عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مرحبا كروشات
كيفكم مع الحمل والتعب ؟ انشاء الله بخير 😎
الله يسهل علي وعليكم بس حبيت اعطيكم نصايح تخفى عن بعضنا او يغفل عنها 😛
1- لا تستخدمين الكماده على بطنك في النفاس تراها مضره للرحم والمبايض
2- اللي مو بكريه وولدت قبل كذا يجيها الم شديد بالبطن وانتفاخ هو تجمع الدم وعلشان يروح الالم وتخففينه بعد ماتولدين بكم ساعه راح تحسي ببطنك يتحجر وينتفخ وهذا يسمى بالحس دلكي مكان الانتفاخ والالم بشويش واستمري بالتدليك علشان ما يتجمع الدم وبتشوفين الدم ينزل معك واذا انتفخ بطنك وتجمع الدم بيطول معك الالم
3- وانتي بالمستشفى اطلبي من اهلك او اهل زوجك يجيبون لك ترمس قرفه مع زنجبيل واشربي طول اليوم بينزل الدم المنحبس
4- نامي على ظهرك لاتنامين على جنبك شهر كامل علشان يرجع الرحم لوضعيته الطبيعيه ولا تتهاونين بالموضوع ترى النوم على الجنب يسبب ميلان او انقلاب الرحم
5- حاولي ترضعين طفلك دايم وبعد الولاده بكم ساعه يساعد على ترجيع الرحم لوضعه الطبيعي وينزل الدم الفاسد بسرعه
6- اذا بتستخدمين الملح الخشن للتنقيع والمره خليهم بعد اليوم العاشر لانهم بينشفون لك المنطقه وبيطيحون الخيوط اذا بديتي فيهم بدري
ونصيحه حطي مره وفوقها زيت او مرهم علشان مايشد الجرح عليك
7- لاتنسين اللهموم والسفوف تراه اساس النفاس
8- كثري من اكل المهلبيه النشأ تراها تلحم الظهر
9- كثري من اكل الحلاوه الطحينيه تراها تدر الحليب وشربي حليب المرضع اللي يجي بالصيدليه
10- حرصي على اكلك وراحتك وتدفئتك طول النفاس وبالذات الاسبوعين الاولين
11- كثري اكل سمك ودجاج ولحم وبالذات السمك يلئم الجروح
12- استمري على حبوب الحديد شهرين بعد الولاده يعوض جسمك الدم الي فقده
13- كثري اكل التمرعلشان يلين بطنك ولاتهملين الملين علشان ماتنفتح خياطتك
14- اشربي عسل والاحسن يكون عسل ابيض على الريق مع ماء دافى
15- اكلي عنب وفراوله و برتقال و مانجو و رمان واناناس يساعدون على سرعه التئام الجرح
((( وهذا كلام يختلف عليه البعض البعض يقول ان الفواكه تسبب خراب والله اعلم بس هذا كلام دكتوره بريطانيه تقول انها تساعد على ألتئام جرح الولاده وتعوض الدم المفقود وتلين البطن .. انا شخصيا أكل والحمدلله ماجاني شي )))
اتمنى اكون افدتكم وذكرتكم ادعوا لي اولد بالسلامه
والله يسهل علي وعليكم ولادتكم ونفاسكم
