قصائد زفات الشاعر ابو ليان

هذي عينات منها و بامكانكم استخدام هذه العينات كمقدمات لزفاتكم

و دائما قصائد ابو ليان بصوته أحلى…

زفة عروس:
يا منورة ليلة فرحنا هلا فيك=تو النهار و موعد الشمس بكره
على لحن همسك و دقة خطاويك=بالحب نقضي ليلة العمر سهرة
كل المشاعر بالمحبة تمسيك=و من الفرح سالت على الخد عبره
انا اشهد ان الله من الحسن معطيك=حتى القمر من طلتك ضاق صدره

قصيدة من العروس لأهلها:
دمع الوداع و دمع الافراح همال=حاولت لكن عيت العين تخفيه
يوم ارمشت عيني على وجنتي سال=وهاض الشعور و بيح القلب خافيه
ليلة زفافي شوفكم يشرح البال=يبعث سروري يا هلي و افتخر فيه

قصيدة زفة مي:
أقبل شعاع الشمس و الا اقبلت مي=بس الاكيد الزين كله معاها
بارموشها ليل و على خدها ضي=سبحان من حسن الوصايف عطاها
ذي بنت ابوها اللي سقاها الغلا ري=ابو سعود بطيب فعله تباها

قصيدة زفة سنوات الضياع:
نورتي الفرح يا شمعتي =وصرتي السعادة بدنيتي
مجبور اغني لفرحتي=دامك نصيبي وقسمتي
وردك طاب =ما بين إيديا وفاح .
وقلبي ذاب=و اتهنى اليوم وارتاح

إهداء للعروس هدى:
على لحن دقات قلبي و الانفاس=غنيت موال الفرح عذب صافي
و قصايدي قالت على العين و الراس=و قامت توارد لي اوزون وقوافي
و اهديتها لك يا بعد كل ها الناس=تعبير للفرحة بيوم الزفافي
مبروك مني ما لها احدود و قياس=لك يا “هدى” و الحب بالقلب وافي

قصيدة سيرة عروس:
قصة طفولة بالفرح مغمورة=بأحروف من لون الذهب نكتبها
بأول بدايات العمر و ازهوره=ما فيه لعبة طفل ما تلعبها
عاشت على غصن الأمل عصفورة=و دور التحدي و النصر يعجبها
كبرت و جت للعلم تطلب نوره=و بالابتدائية بدا موكبها
يا دوب يدها تاصل السبورة=ناتج ثلاثة واربعة تحسبها

قصيدة زفة ليلى:
أشرقت شمس السعادة و لا بقى بالكون ليل=عمت الكون بضياها و انقلب ليله نهار
ما بقى بالزين باقي لا كثير و لا قليل=كل زينة عند ليلى ما لها اي اعتبار
بانت بروق الملامح و انكشف ليل الجديل=حركت بقلوب غيره و اشعلت بقلوب نار

وداعية عروس لأمها:
كتبت من الشعر قصة وداع الغالي الغالين=تخالط دمعة الفرحة دموع الحزن في عيني
بامان الله يا يمه يا حب (ن) مثله القا وين؟=بامان الله يا كف (ن) دفاه يدفي يديني
بامان الله يا قلب (ن) عطاني من غلاه اسنين=يا نبع من الحنان اللي زلال الحب يسقيني

زفة عريس:
طل العريس و فاحت حروف القصيد=تنثر على دربه جزيل احروفها
يا مرحبا باشراقة الصبح الجديد=ترحيبة اصحاب الكرم بضيوفها
ليا مشى خطوة ضيا الفرحة يزيد=و العين ما تقدر توخر شوفها

زفة إبتسام:
اقبلت و الكل ردد هلا بك يا ابتسام=درة (ن) بالزين تاخذ عقول الحاضرين
انجلا من نورها الليل و انزاح الظلام=كن شمس الكون معها من يسار ويمين
يوم جت غنا لها بالفرح طير الحمام=و اكتسا درب ن تمره ورود وياسمين

قصيدة زفة مها:
تفضلي يا شمعة الزين حياك=و الدرب قدامك بساتين و ازهور
نبض المشاعر ترسمه دقة اخطاك=و احلى الليالي نورك يزيدها نور
(مها) يعيش اللي بها الاسم سماك=حتى المها قدام وصفك به اقصور

