طلق مبكر في الشهر السادس

مبارك عليكم الشهر أخواتي الفراشات

حبيت اسرد لكم معاناتي مع الحمل والطلق المبكر اللي فاجأني بصراحه

باول الصيف .. طبعا زيارات وافراح .. وخرجات مع اهلي .. ولما نروح السوق الف الف مية لفة

ولا انتبه لنفسي ولاني حاسه اني حامل ما شا الله

لكن هذا كله انعكس على صحتي انعاكس سلبي ..

لاني وبنص شهر شعبان تعبت مره وجلست تقريبا اسبوع صابره على الالم

وهو مثل الم الدورة .. مغص بأسفل البطن وألم شديد بنهاية الظهر ويمتد للركب

ولما رحت للدكتورة قالت لي هذا طلق مبكر .. وعطتني حبوب تهدي الطلق

يعني كل ما حسيت بهذا الالم اكل من هالدواء .. وقالت لازمني راحة شديده

وما اتحرك ابد .. ولا اوقف ابد ابد .. ولازم اكون على طول منسدحه

على الاقل الين ادخل بالسابع واولد .. ويكون الخطر اخف من الولادة بالشهر السادس

طبعا أنا مره تفاجأت .. وما كان على بالي ابدا ..

لكن اللي خوفني اكثر .. زعل زوجي وخوفه الشديد من ان الطفل ما يعيش

وبلحظة غضب كان يلومني انه انا السبب ..

لو انجبت طفل غير مكتمل الخلقة و تكون عنده مشاكل بالجهاز التنفسي و بالقلب

وانا بصراحه اعذره .. لاني فعلا ما ريحت نفسي من المشاوير ومن الشغل والطبخ

مع ان هذا اول حمل لي وبعد انتظار سنة ونصف ..

وأنا الآن احاول اني ما اتحرك كثير .. وطوال الوقت مسدوحه

ولا اوقف ولا امشي كثير .. ولا عاد ادخل المطبخ .. مع انها صعبه علي

الحمد الله قل الالم .. لكن ما قل الخوف ابدا .. وانا دايم افكر في زوجي وفي نفسيته شلون بتكون

بالذات ان اخوه الصغير تزوج بعدنا وزوجته الحين حامل ..

انا حبيت اكتب لكم عن معاناتي ..

أولا .. لأنصح الفراشات الكروشات بالراحه والاهتمام بانفسهن

وثانيا .. لأطلب منكن الدعاء لي ولزوجي بالذرية الصالحه

وان يتمم حملي على خير .. ويرزقني طفل سليم معافى كامل الخلق والخلق

قال الله تعالى : ( ربّ لا تذرني فردا وأنت خير الوارثين ) .. صدق الله العظيم