عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله
كيفكم ياحلوين
انا حابه افضفض لكم شوي وربي تعبت من التفكير ومابيدي شي اقدر اسويه..
والله شايله هم ابوي وامي بسبب عمي الله يشفيه 💡
الموضوع ومافيه
اني انا وحيدة اهلي وعندي واحد من اعمامي كبير بالسن متزوج وحده من جماعتنا ومالله رزقهم بعيال وهي كانت تدرس وتوظفت ماشاء الله وصارت بمرتبه كبيرة والان تقاعدت لكبر سنها
وعمي كان يشتغل عسكري وصار له حادث اثر على مشيته وفصلوه من العمل
وصارت هي اللي تصرف البيت هذا الكلام من زماااااااااااان
وصار سواق لها يوديها للدوام ويجيبها ويوديها مشاويرها و و و
المهم عمي عنده سكر وقبل سنتين جاته جلطة وصار مايقدر يمشي ولايتحرك وصار طريح الفراش:P
المهم هي ماقصرت معاه جابت لها سواق وشغاله وماقصرت مع عمي دايم توديه للمستشفيات وسوت له علاج طبيعي بس مافيه فايده..
المهم قامت باعت بيت زوجها وقالت له انا ابغى اعالجك بفلوسك وو و وواقتنع وباع البيت والفلوس عندها
وهي ساكنه بيت ملك لها
المهم الحين هي تعبت وصارت ماتقدر تشيله وتوديه للحمام الله يكرمكم لكبر سنها ولان رجولها وركبها تعبانه..وعمي وزنه ثقيل شوي من كثر الجلسه وقلة الحركه..
وصارت تخلي السواق يشيل عمي من السرير ويحطه بالكرسي وهي توديه للحمام وتغسله وتروشه وتنادي السواق يشيله ويرجعه للسرير
والمشكله ان عمي مايطيق السواق الجديد وهو ضعيف ورايح بحاله ومشكلة عمي انه عصبي ولسانه متبري منه ولايشكر ولايدعي ولايقول كلام حلو
واذا بغى شي وهي ماتقدر تسويه قام يدعي عليها و و و هي زعلت الحين
وكلمت ابوي وقالت شوف لك صرفه بأخوك انا تعبت منه وماعاد اقدر اشيله
جيب له واحد يجلس معاه ويوديه الحمام ويغسله وينضفه و و و
وهي حاطه عمي بغرفه مع حمامها ومشتريه له ملابس وحفايض للكبار وقسطره وكل شي ماقصرت معاه بشي
الحين ابوي جالس يدور احد مالقي اي واحد يرضى يجلس عند عمي ويقوم به
((ابوي كبير بالسن اكبر من عمي ومشيته ثقيله وظهره يعوره ورجوله..ونظره ضعيف مايشوف بالليل بالقوة يروح الصلاة ويروح يقضي اغراضه هو وامي.. والاهم ان ابوي حساس مررررررررره ويشيل هم الناس البعيد قبل القريب..وعنده قولون اذا شال هم اي شي الله يكرمكم ماياكل شي واذا غصبناه عالاكل يرجع ويستفرغ مره ثانيه من الهم..ولاينام ..وماعندهم احد لأني انا وحيدتهم ومتزوجه وزوجي على قد حاله الحمدلله .وماني متوظفه..
وحالتهم الماديه ضعيفه جدا مستاجرين وراتب ابوي 1725 ريال فقط وقدم بالضمان واعطوه 1100 ريال بالشهر وتعرفون يادوب تكفي مصروف وفاتورة الكهرب والماء
وابوي عليه ديووون قد شعر راسه
عنده قطعة ارض بنى فيها حوش و4 غرف بمنافعها وغطاها بحديد ومو قادر يسوي الكهرباء واللياسه والبويه ولا السيراميك ولا شي ..عشان ينفك من الايجار وهمه,,الله يفرج همه..وامي كبيره بالسن وعندها ضغط وعصبية شوي..))
اليوم حرمة عمي سوت حركه غريبه شكلها تبغى ابوي ياخذ عمي عنده وتفتك منه ومن الشقا..
لبست عمي وجهزته وقالت ابغاك تروح تصلي صلاة الجمعة وهو ماقد راح المهم دقت على السواق ولقيته مقفل جواله ..المهم نزلت عمي هي والشغاله برى الحوش وخلت الباب فاتح ولما خرجوا الناس من الصلاة شافوه في الحوش وجو 4 رجال من جماعتنا وشالو عمي ودخلوه البيت وهي سوت نفسها انها عادي تبغاها يروح للصلاة بس مالقيت احد يوديه..