زفة إبتسام:
حي الله اللي جت من الحسن تختال=سبحان منهو جامع الزين فيها
هذي ابتسام اللي لها شوفنا طال=بسم الله اكبر من نظر حاسديها
يوم اقبلت و الليل عن دربها زال=و الشوق بعيون الملا يحتريها

من العريس للعروس عند الكوشة:
لحظة لحظة قبل لنتي تجلسين=لو سمحتي دار في بالي سؤال
من سمح لك تاخذين القلب مين=ما تركتي لغيرك بقلبي مجال
و كيف حيرتي عقول الحاضرين=واعرفو من طلتك معنى الجمال

زفة حنين:
أقبلت مثل اللقا عقب الحنين=و اسقت قلوب (ن) شكت طول الهيام
و اسرقت نظرات كل الحاضرين=وحيرت بوصوفها عذب الكلام
غاب نور البدر من طلت حنين=و نورت بقدومها داجي الظلام

قصيدة تهنئة للعريسين:
وفق الله و اجتمع غالي ابغالي=و استراحت راحة يديه بيديها
اجتمع شمل الغلا بقدرة الوالي=و طاب شوف العين من نور غاليها
مابقى غصن (ن) على الارض ما مالي=و الطيور احلى القصايد تغنيها

زفة هاجر:
قولو ما شا الله وصلوا عا الرسول=و باركوا لأحلى قمر عند الوصول
هاجر الليلة مثل شمس النهار=وش نسولف عن حلاها و وش نقول
مثل نور البدر في يوم التمام=بين رمش العين و الخد الخجول

قصيدة زفة لمى:
أقبلت تمشي لمى زين و دلال=ترسل الفرحة من ارموش العيون
يوم طلت و ابتدا صبح الجمال=و انكشف من نورها ليل السكون
كل من شافك سأل نفس السؤال=يا ترى ها البنت هذي من تكون؟

قصيدة سيرة عريس:
هنا البداية و اول ايام الحياة=استشبروا مع جيته فرحة و خير
الكون كله زاد نوره من ضياه=كانت سعادة والدينه فيه غير
يسقى ضما ورد المشاعر من غلاه=و يبين فيه الخير و هو توه صغير
لو يطلب امه روحها قالت فداه=و ابوه شال من الغلا الشي الكثير

زفة أريج:
اسفرت شمس الغلا باحلى الليالي=و الفرح يروي عروق القلب غيمه
يا أريج الكل رحب بك تعالي=يا اريج الورد مع نفحة نسيمه
ما تركتي للحلا بغيرك مجالي=كل مزيونة غدت دقة قديمة

زفة أمل:
طلت امل بالحسن تختال=و الليل بالافراح مغمور
يوم اقبلت و المزن همال=و روض الفرح بالحب ممطور
والغصن من زود الطرب مال=و تفتحت لقدومها زهور
الزين ما يخطر على البال=زادت على نور الفرح نور

إهداء من العريس للعروس خلود:
من مزون المشاعر هل عذب الكلام=و ارتوى من غرامه كل ذابل ورود
ارفع اسماء التهاني لك يا أغلى الأنام=وانظم من القصايد في غلاتك عقود
الف مبروك يا أغلى من بها القلب هام=يوم ربي جمعنا للأبد يا (خلود)

زفة رباب:
أقبلت مثل اللقا عقب لوعات الغياب=أقبلت ترسم خطاها رباب بهونها
أختفت شمس المزايين من طلت رباب=كل ما قرب لها زين يقصر دونها
يوم جت خلت حلا غيرها مثل السراب=و ابتدت بنت العماني تهل مزونها

زفة عروس:
متميزة و لزينها العين ترتاح=قصة حسن تحتار فيها القصيدة
حتى ظلام الليل عن دربها انزاح=و نور الفرح جت من حلاها تزيده
و الناس كل الزين من عينهم طاح=بالزين صارت في نظرهم و حيدة

تهنئة للعريس احمد:
يسعد مسا يوم زهت فيه الافراح=باول بدايات الحياة السعيدة
مبروك لك يا احمد عدد نبض الارواح=و اسما التهاني رددتها القصيدة
العود لك يا منبع الطيب فواح=و عذب المعاني جت على ما تريده

زفة عائشة:
فاحت الدنيا و رود و ياسمين=و الفرح مثله ابد ما يوم كان
نورت بالزين كل الحاضرين=عائشة معها شعاع الشمس بان
الحلا معها من يسار و يمين=وكل قاسي يوم شاف الزين لان
تسري النظرة لها شوق و حنين=يوم بانت نورت كل المكان

