عليك ..

ـ والله اتشرف ,بس حبيبتي هذا الرقم اول مااوصل بقفله واطلع جديد..

ـ اول مره تروحين نيوورك؟

ـ ايه والله..

ـ طيب بعطيك رقمي ,لازم تدقين علي بجد ودي اتعرف عليك..

ـ ابشري هاتي ..

ـ (…….)اسمي سلمى ..

ـ ياهلابك,,وانا زهره ..

اول ماجا زوجها قطعت السالفه والتفتت على المولود ..

اعلنوا الوصول ورنت في راسي كلمة ابو فهد ..