عالم البنات النسائي كل ما يخص المرأة العربية من ازياء وجمال والحياة الزوجية والمطبخ
انتظرت البيت يهدأ والناس تروح ابي افضفض لكم تايهه ضايعة حاسة باحزان بداخلي
فاقدة طعم لاشياء
اكيد عرفتوا حنين وماودي اجي اكدركم بنفس المشكلة لكن وربي فيني حزن يابنات
ليلة العيد بكيت وبايام العيد اسرق نفسي خفيه كي ابكي واخرج مافاض بي من هموم
الناس مبسووطة اونا احزاني تزيد وجراحي تبكي
تعرفون من صارت بسني الخطاب يقلون وتعرفون كم مرة انخطبت والناس تنسحب
بسبب تافه مرة انتم بمدينة بعيدة مرة البنت كبيرة ولدنا يبي اصغر ..وووكثير ينسحبون بدون ادنى اعتذار ………. على كذا يمكن لان احنا مانطلع ماتلاقي احد يخطبنا خاصة الفترة الاخيرة
ومع ان البنات اقل منا ويتزوجن
المهم انخطبت من اكثر من شهرين ونفسيتي تحسنت بدرجة ماتتصوروون ..حبيت اهله وحبيت كل شي وكلموا الحريم على اهلي
وكنت ادعي ربي بالتيسير بليال رمضان لاني العام الماضي شافوني ناس ومارجعووا ولاعتذروا !!!
يعني تعامل الناس صار سئ لامراعاة ولاشي كانا مو بشر
قلت اكيد هذا الفرج وكان اكبر مني بسنوات قلت احسن ماارح يطلب صغيرة
طبعا تعرفون انتظار وقلق فترة شهرين وتاهب لدرجة وحدة من البنات توصيني على العناية والاهتمام وفعلا اعتني بجسمي وحمام بخار وو وكنت مبسووطة بشكل
بالاخير صارت الصاعقة بعد هالفترة كلهاا والاانتظار والقلق النفسي .اعتذر خاله قال معليش احنا طولنا عليكم بس للاسف عرف العمر ويبي بنت ام 23 ولاتتعدى ال 24
وهو 37 تقريبا
ماعليه حقهم بس ليش مو من البداية
ليش خاله توه يتكلم
ليش الرجال اصلا يخطب ويماطل
ياعالم اقسم بالله اني بشر ولي طاقة تعبت وربي
تايهه من اللي يصير لي
انا من هول الصدمة وتكرار الخيبة جاني حزن فظيع فظيع
ماصرت انام بكيت بس دموعي تحجرت صرت اجامل اهلي واطلع واسولف وانا بغرفتي حزينة
ابكي وبعدين اطلع لهم وكان شيئا لم يكن
حزنت لان كم مرة لما اوافق وانبسط وابي امي تفرح وابي اللي تركوني وخذلوني يشوفون نصر ربي
ليت الخطبة ماصارت اساسا ليتني ماعرفتهم ………….
لاهم ولا اللي قبلهم وو
كنت ابي افرح وانخطب
كثير انجرح كثير اتالم
حتى من اسبابهم
كثير قالوا كبيرة!!
حتى لو ولدهم كبير
اقسم ان شكلي اصغر
والحمد الله
بالاجازة ضغوطات لاتقل عن العام الماضي يمكن تزيد
واللي يرمى كلمة علي من لاطفال بهالاجازة كنت اعاني من الاحراجات بشكل تفوق الوصف
بالسيارة بالشارع بالبيت
ماتزوجتي..انت كبيرة ..
خاله متى زواجك… كم عمرك..ليش تاخرتي ..فلانة تزوجت
بنزوجك على فلان
غير نظرات الكبار وتحطيم خواتي لي وتجريحهم حتى لو مايقصدون {بشكل لو مو مباشر}
صرت اسكت راوح غرفتي وابكي على كل شي
هذا رزق ونصيب وانا انسانه لي عواطف وحاجات بس ابيها بالحلال
هذا اللي ربي كتبه ويمكن خيره
انا زعلت لان كثير تحطمت اخر مرة قبل هالمرة كنت بروح طبيبة نفسية لان اعاني من صدمة بعد الخطبة
لكن كيف اروح وماقدر احكي لاحد ويعرفون انكساري
كنت ابي اتعالج من الحزن والكابة من الدموع
فوق هذا المجتمع ظالم وربي يعتبرونا عوانس والناس تستغرب
الحمد الله على كل حال
ببنات عمي صرت اكبر وحدة ..بكل مكان صرت انحرج
اشوف البنات اصغر مني تزوجن الا اناا
يارب يسر امري يارب ارحمني وارفع الاحزان عني
اشوف نظراتهم لما يشوفوني انا اكشخ واهتم بنفسي ولله الحمد بس هذا رزق لسا ربي ماكتبه ويعلم ربي ان ودي اتزوج بس صبر جميل
ماعترض على امر ربي وحكمته بس حزنت على كثرة الصدمات
عذبتني الاحزان
صرت اقول ليش يصير كذااا
ليتني ماانخطبت اصلا……مالحقت افرح
عشت احلام يالله يابنات
كنت اتمنى انهم ماتقدموا اساسا ولاتعلقت بهم ابداا
سببوا لي احزان علاوة على عدم احساس اهل الرجل ابداااااااااااااا
يبي صغيرة وبكرة يقول ماتفهمني
التقارب بالسن مطلب ..يبي فرق اكثر من 10 سنوات!!