زفة عروس:
مثل القمر و الحلا بعيونها بادي=و الحسن باغلى ليالي العمر لابسته
استقبلوها بريح العود والكادي=و الورد بايدينها الثنتين ماسكته
من مرته قال زينك ماهو بعادي= و ان طالعت فيه ضيع كل سالفته
الملح بوصوفها و الزين متمادي=زين الملامح بحسن الطبع جامعته

ترحيب بالحضور للزواج:
يا هلا يا مرحبا بكل الحضور=عد ما غصن بمهب الريح مال
يا هلا و افراحنا تثلج صدور=و المعازيم احضروا لاحلى احتفال
القصيدة حيرت كل البحور=و لا تريد من البيوت الا الجزال

زفة أماني:
طلت مثل بدر ن بنصف الشهر بان=يوم اقبلت تمشي بدا يطلع النور
طلة أماني كنها عود ريحان=تضفي على الليلة تباشير و اسرور
غنا لها طير الفرح عذب الالحان=وتفتحت قدامها ورود و ازهور

زفة ريم:
طلت علينا و انبهر فيها الشعر=يقول من وين ابتدي باوصوفها
يوم اقبلت تختال في ليلة عمر=كلن تمنا لو يطول اوقوفها
ريم اسمها و الناس سموها قمر=محلا اساميها و محلا احروفها

زفة الجوهرة:
الجوهرة طلت من الحسن تختال=مدري وش اللي جابها من بحرها
و احلى الليالي نورت و السهر طال=من يوم صارت جوهرتنا قمرها
الجوهرة واسمك كفى كل الاقوال=و كل الوصوف الباقية يختصرها

زفة أحلام:
طل القمر يرسم جماله بخطوات=على بساط الشوق يمشي على هون
يوم اقبلت تاخذ من العين سجات=وقدامها ماكن بالارض مزيون
في وصف زين احلام تحتار الابيات=وش تذكرون بزينها و وش تخلون

تهنئة للعروس نورة:
الكون كله صار فرحة وتبريك=والليل لابس للفرح ثوب عيده
بأحلى ليالي العمر جينا نهنيك=ونرسم لك احساس المشاعر قصيدة
مبروك يا “نورة” ويسعد لياليك=يا جامعة كل الصفات الحميدة

زفة فاطمة:
أقبلت شمس السرور و هلت امطار السعادة=يا بعد حيي و حايل شعت النور بسماها
فاطمة طلت علينا و الحلا فيها بزيادة=يوم جت باحلى اليالي للفرح ترسم خطاها
طالعة من بيت عز و طيب و امجاد و سيادة=درة ن للزين حازت و اشهد ان الله عطاها

وداعية من العروس أمل لأمها:
دمع الموادع سال مع دمع الافراح=يودع الغالين باحلى الاماني
هذي امل منها قصيد الغلا باح=تقول يمه بالحشا لك مكاني
أروح لكن واهج الشوق ماراح=يا منبع احساس الغلا و الحناني

قصيدة سيرة عروس:
طفلة(ن) كانت براءة طفولتها طموح=وردة (ن)غطا شذاها شذا كل الورود
اسمها نورة تربت على عز و وضوح=تحت نظرة والديها ربت ذيك العنود
اكبرت نورة و امسا شذا الوردة يفوح=و لا قطفها غير حر(ن)على الصيد امهدود

قصيدة ترحيب بالحضور:
يا مرحبا باللي من البعد لافين=ما فيهم اللي عن فرحنا تعذر
يا مرحبا فيهم عددها ملايين=و مهما كتبنا ما قدرنا نعبر
على زواج ابن الكرم و الكريمين=فهد و باسمه جزل الابيات تفخر

قصيدة ترحيب بالحضور:
يا هلا يا مرحبا عد ما هل الخيال=وعد من بالبيت يسعى و للكعبة يطوف
يا هلا للطيب و العود و علوم الرجال=فرحة (ن) يحتار في وصفها جزل الحروف
مرحبا و الكيف ينساق من صفر الدلال= مرحبا و الحفل نوره من اقدوم لضيوف

إهداء للعروس من أمها و خواتها:
في ليلة (ن) فيها الفرح نوّرالكون=و مشاعر الفرحة تعدت مداها
ليلة بها لأحلى عروسه يزفون=يسعد لنا الليلة و يسعد مساها
أمك و خواتك عذب الابيات يهدون=قصيدةٍ ن يطرب لها من قراها

