عالم البنات النسائي كل ما يخص المرأة العربية من ازياء وجمال والحياة الزوجية والمطبخ
.
.
.
الى كل وحده تحس ان الدنيا تعيسه مره .. الى كل وحده تحس ان الدنيا كلها مافيها خير
الى كل وحده تحس أن هموم العالم كلها فوق راسها
الى كل وحده متضايقه .. مهمومه .. تعبانة من نفسها !!!
اليوم بتكلم عن الفرح .. عن التفاؤل .. عن الطهر ألي بقلوبنا بس مانحس فيه
عن السعادة ألي بين إيدينا بس مانشوفها .. عن الثقة .. الثقه بلي خلق هالدنيا كلها
بكتب اليوم عشاني قبل يكون عشانكم أنتم
متضايقة وعندك ضغوطات كثير .. ومشاكل كثير مالها حد ..
تعبانة من أشياء كثير .. حزينة وتبين تبكين .. ماانتي قادره تحسين بالفرح
طيب وتستسلمين لكل شي .. لكل هالتعب بتستسلمين .. وتنتظرين الفرح هو يجي لحد عندك
ماراح يجي .. أنتي اصنعية
الفرح موجود يابنات بكل مكان بس إحنا لازم نصنعه .. بايدينا نصنعه
تلقبين نفسك ( مجروحة .. بقايا روح .. بحر من الحزن ) !!
وكل ماتقرين تقرأين اشياء حزينة .. روايات حزينة .. مشاكل ..
ولما تكتبين .. تكتبين عن جرح .. عن ألم .. عن حزن .. عن تعاسة !!
ولما تتكلمين تقولين ( الدنيا مافيها خير .. الناس تغيروا .. ماعاد فيه صديقة وفيه .. ياكثر مشاكلي .. احلامي ماتحققت )
وبعد هذا كله تبين تحسين بالفرح .. كيف تحسين فيه وسط كل هالحزن ألي عايشه أنتي فيه
كيف تخلين كل شي حولك حزين وكئيب وتبين تفرحين
اذا انتي تبين الفرح لازم تصنعينه .. لازم تعرفين كيف تنقين الاوكسجين ألي حولك
لقبي نفسك باألقاب حلوه .. لما تقرينها انتي او أي احد يقراها يدخل لقلبة التفاؤل .. السعاده
أقري عن الفرح .. عن التفاؤل .. عن الثقه بالله .. عن الاشياء الحلوه بالدنيا
لما تكتبين اكتبي عن كل موقف صار لك وأسعدك حتى لو كان موقف قديم مره
اكتبي .. عن الفرحة .. عن البسمه .. عن الأمل
حتى لو كنت بقمه ضيقتي وتعبك وحزنك .. لاتزيدينها وتخلين كل شي حولك حزين وكئيب
جيبي ورقه واكتبي فيها كل شي مضايقك .. كل شي حتى لو كان تافه بنظرك
صدقوني بيطلع 90% من الي مضايقكم متعلق بالناس
فلانه قالت وفلانه سوت وفلان طفشني وفلانه جرحتني وفلانه تركتني
بسألك انتي عايشه لنفسك والا للناس
انتي عايشه لربي عشان ربي .. اتركي عنك الناس رضا الناس غايه لاتدرك
ابعديهم كلهم من تفكيرك
اجلسي جلسه صادقه مع نفسك .. بمكان لوحدك وهادئ مره .. وفكري بنفسك وكل شي مضايقك
ابعدي كل شي مضايقك متعلق بالناس وكل الي حولك
فكري بنفسك انتي .. سوي شي عشان نفسك .. اتفائلي عشان نفسك
مو حرام نفسك تتعبينها عشان الناس
ابدأي يومك بتفاؤل .. صلي اقري اذكارك .. ثقي بالله .. ثقي بربك .. بخالق الدنيا كلها
مو ربي هو الي خلق هالدنيا كلها .. وربي اكبر من كل شي .. اكبر من كل همومك ومشاكلك
لاصرتي واثقه فيه صدقيني بيهون عليك كل ضيقه وكل تعب
لما تحسين بضيقه وتعب لاتستسلمين على طول .. قومي اتحركي سوي أي شي
رتبي غرفتك .. ادخلي المطبخ سوي لو حلى .. اهم شي لاتستلمين للتفكير .. لان كل مافكرتي كل مازاد تعبك وضيقتك
بعض الناس يجيب الهم لنفسة .. لما يفتح الجريده على طول على صفحه الحوادث وهموم الناس
ولما يفتح التلفزيون على طول على برنامج يتكلم عن هموم الناس
ولما يفتح النت يبي يتسلى ويضيع وقت يفتح لك اليوتيوب وعلى مشاهد
هذا واحد ضرب ابنه .. وهاذي خدامه قتلت طفل .. وهلم جرآ
بعدين يقول الدنيا مافيها خير .. كيف تبين تحسين ان الدنيا بخير اذا انتي اساسا ماتشوفينها بخير
الدنيا حلوه وفيها اشياء كثيره حلوه بس إحنا مانشوفها
ألحين لما ترضين أمك وأبوك بيوم ماتكون الدنيا حلوه
لما يمر عليك يوم وتكونين صليتي كل الصلوات الخمس بوقتها ماتكون الدنيا حلوه
لما تفتحين المصحف وتقرين صفحه منه ماتكون الدنيا حلوه
لما تتصدقين ماتكون الدنيا حلوه
لما تدخلين السعاده على قلب أي انسان ماتكون الدنيا حلوه
لما تشترين علبه ببسي وشيبس تسالي وتجلسين تشوفين فلم كرتون ماتكون الدنيا حلوه ^^ < برآآ
مو قلت لك جيبي ورقه واكتبي فيها كل شي مضايقك ومتعبك
ألحين جيبي ورقه واكتبي فيها كل شي يسعدك ويخليك تبتسمين وتفرحين
حتى لو كان شي مره بسيط ومو شرط لما تسوينه تطيرين من الفرح
بس أهم شي يبعث بنفسك التفاؤل .. الفرح .. السعاده
اكتبي لما تصلين الفجر على وقتها .. اكتبي لما ترضين أمك ..
أكتبي لما يمر يوم من دون ماأبكي عشان احد ولاأتضايق عشان أحد
اكتبي لما أسوي شي وأنجز حاجة عشان نفسي .. عشان ربي .. عشان الجنة
أكتبي لما مااستسلم للحزن والضيقه .. وأعيش حياتي مهما صار وأفرح نفسي بنفسي
على كثر المشاكل والهموم الي حولك عيشي حياك بالطول وبالعرض
سوي كل الأشياء الي تحبينها .. وتجاهلي كل الاشياء الي تضايقك
وصدقوني .. ( الدنيا بخير إذا نبي إحنا نشوفها بخير ) ..