المهم عمي عصب وقال نزلوني بالحوش انا طفشت من الحبسه بالغرفه ابغى اشم هواء واشوف ربي.. تخيلوا خرج الحوش الساعه 2 الظهر بعز الشمس ومااحد قدر عليه لأنه عنيد.. وقال دقوا على اخوي ((يقصد ابوي)) خلوه يجيني يجيب لي رجال يشيلني ويوديني الحمام ويدخلني الغرفة ويخرجني الحوش متى ماابغى..
المهم دقوا على ابوي وقالوا اخوك فالشمس يبغاك تجي
ابوي ضعيف راح له وقال له جيب لي رجال يخدمني قال ابوي والله مالقيت احد للحين اصبر علي..وقام عمي يهاوش وسمع ابوي كم كلمه مالها داعي..وخرجت زوجته وقالت انا ابغى اروح لاختي وارجع بعد المغرب..
جلس ابوي عند عمي وقال انا جالس ادور لك واحد ووصيت الناس كلهم يدورون وانا والله مافيني حيل اشيلك ولا اقدر لك ..قالت حرمة عمي انا ابسفر السواق هذا وابغى اجيب لي سواق خاص فيني للمشاوير..ومااقدر ادفع راتب سواق وراتب واحد يخدم اخوك ..
((للأمانه هي بنت رجاااااال ماقصرت بس تعبت من الوحده ابوها وامها توفوا قبل سنه وتعبت نفسيا وماعاد لها غير اختها واختها مشغوله بوضيفتها وعيالها..ومالها سند الا الله سبحانه وتعالى..دقت على عمها تشتكي من زوجها قال لها هذا زوجك وانتي النفروض تتحملينه..دقت على خالها واشتكت دور لها على عامل يساعدها ماحصل ..وهي نفسيتها تعبااااااااااااااانه من عمي))الله يجزاها خير..
المهم رجع ابوي للبيت وامي تقول ماذاق ولا لقمه ولا اكل ولانام تقول طول الليل يتقلب يفكر في عمي..
امي تقول الحين وش نسوي تقول اخاف الحرمه تقول شيل اخوك عندك واحنا اول شي ماعندنا غرفة بالبيت مجهزة تصلح له..وثاني شي ماعندنا استطاعه نجيب له رجال يخدمه ولاعندنا فلوس نقدر نوديه مستشفى نعالجه اذا مرض او نجيب له الاشياء اللي يحتاجها..والاهم انهم مايقدرون يتحملون سلطة لساااانه لان لسانه مايرحم ولايشكر ولايذكر الله..واللي يذبح اكثر ان ابوي بيمووت من القهر والهم والتفكير..وصاحب الشقه لو عرف انهم عندهم احد ساكن معهم بالشقه ممكن يزود الايجار ..او يخرجهم..
الحين وش رايكم وش يسوون 😆 🙂
للعلم ان اخوان ابوي عماني 2 واحد كبير في السن ساكن في البر واعمى مايشوف و ولده قايم به
والثاني ماعنده لا وظيفه ولاشي وعنده كوووم اطفال وفضحنا بين الناس يشحت لهم وياكل وقاطع ابوي لأنه يجي يطلب فلوس من ابوي وابوي يقول والله ماعندي وهو يزعل يحسب ان ابوي قاعد على كنز مو داري انه فقير.واللي مايعطيه فلوس يزعل ويقاطعه..
وعندنا عيال عمي (عمي متوفي) وعياله من سنين مقاطعين ابوي واعمامي شايفين نفسهم لانهم اغنياء ومتوظفين واخواتهم 2 ممرضات ويلعبون بالفلوس لعب..ولايجون بالعيد ولايسلمون ولاشي ..
الحين ابوي وش يسوي في عمي لو قال له ابغى اجي عندك بالبيت ابوي مستحيل يقول له لا لاتجيني خاصة اذا حرمته قالت شيل اخوك انا ماعاد اقدر له…؟؟ وامي خايفه على ابوي من الهم والمرض اللي بيجيه..وحالتهم حاله
ياليت تقولون لي وش نسوي بمشكلة عمي ..
معليش طولت عليكم وكلامي ملخبط بس حبيت اطلع اللي بصدري ومحتاجه احد يساعدني بنصيحه او دعوه
واللي بترد رد يغث رجاء لاترد ماني ناقصه غثا ونكد..
وياليت ماتنسون تدعون لأبوي ربي يفرج همه ويريح قلبه ويسدد دينه وييسر امره ويشاااافيه ويطول بعمره ويخليه لي ولأمي يارب العالمين