قصيدة زفة عائشة:
طلت علينا عائشة مدري طلع نور القمر=سبحان رب ن خصها باحلى الوصوف لحالها
ما كنها الا مزنة يوم الفرح هلت مطر=لا سلهمت بعيونها و الرمش صار اظلالها
الزين فيها مكتمل ماهو على باقي لبشر=هي غاية احساس الغلا يا سعد منهو نالها

قصيدة زفة روان:
يا ضيا ليل السعادة صبحنا لا تبتدينه=خلي الليل يتغزل و البدر صيري مكانه
يا ملاك الحسن مثلك ما اقبلت بالحفل زينة=باختصار انتي بزينك بين كل البيض دانة
يا روان اللي يشوفك ما قدر يرمش بعينه=من لمح زينك و ربي ما تحرك من مكانه

قصيدة زفة وجدان:
بان القمر و الا ضيا خدها بان=و الا السعادة بدلت ليلنا نور
يوم اقبلت تمشي على الهون وجدان=و بدربها فاحت رياحين و ازهور
تقهر بلين عودها خضر الاغصان=و من حسنها تخفي حلا كل مغرور

قصيدة زفة تماضر:
نوري ليلة فرحنا يا تباشير الغيوم=و انثري وبل المحبة فوق ريضان القصيد
يا تماظر كل جالس لا بدا زينك يقوم=غير زينك ما يطالع و غير نورك ما يريد
للعيون اللي تناظر في جمالك من يلوم=كل ماردت نظرها طالعت بك من جديد

زفة نوف:
غاب القصيد بليلة العمر يا نوف=يقول اببدا وين و الا انتهي وين
ما يكفي اوصوفك تعابير و حروف=لو تنكتب فيها القصايد دواوين
لو تسألين العين عن قيمة الشوف=قالت بليا نوف وش قيمة العين

قصيدة تهنئة للعريسين
احلى الليالي نورت بين الأيام=و تعانقت فيها مشاعر حبيبن
و تحققت للقلب غايات و احلام=يوم اجتمع بالحب شمل العريسين
مبروك ما يحصى عددها بالارقام=و الله جمع بامره على الود قلبين

إهداء من العريس للعروس مروة:
لحظة….دقيقة….فديت الزين يا مروه…بقول لك شي مره مشغل (ن) بالي
ما ابيك….يا قلبي اللي ما قوى صبره…على غلاها و لا عن حبها سالي
بعطيك للي عليها الشوق من حره…ذوب خفوقي و غير باقي احوالي

إهداء من العروس لخواتها:
اعذب تعابير الفرح بين الاحباب=باحساس من صادق غلاي ابتديها
ليلة زفافي بين ناسي و الاقراب= اغلى خوات حروفهم تحتويها
حصة غلاها بين عيني و الاهداب=محلا ورود افراحنا من يديها

زفة خطابة بإسم ريم:
خطابة خطابة=جيناكم خطابة
صالح يطلب يد ريم=بشرع الله واكتابه
باحساسه شاريكم=للطيب اللي فيكم
ليا جا طاريكم=يفخر باسم انسابه

زفة عروس:
سمو باسم الله و صلو عا النبي=العروسة نورت يا حاضرين
اوصفيها يا قصايد و اكتبي=يستحيل الوصف مهما توصفين
الجبين يقول للشمس اغربي=و الجديل يقول بدري يا جبين
درة تسبي نواظركم سبي=بالجمال اللي يسر الناظرين

زفة دقو المزاهر
طل القمر ما شاء الله…وكل الحبايب قالوا
تسلم لنا ها الطلة…و احلى الأغاني شالوا

وداعية عريسين:
باعذب قصيد نودع احباب غالين=و القلب لحظات الفرح ما نساها
فاتن و عبد الله مع الحب لاهين=يسعد مساه و يسعد الله مساها
عبدالله..الله جاب لك شيخة الزين=متميزة ما احد يجاري حلاها

زفة عروس
يا طلعة الصبح الجديد و نهاره=ما بعد نورك يا ضيا حفلنا نور
عروسنا ها اليوم طال انتظاره=فرحة تعم الكون و الكل مسرور
انتي ملاك الزين و انتي شعاره=كثر الحيا يرسم على اوجونك ازهور
يا موطن اوصوف الحلا يا دياره=مبروك بيت ن بالغلا صار معمور