قراقيش قراقيش قراقيش(*مشارك في المسابقة *)

السلام عليكم
مين فينا ميعرفش القراقيش (المنين)ويحبها
انا بحبها على الفطار
المقادير
كيلو دقيق
14كيلو سمنه او زبده
رشه ملح
كوب لبن دافى
ملعقه خميرة فوريه او خميرة عاديه قد عين الجمل
سمسم
عجوة للحشو

الطريقه
ننخل الدقيق ونحط عليه رشه الملح
هنقدح السمنه(تسخن كويس بس مش تتحرق)
هنعمل حفرة فى الدقيق ونضيف السمنه

قلبيها بمعلقه عشان سخنه ولما تبرد بسيها كويس يعنى افركى الدقيق بكفوفك لحد لما يشرب السمنه كلها
مكان السمنه حمرى السمسم وضفيه للدقيق

كملى بس الدقيق
جهزى لبن دافى وحطى فيه الخميرة وضفيه على الدقيق شويه شويه واعجنى
لو حسيتى ان العجينه ناشفه ضيفى لبن او ميا بس المهم يكون دافى
اوعى تضيفى الميا او اللبن ساخن بعدين يحل العجينه ويخليها طريه
اعجنى كويس لحد لما تبقى عجينه طريه بس مش بتلزق

غطيها وسبيها تخمر
لما تخمر فرديها وحطى الحضو جواها (عجوة او ملبن)
وبعدين قطعيها صوابع وسبيها ترتاح شويه وبعدين سويها فى فرن ساخن

ودى النتيجه

الحشو جاى فيها كلها

بتيقى حلوة على الفطار ومش دسمه لان سمنتها قليله
بالهنا والشفا