العام بنفس رمضان انصدمت
لاحول ولاقوة الا بالله
وبهالفترة كم رسالة جتني فلانة ولدت ..
وفلانة حامل
وهالايام افراح لبنات العائلة ومعارف فلانة تجهز واصغر مني
وفلانة انخطبت
اللي تطلقت رجعت تزوجت والان ولدت
واللي تملكت وتفركشت العام …هاليومين زواجها على شاب بعد مرور اقل من سنة تملكت
زميلتي وحبيبة قلبي افضفض لها بالمسن ربي رزقها وفرحت لها بقلبي وكنا مخطوبين سوى
هي من انخطبت وانا اتخطبت بعدها وماتم
والحين انخطبت وبرضه ماتم وهي تزوجت ربي يسعدها
لما يقوولن عقبالك تجيني خنقة ماتتخيلون لان المفترض الحين انا مخطووبة
انا اعترف اني كبرت بس مو بيدي وفيني مواصفات الحمد الله مطلوبة
اغلب صدماتي كيف تكون…؟؟ الامور تتسهل بعدين اتفشل قدام نفسي وقدام الكل ابكي بصمت مابي حد يشوف انكساري…………….تعرضت لاحزان كثثثثثثثثثثثثثثثثثثثثثثثثثثثثثثثثيرة من اكثر من سنة
حتى من الاطفال ومن خواني ليش تاخرت وربي مو بيدي نصيب
انا الجريئة المرحة صرت مالقى جواب لهم
لما الان يذكرون فلانة وعلانة ليش فلان ماخذهم!! كاني ارى نفسي عندهم كبيرة مانفع
وحدة منهم توزع ارقام بنات وهي قريبتنا
مو كان اولى ذكرنا!!! تحبنا وتجيناا وين فعل الخير
لكن هم بس يتونسون بنا ويزورناا
بكيت وتالمت وكان عيدي حزن وماهتميت بالناس ولبست عادي
كنت لولا الملامة مابي اشوف حد
بعد يومين دقوا ناس على اختي رجال ذكرني
مطلق لكن كفو وقلت ماارح افكر باخذه خلاص تعبت وربي
الا سالوا عن العمر ورفض الرجال رغم انه اكبر مني يقول فارق سنة
يبي وحدة 26
حتى المطلق يبي الصغيرة!!
توقعته يتنازل وكنت حاطة امل على المطلق بعد الاول اللي بكيت عليه وصابني حزن
معقول لاالكبير يبيني ولا المطلق
رحمتك يااااااااااااااااااااااااااااااااااااااااااالله
ودي ابكي شهر فيني حزن
ماتتخيلون
عندي ضغوط بالبيت وصرت عصبية ومحد يقدر وضعي ومحد يلومني صرت من الهموم مكتئبة مالي مزاج شي
اقسم بالله اتمنى اضحك من قلب
تعرفون لما اضحك من قلب استغرب!!يجيني احساس زمان ماذقته
مثقفة وبنت ناس وشكلي مو شين
ذوق ..افهم بالطبخ وافهم بالثقافة ..
ماغازل ولاشي.محافظة على نفسي انتظر الحلال
فيني نقص عواطف
جدب شح
ابي اتزوج واقولها صريح
ومافيه خاطب
زميلاتي وينهم
بنات الحي وينهم الصغار تزوجن
زميلات الكلية
الثانوي
بعضهم تملكن سوى كنت اقول بيجيني الدور
انخطبن وتملكن وتزوجن بوقت واحد
وحدة سحبت علي بزواجها
والثانية ولدت ماخبرتني بحملها!!
كلهم اساؤوا لي
ابكوني بقووة
من سنتين هالكلام الان كل وحدة بطفلها
!!!!!!
وين حنين المتفوقة المتميزة بالمدرسة
صرت حبيسة البيت ولاشي ولاوظيفة
بنات الثانوي كل زميلاتي تزوجن وخلفن
وش فيني
استغفر الله وهذا نصيب
لكن المجتمع ظالم
اتمنى اعيش بمكان لحالي
مابي اشوف هالمجتمع
..
صرت اتذكر الاحباطات اللي قبل ..اتذكر فلانة زميلتي والثانية
وو
اللي معها 2 واللي ولدت واللي تسال ليش انا ماتزوجت
ابي اتوظف ماتوظفت
زواجي ربي ماكتبه
ونسبق ان نصحتوني ماقصرتوا سواء بالعام او الخاص
فلاتظنون اني اجهل امور التقرب لربي بالصلاة وو
لكن جيت افضفض كي لاتزيد احزاني يجيني اكتئاب
ابي منكم دعوة بظهر الغيب وانتم صيام تذكروني
وتذكروا حنين وحزن العيد
واخر شي اقول الحمد الله على كل حال …….
الحمد الله على نعمه العظيمة والائه الجسيمة
