عقاب على كيفهم :(

السلام عليكم

ببدا بالقصه على طووووول

انا مرشده طلابيه بمدرسه اهليه وعندنا معلمه علوووم كل يوم تحاول بطالباتها يجيبون المطويات ومافاد

ونزلت طالباتها لي اتفاهم معهم قلت بكره جيبو المطويه ان ماجبتوها بخليكم تعيدونها 10 مرات

وجاء من بكره ونفس الشي ماجابوها وناديتهم قلت تكررونها 10 مرات ولا بتزيد لـ 20 مره

جا من بعده ماجابوها ونزلتهم لي المعلمه قلت مادام عقاب التكرار مافاد معكم وش تقترحون اعاقبكم !!!

وكنت اكلمهم باسلوب وانصحهم يهتمون بدراستهم قلت بخليكم تنظفون الساحه لمده اسبوع أو تعيدونها 20 مره فاختارو جميعا تنظيف الساحه لمده اسبوووع

وخليتهم يكتبون اسماءهم ويوقعون

اليوم الاول نظفو وعدى بسلام

اليوم الثاني لما انتهت الفسحه وبدو ينظفون جت وليه امر طالبه للمديره تشتكي ان هذا عقاب غير تربوي ومادري ايش ونادتني اتفاهم معها

تقولي اقدر احل الموضوع بطريقه ثانيه بس حبيت احله بشكل ودي

قلت ماظن عقابي فيه شي قالت انا مايرضيني ان بنتي تنظف قلت العقاب مستحيل يكون شي ممتع

وعلى فكره حذرتهم كذا مره ولا فاد وعاقبتهم بالتكرار ولا فاد قالت حتى مايرضيني انها تكرر المطويه 10 مرات تعب عليها

قلت يعني لا هذا ولا ذاك وش تنصحيني !!

قالت بدرجات السلوك نقصيهم قلت اغلبهم ماتهمهم الدرجات يعني مايعتبر عقاب

قالت بس بنتي شاطره مو مثلهم قلت وانا مايرضيني اني افرق بينهم واعاقب كل وحده بشي

بنتك مثلها مثلهم ماجابت مطويه ويشملها العقاب

المهم قالت ماببي هالشي يتكرر وراحت والي قاهرني المديره مافي اي رده فعل

بالعكس تقولي انا مستغربه عقابك للطالبات بالتنظيف احسه غلط قلت لما كنتي تشوفينه غلط ليش ماقلتي لي مو توك تحكين قالت ماحبيت اتدخل

مررره انقهرت وتنرفزت على طوووول صارت ضدي بكل بساطه والي قاهرني مادري هل بكره بيكمل عقابهم ونخليهم ينظفون ولا

الي ابي اعرررفه هل هذا العقاب من حقي او ممكن احاسب عليه ؟؟